EAEko sektore publikoko kideek greba egingo dute urriaren 25ean eta abenduaren 19an. Horren aurrean, pribatizatutako zaintza sektoreetatik gure elkartasun osoa helarazi nahi diegu. Izan ere, guk greba horietan subjektu aktibo izan beharko genuke, lan publikoa egiten dugula zalantzarik ez dugulako, baina instituzioek langile publiko bezala ukatzen gaituzte, enpresa pribatuek, oinarrizko zerbitzua horiei esker, etekin ekonomikoz poltsikoak puzten dituzten bitartean.
Sektore publikoko bi greba egun hauek zaintza sistema publiko eta komunitario baten aldeko greba feminista orokor baten atarian izango dira, eta, testuinguru horretan, LAB sindikatuak berriro ere pribatizazioarekin bukatzea ezinbestekoa dela adierazten du. Bada garaia beharrezkoak diren neurri zein erabaki politikoak hartzeko, enpresa pribatuen negozioarekin amaitzeko eta enpresa horiek gure gorputz, bizitza eta zaintzen arduratik kanpo gera daitezen. Horretarako, zerbitzu publikoak indartu behar dira. Zerbitzu publikoan oinarrituko den zaintza sare integrala behar dugu; zaintza lanak eremu publikotik bermatuak izan behar dute eta instituzioen kudeaketa zuzenean oinarrituak. Pribatizatutako zerbitzuak publifikatzea eta pribatizazio berriei ateak ixtea exijitzen dugu.
EAJk gu bigarren mailako langiletzat hartzen eman ditu urteak, gure lan baldintzak prekarizatuz, gure lan kargak handituz, gure osasuna kaltetzea erabakiz eta langileon biziraupena eta zerbitzuaren kalitatea aberats gutxi batzuen eskutan utziz. EAJren erabaki politiko horiek langile borrokan subjektu aktibo bilakatu gaitu, eta, gaur, pribatizatutako zaintza zerbitzuetako langileok zaintza zerbitzu sozialean erakundeen kudeaketa zuzena eskatzen dugu, argi dugulako hori ez egitea hautu politiko bat dela. EAJren esku dago enpresen esku hartzea zaintza zerbitzuetatik kanpo uztea. Ozen diogu zaintza lanak ezin direla pribatizatu eta publifikazioaren aldeko borroka gauzatuko dugula, zerbitzuen degradazioari eta okertzeari aurre egiteko.
Publifikazioa defendatzeak eta aldarrikatzeak pribatizatutako zaintza langileak publikoak garela aitortzea dakar ezinbestean. Zerbitzu publiko bateko langileak gara. Zaintza zerbitzu publikoa, unibertsala, doakoa eta kalitatezkoa aldarrikatzen dugu eta horrek beharrezkoa duen lan baldintzen duintzea eta hobetzea exijitzen dugu.
Gaur, LAB sindikatuan antolatuta gauden pribatizatutako zaintza sektoreetako langileok, sektore publikoko kideei elkartasun osoa helarazteaz gain, hiriburuetako kaleak beraiekin batera betetzera goazela adierazi nahi dugu. Zerbitzu publikoak indartu eta defendatu behar ditugulako. Denok elkarrekin, segi aurrera!