Larunbatean PuntuEus Fundazioak «.eus» domeinuaren aitzindarien zerrenda publiko egin zuen Bilbon. 92 dira aukeratutako talde eta erakundeak eta tartean LAB sindikatua dago. Hemendik aurrera LAB sindikatuaren webgune eta postak «labsindikatua.org» izatetik «lab.eus» izatera pasako dira. Hala ere, eta arazo teknikoak ekiditeko asmos, bi domeinuak batera martxan izango dira denbora tarte batean.
Internetek, kultura-aniztasuna mailarik gorenean kokatzen du eta, kultura-aniztasun horren baitan, gaur egun euskarak eta euskal kulturak Interneteko aterpe teknologiko propioa izan dezakete: .EUS domeinua, ‘Euskara eta Euskal Kulturaren Komunitatea’-ren [ EEKK ] Interneteko izena.
Ikur hori euskara eta euskal kultura sustatzeko tresna izango da eta, hori horrela, .EUS domeinua mundu mailako hizkuntza normalkuntzarako tresnatzat ulertzen dugu: .EUS domeinuak, Interneteko espazio birtualean, euskara beste hizkuntzen mailan kokatzen baitu. Are gehiago, .EUS domeinuak euskara lehen mailako hizkuntza bihurtzen du Interneten, mundu mailako aitorpena eskainiko baitio eta hura sustatzeko bitarteko eraginkor bihurtuko baita.
Era berean, .EUS domeinuak Internetek berezkoa duen aniztasuna sendotu, hedatu eta egiazkoagoa bilakatzen du, izan ere, hizkuntza eta kulturen komunitateek beren domeinu propioa izateak kultura-aniztasuna sarean ere kokatzen duelako. Biak ala biak, beraz, bai Interneteko Euskararen eta Euskal Kulturaren Komunitatea eta baita Internet tresna gisa ere, onuradunak dira hizkuntzari eta kulturari loturiko domeinuez ari garenean.
