Gaur burutuko den aurtengo Batzarrean, aurrekontuak eta kudeaketa planak onartuko dira. LABek, aurrekontuetan beste partida batzuk sartu behar direla uste du, haurreskolen doakotasuna garatzeko, 2 urteko gelak Haur hezkuntzako lehen zikloan mantentzeko eta langileon egonkortasuna eta 2018tik negoziatu gabe dagoen Lan hitzarmen berria negoziatzeko.
Eusko Jaurlaritzako Hezkuntza Sailaren asmoen artean, haur-hezkuntzako lehen zikloa, haurreskoletako hain zuzen ere, umeen 0-2 urte tartera mugatzea da, aldiz, LAB sindikatuarentzat, gizarteko eragile eta familia askorentzat umeen 0-3 urte bitarteko zikloa izaten jarraitu behar duela argi dugu, eta gainera, euskalduna, kalitatekoa, unibertsala eta doakoa izan behar duela.
Horregatik Eusko Jaurlaritzari, Legebiltzarrak eskatu ziona betetzeko pausu gehiago ematea eskatzen dio LABek. Haurreskolen doakotasuna helburua izanik, lehen urratsa beteta jada, hezkuntza zerbitzu hau, urtean 18.000 euro baino errenta baxuagoa duten familientzako doakoa baita. Jaiotzatik hezkuntza eskubidea aukera berdintasunean bermatuta izateko, doakotasun osoa eskatzen dugu.
Halaber, orain urte bete LAB sindikatuak familiek sinatutako ehundaka eskaera erregistratu zituen Legebiltzarrean, 2 urteko haurrak Haurreskolak Partzuergoan geratzeko euren nahia aldarrikatuz. Tamalez, ez dugu erantzunik jaso, hezkuntza komunitatearen ahotsa entzunezina izaten jarraitzen du. Zer esanik ez, haurrena. 0 eta 3 urte arteko haurren beharrak, erritmoak, ratioak, espazioak… garapenerako baldintzarik onenak haurreskoletan ditugula ez dago zalantzarik.
Gauzak horrela 0-3 urte arteko ziklotik Euskal Eskola Publiko Komunitarioa eraikitzeko bidean, hezkuntza komunitatearen ahotsa entzutea eskatzen dugu.Eusko Jaurlaritzak kontrako bidea hartzen jarraitzen badu, aurrean izango gaitu.