Gaude elkarteak aniztasun funtzionaleko pertsonekin egiten du lan, 150 langile ditu eta LABeko 9 ordezkarik osatzen dute bere enpresa-batzordea. Gaur, bi ordutako lanuztea egin dute langileek, 9:00etatik 11:00etara, hitzarmenik gabe 1.000 egun daramatzatela salatzeko. Egun historikoa izan da elkartean, dituen 40 urteetan langileek egin duten lehen lanuztea izan baita.
Orain arte, hitzarmen bakarra egon da Gauden, 2018an sinatua eta 2019an iraungi zenetik, berritu gabekoa. Langileek salatzen dute zuzendaritzak ez duela hitzarmena berritzeko konpromisorik erakutsi eta adierazi dute udalek eta Bizkaiko Foru Aldundia ere egoeraren erantzule direla, Gaudek erakunde hauentzat egiten duelako lan.
Langileek % 14ko eros ahalmena galdu dute urte hauetan eta aldarrikapen zehatzak dituzte. KPIari lotutako soldata igoera, kontratu finko gehiago (behin-behinekotasun tasa handia eta lege iruzurrean egindako kontratazioak daude elkartean), langile guztientzako prestakuntza, euskalduntze-prozesua, lan-segurtasuna hobetzea, soldata-eskala bikoitzak haustea eta hautaketa-prozesu argi, garden eta objektiboak izatea.
Salatzen dute egoera antzekoan daudela aniztasun funtzionalaren sektoreko beste erakunde batzuk, hala nola, Gorabide, FEKOOR, APNABI edo Madres Mercedarias. Erakundeek, udalek eta Bizkaiko Foru Aldundiak ez dute konpromiso argirik hartu egoera hauei konponbidea emateko eta zerbitzua nahiz sektorea prekarizatzen jarraitzeko hautua egin dute. Finantzaketa emateaz arduratzen dira, bai proiektuen bidez, bai diru publikoaren bidez, eta, ondoren, beste alde batera begiratzen dute sektorea eta sektoreko langileak prekarizatu eta lan eta bizi baldintzak kaskartzen dituztenean.