2024-09-20
HomeUncategorizedLABek instituzioei dei egiten die negoziaziorako euskal esparrua gauzatzeko estrategia bat definitu...

LABek instituzioei dei egiten die negoziaziorako euskal esparrua gauzatzeko estrategia bat definitu dezaten

Gure zerbitzu publikoak eta lan harremanak definitzeko Espainiar Estatuak zer inposatuko begiratu baino, euskal negoziazio esparrua errealitate bilakaraziko duen estrategia abian jar dezaten interpelatu nahi ditu LABek hemengo instituzioak.

Espainiar Estatuko Funtzio Publikoko atzoko mahaian Montoro ministroak ELA, CCOO eta UGT sindikatuei (LABek, gure esparruari inposatutako negoziazio markoa izanik, ez du mahai horretan parte hartzen) zerbitzu publikoetako langileei bosgarren urtez soldatak izoztuko zaizkiela jakinarazi zien.

LABek, aitzitik, ohartarazi nahi du arazoa hori baino askozaz larriagoa dela, arazoa da Espainiar Gobernuaren inposizioz enplegatu publikoen lan baldintzetan soldatak izoztuko egongo direla, baina baita lanaldia handituta eta beraz lanpostu publikoen galerak ere jarraituko duela. Eta arazoa da aurten LOMCEaren inposizioz gure eskola umeei curriculum arrotza ezarriko zaiela. Eta arazoa da inposizioz ere errolda zibilak pribatizatuko direla. Eta arazoa da Arartekoa edo Euskalmet bezalako erakundeak Espainiar Gobernuaren inposizioz kolokan egon daitezkeela. Arazoa beraz, marko juridiko politiko honetan, zerbitzu publikoen eremuan erabakitzeko eskubidea Espainiar Gobernuari dagokiola, eta guri inposizioa jasatea baino ez dagokigula.

Baina LABen ustez arazorik potoloena bertoko instituzioen jarreran dago: bai Nafar Gobernuak baita atzo bertan ere Urkulluri entzun ahal izan genionez Jaurlaritzak ere, bat egiten baitute euskal herritarron borondatearen gainetik Espainiar Gobernuaren inposizioa instituzionalizatzen duen egungo esparru juridiko politikoarekin.

Beraz, gure zerbitzu publikoak zein gure lan baldintzak berton erabaki ahal izatea aldarrikatzen duen sindikatua garenez gero, Espainiar Estatuak zer egingo begiratu baino hemengo instituzioei begira jartzen gara. Hala, Iruñea zein Gasteizko Gobernuei gure zerbitzu publikoak zein gure lan baldintzak zein diren gure esparruan erabaki ahal izan ditzagun estrategia bat martxan jarri dezatela exijitzen diegu. Zalantzarik gabe, zerbitzu publikoetako lan harremanen esparruaz ari garelarik, estrategia hori gure esparru guztietan inolako kanpo injerentziarik gabe negoziazioei bide ematetik, eta Enplegu Publikoaren Lege Propioak egitean negoziaziorako eskubidea aitortzetik pasatzen da lehen lehenik.

Interpelazio hori berori egin nahi diegu atzokoan euskal esparrutik Espainiar Gobernuko Funtzio Publikoko mahai horretara joan ziren sindikatuei ere, esparru horrek ordezkatzen duen inposizioari bizkar eman eta euskal negoziazio esparrua egikaritzeko estrategiarekin bat egin dezaten.
 

 

 

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.