Gaur ez da egun arrunt bat Vic-en (Herrialde Katalanetan) kokatuta dagoen haragi industriako Esfosa lantegian. Gaur Martxotik aurrera eramaten ari diren borroka momentu gorenean dago, gaurko egunean erabakiko baita enpresaren mehatxuek bere helburua lortzen duten eta COSeko langileen ordezkariak direnak kargutik kenduko diren ala ez.
Borroka aurtengo Martxoan hasi zen enpresak lan hitzarmenaren sistematikoki betetzen ez zutela ikustean grebari ekin ziotenean. Greba horretan enpresarietako bat piketeetan zegoen langile etorkin batengana hurbildu eta honako irain arrazistak egin zizkion: “Afrikara bidaliko dizut goseak hil zaitezen”, “lau tiro emango dizkizuet”… Gertakari hauen ondoren, enpresak 9 kidek osatzen duten Komitean COSek dituen 7 ordezkariak zigortu egin zituen, eta Irailean langileei mehatxu egin zien COS sindikatuko kideak kargutik kendu ezean soldatak ordaintzeari utzi eta enpresa itxi eginen zutela. Mehatxu bidez batzarra deitzeko beharrezkoak diren sinadurak bilduta gaur ari dira bozkatzen ordezkari hauek kargutik kendu ala ez. Gaur Esfosan askatasun sindikala eta oinarrizko eskubide demokratiko bat dago jokoan.
Egoeraren larritasuna ikusirik LABetik hasiera hasieratik helarazi genien gure elkartasuna bai COSeko ordezkariei, baita borrokan ziharduten Esfosako langile guztiei eta orokorrean Herrialde Katalanetan baldintza tamalgarrietan lanean diharduten haragi industriako langile guztiei ere.
Gertatzen ari dena harriduraz ikusten dugu LABetik, harrigarria iruditzen baitzaigu feudalismo garaikoak izan zitezkeen praktika enpresarialak nola gaur egun oraindik ematen diren inpunitate guztiarekin gainera. Mehatxuak, irainak, arrazakeria, lan baldintza esklaboak… hau da Esfosako errealitate gordina, eta norbaitek aurre egiten dionean, inolako lotsa eta konplexurik gabe mehatxua erabiliz aurre egiten diona erditik kendu nahi dute.
Hori dela eta gure elkartasun guztia bidaltzen diegu egun garrantzitsu honetan. Borrokan jarraitzera animatzen diegu, borrokak fruituak ematen baititu, eta soilik borroka egiten duen langileriak lor baitezake horrelako praktika enpresarialei aurre egiteko.
Bertze aldetik COSeko eta Carnies en Lluita plataformako kideen duintasuna azpimarratu nahiko genuke. Egoerarik zailenetan, mehatxu guztiei aurre egin eta tinko borrokan dihardutelako. Hori gutxi ez balitz deskribaturiko baldintza gogorretan lan egiten duten langile guztiei (%90 etorkinak dira) babes sozial eta laborala eskaintzen diete, beraien eskubideak zein diren erakutsiz eta hauen edozein urraketei aurre egiten dihardutelako.
Horregatik jakin dezatela bai COSeko kideek, eta baita ere borrokan diharduten Esfosako langile guztiek ere, beraiekin gaudela, eta gure babes guztia daukatela borroka honetan.
Animo eta jo ta ke!
Fins a la victoria!