LAB sindikatuak Nafarroako zahar egoitzetako patronalari eta Gobernuari benetako inplikazioa eta borondatea eskatu die sektoreko lehen hitzarmenaren negoziazioek aurrera egin dezaten. LABek salatu du patronalak ez zuela ekainean bere hitza bete, ez baitzuen negoziazio mahaira bere proposamenik eraman, eta ordutik ez duela batere mugimendurik egin.
Ikasturte berrian, zaharrak berri; Nafarroako zahar egoitzetako patronalak, oraingoz, inmobilismo bera erakusten baitu! Iragan ekainean patronalak ez zuen bere hitza bete, ez baitzuen negoziatzeko proposamenik ekarri, udako hilabeteetan zegoen ziurgabetasun politikoa dela-eta ezer proposatzea oso zaila zela argudiatuz. Baina konpromisoa hartu zuten Nafarroako Gobernua eratu ondoren negoziazio-mahaiari berriz deitzeko. Bada, Gobernua abuztuan osatu zen, eta oraindik ez dute deitu.
Jokabide hark interes falta erakutsi zuen, bai patronalaren aldetik, bai Nafarroako Gobernuaren aldetik, zaintza-zerbitzu publiko bat betetzen ari diren langile batzuen gatazkari irtenbidea emateko; badirudi botere ekonomiko eta politikoek ez dutela honetan batere interesik.
Ekainaren bukaerako bilera LAB sindikatuaren ekimenari esker lortu zen, hainbat mugimendu egin baitzituen, erakundeetan zein kalean, jada bi urte martxan zeramatzan ukapena eta borroka berriz aktibatzeko. Hartara, LAB sindikatuak berriz deitu zuen negoziazio-mahaia, horrek egoera desblokeatuko zuelakoan.
LABek negoziazioari bizitasuna ematen jarraitu nahi du. Horregatik, Nafarroako Gobernuari eta patronalari benetako inplikazioa eta borondatea eskatzen dizkiegu, sektorearen lan eta bizi baldintzak kualitatiboki hobetzeko. Aurten Nafarroako zahar egoitzen lehen hitzarmen kolektiboa sinatzea exijitzen dugu, eta behingoz negoziazio-esparru propioa errealitate bihurtzea. Nafarroako Gobernuari eta patronalari exijitzen diegu hitzarmen duin bat ahalbidetzeko, hau da, KPIari lotutako soldatekin, aldi baterako ezintasunen osagarriekin, eta deskuelgerik gabe.
Horretarako, mobilizazioetan ahalegintzea eskatzen diegu sektoreko langileei, ezer ez baita lortzen kalean presioa egin gabe. Sektoreko langileei dei egiten diegu LABekin antola daitezen, gure lan eta bizi baldintzak hobetzearen alde mobilizatzeko.