Elecnor Telecomunicaciones enpresako langileak berriro mobilizatu dira gaur Gasteizen, lantokian deitutako bosgarren greba eguna dela eta. Era berean, abenduaren 9an abiatuko duten greba mugagabearen deialdia erregistratu dute.
Hauxe da langileek igorritako oharra:
Aurreko greba egunean esan bezala, enpresak baldintza minimo batzuk negoziatzeko erakutsi duen borondate ezaren aurrean, langileek mobilizazio gehiago egitera eraman ditu, zeintzuk urte amaierako greba mugagabea izango duten puntu nagusi.
Elecnor Telecomunicaciones enpresan deitutako bostgarren greba jardunaldia berriro ere oso arrakastatsua izan da. Langileek bi elkarretaratze burutu dituzte haien lan egoera salatzeko: lehena 09:00-10:00 bitartean Lakuan dagoen Telefónica Eraikinaren aurrean, eta bigarrena eguerdian General Loma plazan dagoen Telefónica dendaren aurrean.
Esan bezala, dagoeneko erregistratu da abenduaren 9an hasiko den greba mugagabea. Bi aste hauetan enpresak ez du egoera konpontzeko mugimendu bakar bat egin. Are gehiago, beste herrialdeetako lankideei esker, Arabako Delegatuek jakin ahal izan dute enpresak Nafarroatik langileak bidaltzen ari dituela Agurain eta Araiara lanera, grebalarien greba eskubidea bera kolokan jarriz.
Enpresak arazo ekonomikoak argudiatzen ditu langileen egoera duinduko lituzken neurriak hartzeko, baina aldi berean ezkutatzen du soilik 2018an bere laguntxoen artean 28 milioi euro banatu zituztela. Gainera, egun hauetan hainbat komunikabidek argitara eman dute aurtengo urtarrila eta iraila artean Elecnorrek fakturazioa % 1,5 handitu duela. Honek enpresak langileon baldintzak duintzeko duen borondate falta agerian uzten du, langileon izerdiaz baliatzen delarik poltsiko gutxi batzuk diruz betetzeko.
Honekin guztiarekin, greba egunetarako mobilizazioak adosten doaz. Gabonen bezperetan egonik, Telefonica-ko bezero eta bezero posible horiei azpi-kontratako langileen egoera azalduko zaie. Honetaz gain, Plaza Berrian egiten den merkatuaren harira elkarretaratze intentsiboa burutuko da, eta ostiralerako, abenduak 20, Arabako langileak Bilbora hurbilduko dira bertan dauden Elecnor eta Telefonica enpresen egoitza zentralen aurrean protestak burutzeko. Azken mobilizazio honek Bizkaia, Gipuzkoa eta Nafarroan dauden ELA, LAB eta ESK sindikatuen langileon ordezkarien babesa izango du.