Gaur, apirilak 14, LABek mobilizazio bat burutu du “ABSENTISMOA? ZUEN NEGOZIOA! Gure eskubideak defenda ditzagun” lelopean. Mobilizazio honen bitartez, SEAk eta Arabako Foru Aldundiak abiatu duten absentismoaren inguruko kanpaina salatu nahi izan dugu.
Izan ere, SEAk langileon eskubideak murriztu nahi ditu absentismoaren mamuarekin, beraien negozioa, beraien etekinak handitzeko. Gaur egun, patronalaren proposamen zehatz bakarra da bajan egoteagatiko osagarriak murriztea eta Herrialdeko Garbiketa eta Ostalaritza hitzarmenetan beste sindikatuek onartu dute. Gogorarazi nahi dugu Patronalak eta Aldundiak deitzen duten absentismoa, eskubideak direla: lan eskubideak, osasun eskubideak, eskubide sindikalak. Horiek murriztea bilatzen dute baina LABek defendatuko ditu, kosta ala kosta, Patronalaren eta erakundeen aurrean.
Arabako Foru Aldundiak diskurtsoa erosi dio SEAri eta haien ondoan kokatu da. Ez hori bakarrik, aurten 102.000€ eman dizkio SEAri absentismoaren mamuarekin jarraitzeko, aurrekontuetatik kanpoko partida batean eta beraien negozioa borobilduz. Iazko maiatzean plan bat aurkeztu zuten, eta orain diagnostiko bat eta estrategia berriak bultzatu nahi dituzte; non daude Plan horren emaitzak? Beraz, berriro ere langileak defendatu beharrean, diru publikoa oparitzen dio Patronalari langileon eskubideak murrizteko.
Aldi berean, salatu nahi dugu Araban aurten jada 5 langile hil dira, ehunka lan istripu egon dira, Patronalak prebentzio neurriak urratzen dituelako inpunitate osoz. Beraz, Patronalari diru publikoa oparitu beharrean, zergatik ez dute inbertitzen Prebentzio araudiaren betetze mailaren auditoria tekniko ofizial bat egiteko, Nafarroan egin den bezala?
Bukatzeko, ikusita lan istripuen aurrean Ramiro Ahaldun Nagusiari ez diogula adierazpenik entzun, ez duela ezta kezka minimo bat helarazi ere, honakoak erreklamatzen dizkiogu:
- Patronala presionatzea Prebentzio neurriak bete ditzan
- Bere eskumenen barruan eta pribatizatutako sektoreetan prebentzioa bermatzea, langileon lan osasuna zaintzeko
- Osakidetza indartzea, pribatizazioari buelta emanez eta osasun zerbitzu publiko eta kalitatezkoa bultzatuz, guztion osasuna hobetzeko.