Euskalgintzaren Kontseiluaren eskutik aurkeztu dugu ekimena ikasturtearen eta urte politikoaren hasieran murgildu berri garen honetan. Gasteizko Legebiltzarrean Hezkuntza Lege berriaren testuari buruzko eztabaidari berrekingo diote aurki, eta LAB sindikatutik argi diogu ezinbestekoa dela euskara ardatz izatea. Hori dela eta, hezkuntza komunitatea osatzen duten guztiei dei egiten diegu esteka honetan beren sinadura utzi eta ekimenarekin bat egiteko.
Hezkuntza funtsezko elementua da geure hizkuntzaren normalizaziorako bidean, eta hizkuntza eskubideak bermatzeko gakoa ere bada. Hala, hezkuntzak euskara gehiago behar du, eta horixe aldarrikatzeko langileon bultzada ezinbestekoa da. Sinadura bilketa honen bidez, 16 urtetik gorako Arabako, Bizkaiko eta Gipuzkoako herritar guztiek izango dute aldarri horrekin bat egiteko aukera, epea urriaren 15ean amaituko delarik. Zehazki, hiru puntu hauek lege berrian berariaz jaso daitezen eskatuko zaie Eusko Legebiltzarreko kideei:
1. Euskara ikas- eta irakats-hizkuntza izango duen eredu orokortu inklusiboa.
2. Euskal kultura ardatz izango duen euskal curriculuma.
3. Hezkuntza ez-arautua osorik euskaraz garatzea.
Euskalgintzaren kontseiluaren komunikatua eta sinadura bilketari buruzko informazio zehatza hemen kontsulta daiteke.