Astearte arratsaldean, Eusko Jaurlaritzako Lan Sailak agindu baten bidez %100eko gutxieneko zerbitzuak ezarri zituen ikastetxeetako eta EHUko garbiketa zerbitzuan, modu horretan, deitutako greba ondorio praktikorik gabe utziz. Hain erabaki berezia hartzeko erabilitako arrazoia osasun publikoko irizpideetan oinarritu dago, koronabirus izurritearen aurrean arrisku egoeran gaudela iritzita. Gaur, EAEko ikastetxe guztien itxiera agindu du.
Horrelako egoeretan, argi geratu da egiten dugun lanaren garrantzia. Gure lana funtsezkoa da garbitasun- eta higiene-baldintza egokiei eusteko prebentzio-neurri gisa.
Eusko Jaurlaritzak funtzionarioei etxetik lan egitea aholkatzen zien bitartean, garbitzaileei grebatik lanera itzultzera behartu zituen. Langile guztiak beren lanpostuetara joan ziren atzo. Erantzukizunagatik egin zuten, pairatzen ari garen egoerak behartuta.
Hala ere, salatu nahi dugu ez enpresek, ez EHUk, ez Hezkuntza Sailak ez dutela inolako kezkarik agertu langile horien laneko segurtasun eta osasun baldintzengatik. %100eko gutxieneko zerbitzuak agintzen dira, lanzentroak itxi egiten dira eta grebalariak beren lanpostuetara itzultzen dira, osasunerako arrisku erreal eta eraginkorreko inguruabarrak daudelako, baina garbitzaileei ez zaie inolako indikaziorik ematen ezta babes-neurririk oinarrizkoena ere ematen. Ez dizkiete ez ez nitrilozko eskularruak, ez desinfektatzaile kloratua ezta maskarilarik eman. Ez dute prestakuntza espezifikorik jaso. Ez diete protokolorik azaldu edo Osakidetzak gomendatutako argibideak eman.
Hau da, beste behin ere, gure sektorearen errealitatea. Gure sorbalden ardura da prebentzio-neurriak hartzea, baina ez dute prebentzio-neurririk hartzen guretzat. Gure lanak garrantzia dauka, baina gure osasunak ez.
Hemendik, egoera horri buruzko salaketa publiko bat egin nahi dugu, eta enpresei eta Eusko Jaurlaritzari interpelazioa egiten diegu garbiketako langileen osasuna ere bermatzeko prebentzioneurriak har ditzaten.