LABek kezkaz ikusten ditu Fresneseko espetxetik datozkigun azken berriak. Hain zuzen ere, Itziar Moreno isolaturik eta konfinaturik dago momentu honetan pairatzen dituzten giza eskubideen urraketak salatzeagatik. Era berean, elkartasuna adierazteagatik Ekhine Eizagirre eta Iratxe Sorzabal ere zigortuta daude. Horrekin batera, eta aipatutako presoak jasaten ari diren eskubideen urraketa hori salatu nahian, espetxe horretako gizonezkoen atalean preso dauden Ugaitz Errazkin Telleriak, Saul Curto Lópezek, Xabier Goienetxe Iragorrik, Oier Ibarguren Sarasolak eta Enrique López Junok 10 egun daramatzate gose greban.
Euskal preso politikoek espetxeetan pairatzen duten egoerak okerrera egin du. Honen aurrean LABek Espainiar eta frantziar estatuek euskal presoei ezartzen dieten mendekuzko eta salbuespenezko kartzela politika ankerra salatu nahi du eta bereziki, Fresneseko espetxean gertatzen ari dena. Euskal presoen oinarrizko eskubideen urraketa eta mendekua ohiko bilakatu dira eta gatazka politikoaren konponbidea eragoztea dute helburu.
Presoen afera konpontzea ezinbesteko urratsa da Euskal Herrian bake eta konponbide prozesuan aurrera egiteko. Baina beste behin, agerian geratu da Estatu espainiar eta frantziarrak hartutako norabidea: espetxe politika kriminala erabiltzen dute Euskal Herrian irekitako bake prozesua zapuztu eta euskal presoei etengabeko salbuespen neurriak ezartzeko. Ahots asko altxa dira dispertsioa eta salbuespeneko neurrien aurka, bada garaia beraz halako zigor neurriekin behin betikoz amaitzeko.
Giza eskubideen defentsan inoiz baino beharrezkoago da indarrak batzea eta egoera hau iraultzeko alderdi politiko eta eragile ezberdinen inplikazioa ezinbestekoa da. Horrez gain herri mobilizazioa indartuz soilik lortuko dugu espetxe politika anker honekin amaitzea eta euskal preso politiko guztiak etxera ekartzea. Zentzu honetan LABek eta dei egiten die langileei egoera hau salatzeko deitu diren mobilizazioetan parte hartzeko.