"Sindikalismoa [Bir]Pentsatzen" prozesuaren bigarren urratsari ekin diogu. Gure programa sozioekonomikoa osatuko duten adar ezberdinen bueltan hasi gara gogoetatzen. Hala, Oreretan saioa egin dugu gaur, zaintzaren gaia lantzeko.
Testuinguru ekonomiko, sozial eta politikoa etengabeko aldaketan dago. Beraz, langileen eskubideen eta bizi baldintzen defentsa oinarri izanik, eta iparra Euskal Herria askearen xedean ezarrita, gure burua eraberritzen ari gara. Gogoeta hori “Sindikalismoa [Bir]Pentsatzen” prozesuaren barnean egiten hasi ginen duela urte batzuk. Hainbat aldaketa egin ditugu gure ekintza sozio-sindikalean eta antolatzeko moduan, 2017ko Biltzar Nagusian finkatu zirenak.
Orain, prozesu horrek bigarren urrats bat egingo du. Sindikalismoak gure herrian eredu sozio-ekonomiko berriaren alde jokatu behar duen papera eta egin behar dituen proposamenak eztabaidatzeko xedearekin prozesu oso bati hasiera eman genion maiatzaren 16an Ordizian egin genuen mintegian. Bigarren urrats batean, gure programa sozioekonomikoa osatuko duten adar ezberdinen bueltan arituko gara gogoetatzen. Horretarako saio ezberdinak antolatu ditugu, eta horietako lehena gaur egiun dugu Oreretan, zaintza lanen inguruan. Azaroak 26an, berriz, lurra izango dugu hizpide; azaroaren 28an, ezagutza; abenduaren 10ean, industria; eta amaitzeko, abenduaren 12an, zerbitzuen atalari helduko zaio txanda.
