Joan den asteartean CONFEBASKen aurka etxeko langileen lehen Hitzarmen Kolektiboaren negoziazioaren inguruan egindako epaiketaren ondoren, gaur izan dugu epaiaren berri. Auzitegiak ebatzi du, LABek eskatzen duen bezala, etxeko langileen kolektiboak eta sindikatu honek negoziazio kolektiborako eskubidea badutela. Aitzitik, bere ustez, eremu berezia denez, araudia egokitu behar da negoziazio-prozesuan legitimatuta dauden alderdiak zehazteko, eta, beraz, erantzukizuna botere legegileari dagokio.
LABen arlo juridikotik, epai hori aztertu eta harekin bat ez gatozenez, kasazioan Auzitegi Gorena eta dagokion gainerako instantzia judizialetara joko dugula aurreratu dezakegu; izan ere, uste dugu egungo legeria arrunta nahikoa dela etxeko langileen eremua arautzeko, eta legeak ez egokitzeak ezin du eragotzi negoziazio kolektiborako oinarrizko eskubideari bide ematea, nazioarteko legeriak babesten duen bezala.
LABek sektore honetako lan-baldintzak arautzearen eta hobetzearen alde egiten jarraitzen du, eta Euskal Herriko milaka etxeko langileri borrokan laguntzen jarraituko dugu. Sektore honetarako lehen hitzarmen kolektiboa lortzeko bide berriak aztertu eta baloratuko ditugu.
Era berean, ekintza sindikala bultzatzen eta agenda partekatzen jarraituko dugu, sektoreko elkarteekin, herri mugimenduekin, mugimendu feministarekin eta sindikatuekin.
Espainiako gobernua interpelatzen dugu, Errege Dekretuaren arautzean aldaketak eginez etxeko langileen lan- baldintzak honetzeko bere borondatea erakutsi baitzuen. Sektorearekiko erakutsi zuten borondate eta kezka bera beste lurralde batzuetan sektore honek zabaldutako borroken aldeko jarrera izatera eraman beharko litzateke. Azkenik, Eusko Jaurlaritzari eskatzen diogu langile kolektibo honekin inplikatu eta benetako konpromisoak har ditzala, kanpo injerentziarik gabe, etxeko langileen lan eskubideak hemen bertan erabaki eta arautzeko, besteak beste.