Gaur, uztailak 2, Gipuzkoako grafikagintzako hitzarmenaren negoziazio mahaiaren bilera berri bat burutu da. Gaurkoa lehenengo bilera izan da sektorean bi greba egun burutu ondoren eta bihar eta etzirako beste bi greba egunen bezperan, uztailaren 3 eta 4rako. Bileran ez da aurrerapausorik egon, hortaz, aurrera jarraitzen dute greba egunek. Bihar, uztailaren 3an manifestazioa egingo dute langileek Tolosako Triangelutik abiatuta, 11:00etatik aurrera.
Gogoratu nahi dugu bilera hau ADEGIk berak eskatu zuela. Bada, ADEGI esku hutsik etorri da bilerara. Ez du ezer berririk aurkeztu, ez du inolako proposamenik ekarri. Hau al da bere negoziatzeko borondatea? Negoziatzea blokeoa gainditzeko proposamen berriak ekartzea da. ADEGIk azaldu beharko du zertarako eskatu zuen bilera egitea ez bazuen proposamen berririk ekarri behar. Nolatan nahi du alde sozialarekin akordioetara heltzea?
ADEGIk aukera berri bat galdu du negoziazioan aurrera egiteko eta atzean uzteko konfrontazioa. ADEGIren arduragabekeriagatik grafikagintzako sektoreak beste bi greba egun jasango ditu.
LABek argi dauka: borrokan jarraituko dugu lan baldintza duinak jasoko dituen hitzarmen duin bat lortu arte, egungo egoera onari erantzungo diona.
Bihar, uztailaren 3an, grafikagintzako langileak mobilizatuko dira Tolosako Triangelu plazan goizeko 11:00etan.