Gaurko egunarekin, maiatzaren 20an, Uruguain Isiltasun Martxaren 25. urteurrena betetzen da, eta horregatik LAB sindikatutik gure elkartasun eta babes guztia Uruguain egia, memoria eta justizia aldarrikatzen duten eragile guztiei bidaltzen diegu, bereziki “Madres y Familiares de Uruguayos Detenidos Desaparecidos” taldeari eta PIT-CNT zentral sindikaleko kide guztiei.
Isiltasunaren Martxa urtero 1995etik hona, Maiatzaren 20an egiten den manifestazio publiko bat da. Bereziki Montevideon egiten da, baina baita ere Uruguai barrualdeko hirietan eta Uruguai-ko mugetatik kanpo ere. Aukeratutako datak Frente Amplioko senatari Zelmar Michelini eta Partido Nacionaleko Héctor Gutierrez diputatuaren eta Rosario Barredo eta William Whitelaw-en heriotzak omentzen ditu.
Madres y Familiares de Uruguayos Detenidos Desaparecidos taldeak giza eskubideen defentsan lan egiten duten beste eragileekin batera antolatzen den martxa bat da, eta bere helburua gizarte zibila mobilizatzea da, mobilizazioaren bitartez Plan Condorraren testuinguruan Uruguai-n eta Hego Amerika osoan egon ziren desagerpen eta erailketa guztiak argitzeko beharrezkoa den presio soziala sortzea da.
Euskal Herrian ongi baino hobeto dakigu egia eta justizian oinarrituko den memoria baten aldeko borroka zer den. 1936Ko altxamendu faxistaren ondorioz Euskal Herrian eraildako 23.000 pertsonek, errekonozimendua, egia, justizia eta erreparazioa borrokatzen dihardute oraindik-orain. Azken 50. urtetako gatazka armatuak ere zama handia utzi du Euskal Herria bezalako herri txiki batentzat. Herri bezala gaur egun daukagun erronka handienetako bat garaile eta galtzaile terminoetan idatzita ez dagoen kontakizun eta memoria idaztea da; pertsona guztientzat justizia, erreparazioa, eta ez errepikatzeko bermeak bilatuko dituen memoria bat hain zuzen ere.