Atzo, ekainak 10, papergintzako Gipuzkoako hitzarmenaren bilera berri bat burutu zen. Oraindik akordioa urrun dago. Hortaz, aurreikusitako 16 greba egunak mantentzeko deialdia egiten dugu.
ADEGIk sektorearen egoerarekin bat egiten duen proposamenik ez du jarri mahai gainean. Sindikatuen proposamenaren gai askori erantzunik eman gabe jarraitzein du. Patronalak egin duen soldata igoera proposamena probokazio hutsa da: KPI+%0,8a 2019 eta 2020rako eta KPI+%0,9 2021 eta 2022 urteetarako.
Sektoreko enpresen egoera oso ona da. Irabazi handiak izan dituzte. 2016 eta 2017 urteetan 61 milioi euroko irabaziak izan dituzte. Pertsonalaren gastua gastu guztien %10 besterik ez da, hau da, enpresek fakturatzen dituzten 10 euroko bakarra doa nominak ordaintzera. Hortaz, ADEGIk askoz gehiago eman dezake.
Atzoko bileran ADEGIk urrats bat eman zuen norabide onean, lan istripu eta gaixotasun profesionalen kasuetarako %100ko osagarria ematea onartu zuelako, absentismo mailarekiko loturarik gabe. LABek ongi baloratzen du neurria, urteetan sektorean egondako eskaera bat delako eta negoziaketa hontarako ezarritako helburuetako bat delako.
Honek erakusten du presioak soilik mugiarazten duela ADEGI. Beste bi bilera jarri ditugu, asteazkenerako, hilak 12 eta datorren astelehenerako, 17rako. LABek ahal duen guztia egingo du bidezkoa den akordio duin bat erdiesteko. Horretarako ezinbestekoa da langile guztiok bat egitea gure aldarrikapenen alde eta egun hauetan burutuko diren batzarretan grebaren aldeko bozka ematea.
Papergintzan lan duina, hitzarmen duinak. Gipuzkoako papergintza grebara!