Trapagako Melesur enpresako langile bat hil da Basurton, tensio handiko dorre batean lanean ari zela. Hau da 2021an izandako lehen istripu hilgarria. 2020an, gutxienez, 72 langile hil ziren lanean eta Joaquin Beltranek desagertua jarraitzen du, otsailaren 6tik, Zaldibarko zabortegian.
LABetik gure babes eta elkartasun zintzoena erakutsi nahi diegu hildakoen senitarteko eta gertukoei. Istripu hilgarria ikertu dezatela eta arduradunak seinalatu eta erantzunkizunak argitzea exigitzen dugu. Istripu hilgarriek erakusten dute lan prekarietatearen aurpegi bortitzena. Istripuak enplegu eta lan baldintza kaxkarrak eta egiazko prebentzio eta babes neurri ezaren ondorio zuzena dira. Larriena da horren guztien atzean dagoen zio bakarra enpresen diru gosea dela. Lan kosteak murrizten dira irabaziak mantentzeko, prekarietatea areagotuz eta prebentzio neurrien kalterako.
Instituzioei eta Gobernuei beste aldera begiratzeari uzteko eta behingoz lan osasun politikak errotik aldatzeko exigitzen diegu. Laneko biolentziarekin amaitzeko bizi eta lan duinak behar ditugu, lanetik onik eta bizirik bueltatzeko eskubidea dugulako. Eredu berri bat gauzatu behar dugu, langileon bizitza eta osasuna lehenetsiko duena.
LABen lanean eta borrokan jarraituko dugu langileon eskubideen, segurtasunaren eta osasunaren alde. Dei egiten diogu langile klaseari istripua salatzeko antolatuko diren mobilizazioetan parte hartzera.