2024-03-05
HomeEkintza SozialaEskubide Sozialen KartaUrriaren 5ean “Euskal Herriko Mugimendu Sozial eta Sindikalen III Asanblada Nazionala” izango...

Urriaren 5ean “Euskal Herriko Mugimendu Sozial eta Sindikalen III Asanblada Nazionala” izango da Donostian

III. Asanblada Nazionalaren helburu nagusia Euskal Herriko Eskubide Sozialen Gutunaren zirriborroa onartzea da eta helburu honekin Euskal Herriko Eskubide Sozialen Kartako kideok dei egiten diegu prozesu honetan interesa duten antolakunde sozial guztiei datorren urriaren 5eko Asanbladan parte hartzera. 

Gogoratu beharra dago prozesu hau duela hainbat hilabete hasi zela. Euskal Herriko mugimendu sozial eta sindikaleko hainbat taldek erabaki zuen aurre egin behar zitzaiola gure herrian pairatzen ari garen inposizioari, eskubide sozialak galtzeko zorian jartzen baikaitu, eta egoera errotik aldatu beharrekoa zela: langabezia, etxe-kaleratzeak, erreforma laborala, osasunerako eskubidea zalantzan jartzea, prestazio sozialen murrizketa…

Ekimen honen oinarrian konbikzio indartsu bat dago: gauzak bestela egin daitezke, egin behar dira, eta ezinbestekoa da ekintza politiko-instituzionalaren lehentasunak aldatzea: Garrantzia handiagoa eman behar zaie pertsonei eta hauen interesei, merkatuari baino, eta lanari, kapitalaren interesei baino.

Oinarri hauek finkatuta, eta ardura hori hartuta, prozesuari joan den maiatzaren 25ean ekin zitzaion Eibarren. Han eratu zen Euskal Herriko Mugimendu Sozial eta Sindikalen Asanblada Nazionala, bere ardatza “Euskal Herriko Eskubide Sozialen Gutun” bat egiteko urgentzia eta beharra zelarik.

Gutunak bi helburu ditu: gure ekonomia eta baliabideak euskal herritarren zerbitzura jartzea, eta berton bizi diren pertsona orok bizimodu duina izateko aukera bermatzea, oinarrizko eskubide sozialak aitortu eta gauzatuaz.

Gutunaren zirriborroa idazteko Asanblada berak Talde Sustatzaile bat izendatu zuen, parte hartzen duten antolakundeetako hamalau pertsonekin.

Zirriborroa amaituta, urriaren 5eko Asanblada aurkeztuko da, onartze aldera. Gero eztabaida prozesu zabal eta ireki bat hasiko da, lurralde mailan (herri eta eskualdeetan) zein maila sektorialean. Eztabaida parte hartze eta inplikazio pertsonal, sozial eta sindikalean oinarrituko da, eta hortik aterako da behin betiko Gutun Sozialaren idatzia, zeinaren mamia Euskal Herrian bizi garen guztion gehiengoaren sentipenak eta interesak izango baitira.

Gure asmoa da eztabaida prozesu honen buruan herri-harresi bat eraikitzea, botere ekonomikoak gehiengo sozialari egiten dizkion erasoak geldiarazteko, eta Gutun Sozial hau tresna bihurtzea, batetik exijitzen dugun alternatibaren inguruan indarrak biltzeko, eta bestetik, herri honetako borroka gaitasuna bateratzeko, Euskal Herrian benetako aldaketa sozial eta politikoa iristeraino.

Helburu hauekin dei egiten diegu prozesu honetan interesa duten antolakunde sozial guztiei datorren urriaren 5eko Asanbladan parte hartzera.
 

LAB sarean
{module[111]}

       

AZKEN ALBISTEAK | ÚLTIMAS NOTICIAS

LABek Munduko Federazio Sindikalak Sao Paulon egindako Kontseilu Presidentzialean parte hartu du

Pasa den asteburuan Munduko Federazio Sindikalaren Kontseilu Presidentziala egin zen San Paolon, Brasilen. Munduko Federazio Sindikala 1945 urtean sortutako elkartea da. 133 herrialdetako 105 milioi langile inguru ordezkatzen ditu. Kontseilu Presidentziala bere zuzendaritza gune nagusia da, kontinente desberdinetako 50 kidek osatutakoa.

Lan eta bizi baldintzak ez dira hobetzen eta prekaritateak egiturazkoa izaten jarraitzen du

Araba, Nafarroa, Gipuzkoa eta Bizkaian 141.582 langabe daude; beraz, pasa den urtetik %2,13a jaitsi da langabezia Hego Euskal Herrian. Enplegua, ordea, sektore prekarioetan sortzen ari da, lan baldintza prekarioekin eta egoera zaurgarrian dauden herritarren bizitzetan inpaktu zuzenagoa eraginez. Hego Euskal Herrian, 25 eta 64 urte arteko bi herritarretik bat prekaritate egoeran bizi da, enplegua izan arren, bizitza duina bermatzeko diru-sarrera nahikorik gabe.

San Juan de Dios ospitaleko langileek elkarretaratzea egin dute Iruñean, hitzarmenaren negoziazioa blokeatuta dagoela salatzeko

San Juan De Dios Ospitaleko enpresa batzordeak elkarretaratzea egin du Iruñean, Osasunbidearen egoitzaren parean, Oliveto kondearen kalean. 2023-2024 hitzarmen kolektiboaren negoziazioaren egoeraren berri eman dute. 2023ko abenduan, Grupo Independiente eta LABek osatutako enpresa-batzordeak, negoziazio-plataforma aurkeztu zuen, eta abenduaren 15ean mahaia eratu zen, urtarriletik aurrera negoziazioari ekiteko.