Mobilizazioa egin dugu Bilbon ELA eta ESK sindikatuekin batera, CEBEK patronalaren aurrean, eta 5 greba egun iragarri ditugu Bizkaiko garbiketan, nagusiki emakumeek osatutako sektore honetan 1.200 eurotako 15 paga jasoko dituen hitzarmena lortzeko helburuarekin. Apirilaren 26 eta 27an eta maiatzaren, 10, 11 eta 12rako deitu ditugu grebak.
Hilabeteak dira sektorea mobilizatzen ari dela, negoziazio mahaian patronalak ez duelako inolako proposamenik egiten. Martxoaren 31n greba egun arrakastatsua izan zuten, LAB, ELA eta ESK sindikatuon deialdiari jarraituz eta Gora Garbitzaileak kolektiboak hainbat ekintza egin ditu, azken atzo bertan, FCC enpresa negoziazioan dagoen blokeoaren erantzule moduan seinalatuz.
Bizkaiko langileen urteko soldatak ez dira 16.000 eurotara iristen eta askok eta askok lanaldi partzialekin dihardute. Soldata arrakala agerikoa da. Patronalak, ordea, ez du proposamenik egiten, eta inflazioak langileak are gehiago estutu arren, soldatak izoztuta jarraitzen dute; pandemian garbiketa funtsezkoa dela begi bistan geratu arren.
Grebak eragina izango du Bizkaiko garbketa hitzarmena aplikatzen den lan zentroetan.