Jaietan Jai plataformako ELA, LAB, CCOO eta UGT sindikatuetako ordezkariek agerraldia eskaini dute Zonalde Turistikoaren inguruan udalak hartu duen erabakiaren harira egiten dugun irakurketa plazaratzeko. Hain zuzen ere sindikatuon iritziz neurri hauek ez dute aktibitate ekonomikoa handitzen ezta enplegurik sortzen ere.

Estatu espainarraren errege dekretu baten ondorioz, Donostian beste hiri batzuetan bezala, Turista – olde handiko gune bat arautzera behartua izan zen. Izan ere, hala egin ez balitz, hiri guztira zabalduko baitzen. Hala, egoerak bultzaturik eta sindikatu nahiz merkatari elkarteen iritzia kontuan harturik, 2014ko urriak 31 an onartu zen alde zaharreko eremu bat aitortzea eta denda irekiera 2015eko uztaila eta abuztuan egitea baimentzen zuen.

2015ko azaroaren 11ean berriz, eta oraingoan inorekin adostu gabe, Donostiako Tokiko Gobernu Batzordean Zona Turistikoaren definizioa aldatzea erabaki zen. Kasu honetan Alde Zahar osoa, Bretxa saltoki handia barne eta Zurriolako pasealeku eta etorbidea Zona Turistiko bezala izendatzeko neurria hartu zuten. Definizioa honekin, bertan kokatzen diren komertzioei igande eta jai egunetan irekitzeko eskumena ematen diete, 2016 urte osoan zehar.

Gaurko agerraldi honetan, neurri honen hiru puntu azpimarratu nahi genituzke:

– Neurriak bere baitan, merkataritza ordutegiaren liberatzea dakar eta honek, marka handien interesei erantzuteaz gain, denda txikiei eta ertainei kalte larriak eragiteko arriskua dakar. Bai eta, merkataritzako langileen lan-baldintzak okertzeko aukera ere.

– PNV eta PSEk, sindikatu, merkataritza elkarte eta gainontzeko alderdiei bizkar emanez onartu zuten. Ezkutuan eta eztabaidarik gabe, goizetik gauera.

– Aurreko legealdian sindikatu naiz merkataritza elkarteen iritziaz egindako Zona Turistikoaren definiziotik berri honetara moldatzeko ez da inolako arrazoirik aurkeztu.

Neurriaren larritasuna ikusita sindikatuok, EHBildu eta Irabazi alderdien babesarekin, mozioa sartu nahi izan dugu gaiaren inguruko eztabaida bat sustatzeko eta noski, gure aburuz bai langile eta baita komertzio txikiarentzat onena ikusten dugun aurreko zona turistikoaren definizioa mahai gainean jartzeko.

Egoera honen aurrean hemen batu garenok salatu nahi dugu Udalaren jarrera. Izan ere Zonalde Turistikoaren definizio berri honek marka handiko komertzioen interesei erantzuten die eta beraz, igande eta jai-egunetako merkataritza-ordutegiak erabat liberalizatzeko alfonbra gorria jartzen die udalak. Jakinda eta ondo jakinda ere jai egunetan komertzioak irekitzeak:

-Ez duela aktibitate ekonomikoa handitzen: Jai-egunean egiten den erosketa beste egun batean egiten ez dena da baita. Eros ahalmen handiagoa izateak ekarriko luke kontsumoaren gehitzea, ez ordutegiek liberazioak.

-Ez duela enplegurik sortzen: Sortzen den enplegua partziala da eta merkatal zentru haundietan prekarioagoa, merkataritza txikiko enplegua suntsituz.

-Bizitza familiarra eta profesionala uztartzeko mugak jartzen dituela. Azpimarratzekoa da gainera bereziki sektore feminizatua delaa kaltetuena.

-Kontsumitzaileei ez die askatasun gehiago ematen: eskaintza gutxitzen da eta herri eta hiriguneen desertifikazioa ematen da.

-Merkatari txikiak marka edo zentro handiekin lehiatzera behartzen dituela, ahalmen berdina ez dutenean eta arriskua handiarekin

Aurrekoa gutxi balitz, Donostia eta probintziako merkatari elkarteekin izan dugun elkarrizketetan jakinarazi digute, beraiek ere nahiago dutela 2015erako onartu zen proposamena, hau da, alde zaharra besterik izendatzen ez duena. Hau da, kale zehatz eta gutxi batzuetara eta uztaila eta abuztura mugatzen dena.

Horregatik, prentsaurreko honen bidez jakinarazi nahi dugu, aurkeztutako mozioaren bidez lortu nahi duguna: gaiaren gaineko eztabaida irekitzea eta ukitutako alde guztien iritzia aintzat hartzen duen prozesua abian jartzea 2017rako hartuko den erabiakiari begira.

Mozio hau maiatzaren 26an izango den plenoan eztabaidatuko da eta sindikatuok bertan izango gara.