Garraiolari bat bere kamioia gidatzen ari zela hil da goizean Santurtzin, Bizkaian. Aurten Euskal Herrian gertaturiko lehenengo lan-heriotza da, eta LAB sindikatuak nabarmendu du garraioaren sektorean hilkortasun tasa oso altua dela. 2023an 10 garraiolari hil ziren lanean ari zirela.
Istripuaren nondik norakoak ikusirik (kamioiak su hartu du bazter babesa jo ostean), ezin da baztertu garraiolariei bereziki eragiten dien heriotza ez traumatikoa tartean egotea eta honek eragin izana jarraian gertatu den istripua. Modu batera edo bestera, sektoreko baldintza gero eta gogorragoak lan arrisku bilakatu dira eta horren eragina datuetan islatzen da. 2023ak 10 garraiolari hildako utzi zituen, 2022ak 9.
Oso prekarioak dira garraioaren sektoreko lan-baldintzak: lanaldi luzeak, estresa, presioak, garraioagatik ordaintzen duten prezio baxua, bizitza eta elikadura osasuntsua izateko zailtasunak, eta abar. Baina LABen argi diogu garraioaren sektorean gertatzen diren lan-istripu gehienak guztiz saihets daitezkeela, eta horretarako borondate politikoa baino ez dela behar, baita erakunde publiko eta enpresa guztien inplikazioa ere, garraiolarien lan-eskubideak bermatzeko eta errespetatzeko neurriak hartzeko.
Prekarietatearekin amaitu behar da. Patronalaren inpunitatearekin amaitu behar da. Erakundeek ezin dute beste aldera begiratzen jarraitu, bestela gertatutakoaren eta gertatuko denaren konplize izango dira. Lan istripu gehiagorik ez, ez garraioaren sektorean, ez beste inon.