Ekainaren 8an Gure Esku Dago dinamikak Durango eta Iruñea banatzen dituen 123 kilometroko giza-katea osatzea bilatzen du. Euskal Herriak erabakitzeko duen eskubidearen aldeko ekimen honi babesa emanez, gaur, 123 enpresa ezberdinetako ordezkari sindikalek (ELA, LAB, ESK, STEE-EILAS, HIRU eta EHNE sindikatuko kideak) euskal langileei bertan parte hartzeko deia luzatu die.
Ekainak 8: giza-katearekin gure konpromisoa
Gaur komunikabideen aurrean agertzeko bildu garen ordezkariok 123 enpresatako ordezkari sindikalak gara. Zergatik kopuru hori? 123 kilometro daudelako Iruñea eta Durango artean, Gure Esku Dago ekimenak datorren ekainaren 8an milaka pertsonak osatuko duten giza-kate baten bidez lotzeko aukeratu dituen hiriak. Horrela gure babesa adierazi nahi diegu Gure Esku Dago ekimenak finkatu dituen helburuei, baita antolatuko dituen ekitaldiei ere, batik bat aipatutako ekainaren 8ko giza-katea.
• Gure Esku Dago Euskal Herrian erabakitzeko eskubidearen aldeko dinamika bat da.
• Erabakitzeko eskubidea, eskubide demokratiko eta unibertsala da. Nazioarteko legedian jasota dago eta erabakitzeko eskubidearen alde egitea ekintza demokratiko bat da.
• Ekimenaren ezaugarriak aniztasuna, askotarikotasuna eta partehartzailea dira; bere aterpean egiten ari gara antolatu diren tokian tokiko taldeen jarduerak.
• Bere helburu nagusia euskal herritarren erabakitzeko eskubidearen alde herritarrak erakarri eta aktibatzea da. Uste osoa dugu erabakitzeko eskubideari dagokionez honelako dinamiken bidez egingo dugula aurrera.
• Jendartean dagoen aldarrikapen bati aukera bat eman nahi diolako eta bere zilegitasuna bultzatu, erabakitzeko eskubidea gauzatuz. Herritarrak martxan jarri nahi ditu, eta banakoak batu eta antolatuz egingo du aurrera. Horrela, erabakitzeko eskubidearen aldeko gehiengo sozial, sindikal, politiko eta instituzionalak lortzeko lana garatuko da.
• Jarrera integratzailez eta errespetuz lan egin nahi duelako, modu positiboan, erabakitzeko eskubidearen inguruan herritarrak batzeko helburuaz. Dinamikak bi oinarri ditu: aniztasuna eta dibertsitatea. Desberdinen arteko konplizitatea bilatzen du, ekintza komun eta eragingarriak egiteko agertoki egoki eta eroso batean.
• Dinamikaren hiru oinarrizko ideiekin bat gatozelako:
◦ Nazio bat gara
◦ Erabakitzeko eskubidea dugu
◦ Etorkizuna bertoko herritarren esku dago
Horregatik, ziur gaude milaka ordezkari sindikalen eta langileren sentipena islatzen dugula, gaur hemen bildu den ordezkaritza sinboliko honek dei egiten du ekainaren 8an Gure Esku Dago dinamikak antolatu duen ekitaldian parte hartzera.
Bilbon, 2014ko maiatzaren 20an
ELA – LAB – ESK – STEE/EILAS – HIRU – EHNE