Arabako 6 enpresa erreferentzialetako ordezkari eta langileekin batera, LAB sindikatuak mobilizazio eguna deitu du industrian datorren maiatzaren 30erako. "Arabako Industriaren defentsan. Enplegu duina!" lelopean bi hitzordu izango ditu egunak. Lehena goizean eta Eusko Jaurlaritzan amaituko den kotxe-karabana eta bigarrena, arratsaldeko 19:00etan SEAren aurrean burutuko den mobilizazioa.

LAB sindikatuak, ALESTIS, AERNNOVA, CEGASA, CONDESA, LAMINACIONES ARREGUI, eta SIDENOR GERDAU enpresetako ordekari eta langileekin batera, maiatzaren 30ean Arabako industriaren defentsan burutuko den mobilizazio egunaren berri eman dute prentsaurrekoan. Maiatzaren 30an izango da, eta helburuak hauek izango dira:

– Enpresa hauen egoera kalera ateratzea eta langileak mobilizatzea enplegu duinaren defentsan.
– Arabako ehun produktiboaren defentsa egiteko.
– Mobilizazio horretatik aurrera, enpresa bakoitzean enplegu, lan baldintzen eta ehun produktiboaren defentsan ekimen berriak proposatzea.

Agerraldian 6 enpresa hauek Arabako ehun produktiboan duten garrantzia azpimarratu da, eta era berean, zuzendaritzen gestio txarra dela eta, bankuen ehun produktiboa eta familiak ez finantziatzeko hartutako erabakia medio eta instituzioen pasibotasunaren erruz, pairatzen ari diren egoera oso kezkagarria dela salatu dute.

ALESTIS, AERNNOVA, CEGASA, CONDESA, LAMINACIONES ARREGUI, eta SIDENOR GERDAU enpresen egoera

ALESTIS: gero eta lan karga gutxiago daukate, proiektuak ez dituzte hona ekartzen, eta bitartean UGT eta CCOO enpresarekin negoziatzen dute Andaluzian, EREan egin bezala, lan baldintzak okertzea (jardunaldia luzatu, soldatak produktibitateari lotu, malgutasun gehiago,..) eta gero hemen aplikatu nahiko digute. Lantoki-arteko komitea osatu nahi dute hitzarmen orokor bat adosteko eta horrela hemengo langileon gainetik pasatu nahi dute.

AERNNOVA
: erabateko malgutasuna nahi dute. Hitzarmenaren negoziazioan lan jardunaldia herrialdekoa baino handiago izatea proposatu zuten, komiteak baztertu zuenean ERE bat eta lan baldintzen aldaraztearen bidez inposatu digute. 4 aldiz aldatu digute egutegia. Proiektuak atera dituzte eta orain berriro hitzarmena negoziatzean proiektuak agertzen eta desagertzen dira beraien interesen arabera.

CEGASA
: azken urteetako gestioa erabat kaxkarra izan da, erabaki okerrak hartuz eta zorra gero eta gehiago handituz. Horrekin batera, langileoi ez zaigu benetako informazioa helarazi, ezin izan dugu ezertan parte hartu eta orain konkurtsoan gaude, lanpostu asko eta asko galtzeko arriskuan.

CONDESA
: lehengai falta dago, nahiz eta enpresak iaz etekinak izan. Taldeak zorrak ditu bankuekin, Arcelor Mittalek arazoak jartzen ditu bobinak hornitzeko, eta horren aurrean zuzendaritzak suspentsio ERE bat planteatu zigun, gure langabezi prestazioaz beraien arazoak konpontzeko. Trukean, enplegu berme minimo bat eskatu dugunean ezezko borobila jaso dugu. Prozesu honetan zehar ez digute inolako informaziorik eskaini.

LAMINACIONES
 ARREGUI: 358 langileetatik 140 bat besterik ez dira gelditzen eta produkzioa orain arte ez da martxan jarri, taldeak hemengo lantokiak abandonatuta edukita. Orain, gatazkaren 2. urteurrenaren bezperan, kaleratze kolektibo bat abiatzeko beste prozedura baten berri jaso dugu.

SIDENOR
 GERDAU: laminadoko trena kendu nahi dute aurten eta hori lantoki honen arima izanda, baliteke hemendik 3-4-5 urtera ixtea. Gainera, orain taldeak Ascometal Frantziako enpresa erostekotan dabil eta horrek ondorioak eduki ditzake gurean.