LABeko idazkari nagusi Garbiñe Aranburuk eta sindikatuko Komunikazio arduradun Maider Jauregik agerraldia egin dute urtarrilaren 30eko Greba Orokorrari begira egiten ari garen lanketaren harira. Hain zuzen ere, parte hartzea eta jasotako atxikimendu kopurua handia eta anitza izaten ari dela azaldu dugu. “Langile klasearen batasuna berrosatzen ari da”, nabarmendu du Garbiñe Aranburuk.
“Gero eta gehiago gara borrokaren balioan sinesten dugunak”. Halaxe adierazi du Garbiñe Aranburuk, urtarrilaren 30eko Greba Orokorrak jasotako babesa dela eta. 170 greba batzorde sortu dira, beste greba deialdietan baino gehiago, eta 1.200 enpresak baino gehiagok eman diote atxikimendua grebari (esanguratsuenak, hemen). Zerrenda luzea da; arlo publiko zein pribatu, hezkuntza, garraioa, industria, sektore feminizatuak… arlo desberdinetako enpresak daude atxikimenduen artean.
Garbiñe Aranbururen hitzetan, “bederatzi egun falta dira grebarako, eta baldintzak daude are eta jende gehiago batzeko oraindik”. LABeko idazkari nagusiak gogora ekarri du greba ez datorrela egun batetik bestera, “mobilizazio sozial indartsu baten ondoren dator, bizitza duinagoa posible egingo duen ereduaren defentsan egindakoa. Kolektibotasunean, langileen batasunean sinesten dugu. Balio honetan egin dugu bat”.
Greba Orokorra indargabetzeko saiakerak ere salatu ditu, patronala eta hainbat alderdi politiko eta sindikaturen aldetik, “kapitalaren interesak defendatzen dituztenen aldetik”. Hauek erakutsitako “urduritasuna eta ezinegona” bide egokian gaudenaren seinale direla berretsi du.