SEA patronalak Gasteizen eginiko Batzar Orokorraren aurrean elkarretaratzea egin dute LABeko kideek. Bertan adierazi duten moduan, arrakala soziala gero eta handiagoa da, eta langileon soldatek gero eta eros ahalmen txikiagoa dute. Egoera honetan eragin zuzena du patronalaren jarrerak.
Lan mundua dagoen bezala egonda, oraindik ere patronalak Madrilera begira jarraitzea onartezina da. Madrilgo eredua inportatzea ez da herri honek behar duen irtenbidea. Onartezina da CONFEBASKek soldata gaineko Madrilgo akordioa hona ekarri nahi izatea; bere asmoak gauzatzeko alfonbra gorria nahi du, baina LABek ez du hori inondik inora onartuko. Hori gutxi balitz, urrunago doa SEA, CONFEBASKen planteamendua motzegi geratzen zaio, gehiago nahi du.
LABek gaur, beste behin, Euskal Herriari begirako lan mundua aldarrikatzen du. Eta gure eremuari begiratu behar zaio proposamenak egiterakoan ere.
Negoziazio kolektiboan sinesten dugu eta bizi duen egoera desblokeatu nahi dugu. Gure erabaki sindikalekin prekarietateri aurre egitera goaz. Uste dugu hitzarmenak tresna baliagarriak direla prekarietateari aurre egiteko, baina horretarako benetako borondatea behar da, gaur gaurkoz SEAren aldetik ikusten ez duguna.
LABetik egoera desblokeatzeko proposamen orokor bat egingo dugu. Euskal esparrua sendotu eta lan mundua berrantolatzeko beharra aldarrikatzen dugu. Patronalari, SEAri, dei egiten diogu jarrera aldatu eta negoziazio kolektiboaren alde, hitzarmen duinen alde, urratsak ematen hasteko.