Osakidetzaren demokratizazioak Mahai Sektorialaren blokeoa gainditu eta langileen ordezkariekin benetako negoziazioa eta edukiak bultzatzea eskatzen du.
LAB, SATSE, ELA, SME, CCOO eta UGT sindikatuok, Osasuneko Mahai Sektorialeko kideek, urteak daramatzagu salatzen Osakidetzak Mahai Sektorialean ez duela negoziatzen, Osakidetzak nahi duena eta nahi duenean bakarrik tratatzen dela.
Egoera horrek, hobera egin beharrean, okerrera egin du, eta erabateko blokeora eraman gaitu. Eta hori guztia gure osasun publikoaren narriadura ukaezina den une batean, bai profesionalentzat, bai herritarrentzat.
Urte hasieran, sindikatuok Mahai Sektorialetik altxatu ginen, eta uda ondoren, egoerak berdin jarraitu du. Egoera desblokeatzeko asmoz, Osakidetzako Zuzendaritza bi aldiz deitu dugu LHKren bilera batera, baina ez da bertaratu. Joan den abenduaren 7an, sailburuarekin bildu ginen, eta berriro ere konpromisoak hartzeko eta egoera bideratzeko borondatea hutsaren hurrengoa da, eta inposaketaren bidearen aldeko apustua egin zen. Langileak eta herritarrak nazkatuta daude, eta premiazko konponbideak behar ditugu, gure osasun publikoaren narriadurak eragindako egiturazko arazo larriei aurre egiteko, urteak baitaramatzate salatzen. Horregatik, mobilizaziora deitzen zaituztegu, guztion artean hori lortzeko.
Zalantzarik gabe, barne-demokrazia beharrezkoa da, Osakidetzan bertikaltasuna eta inposizioa ezabatzea. Mahai Sektorialeko sindikatuok azpimarratu nahi dugu Osakidetzaren demokratizazioak Mahai sektorialaren blokeoa gainditu eta langileen legezko ordezkariekin benetako negoziazioa eta edukiak bultzatzea eskatzen duela. Eusko Jaurlaritzak Osakidetzan 100 profesional baino gehiagori irekitako prozesu parte-hartzailea bultzatzeaz hitz egiten du. Gogorarazten dizuegu Osakidetzan 37.000 langile baino gehiago garela, eta, beraz, benetako parte-hartzea sustatu nahi duen edozein prozesuk askoz ere kopuru handiagoa izan behar duela, kategoria guztiak, lurralde guztiak eta estamentu guztiak ordezkatzen dituena.
Bien bitartean, lan-prekarietateak gure osasun publikoaren arazo handienetako bat izaten jarraitzen du: behin-behinekotasun-tasa %50etik gorakoa da, erosteko ahalmenaren galera %20tik gorakoa da hamarkada batean, lanaren gainkarga sistematikoa da, langile gutxi daude, etab. Aldi berean, murrizketak mantentzen dira, hala nola Deustuko, Zumarragako edo San Martingo EAGetan, Santiago Ospitaleko larrialdietan eta Basurtuko bihotzeko kirurgia ixteko proiektuan. Eta murrizketa berriak planteatzen dira Lehen Mailako Arretan udako Gabonetarako, baita lan-baldintzetan ere, hala nola Lanbide Garapenean aplikatu nahi den murrizketa erradikal eta justifikaziorik gabea. Osakidetzako kategoria guztietako eta hiru lurraldeetako arazoen aurrean gaude.
Transfusioen Euskal Zentroko langileak greban daude, Osakidetzarekin duten haserrea azaleratzeko
Abenduaren 20, 21 22 eta 23an greba egunak izaten ari dira Transfusio eta Giza Ehunen Euskal Zentroko langileak. Diskriminazioa jasaten dute, eta Euskal Osasun Zerbitzuak ez du kontua konpondu nahi.