Gaur izan da Bizkaiko Grafikagintzako hitzarmenaren negoziazio-mahaiaren laugarren bilera. Azken bileran, uztailaren 27an, patronalak bere plataforma aurkeztu zuen. Plataforma horrek, hitzarmenik gabeko urteetarako soldaten eguneraketarik ez jasotzeaz gain eta proposatutako igoeretan erosahalmena ez bermatzeaz gain, alderdi atzerakoiak baino ez zituen biltzen.
Gaur beste inposaketa bat ekarri du negoziazio mahaira: sindikatuok CEBEKi interesatzen zaizkion gaiei buruz hitz egiteko prest egongo ez bagina, negoziazioak ez lukeela aurrera egingo. Gai horietako bat malgutasuna da. Patronalak hitzarmen berrian malgutasuna % 10etik gora aplikatzea jaso dadin nahi du, hau da, Langileen Estatutuak ezartzen duenaren gainetik.
Horren aurrean, LABek, gainerako sindikatuek bezala, negoziazio honetan patronalak duen jarrera salatu du, eta argi utzi dugu ez dugula planteamendu atzerakoirik onartuko. Halaber, hurrengo bileran LABen plataforma osoari erantzuteko eskatu diogu patronalari, orain arte ez baitu halakorik egin.
Tamalgarria da CEBEKek jarrera hori izatea hitzarmena 12 urtez eguneratzeke daukan sektore baten aurrean, horrek dakarren guztiarekin. Urte hauetan asko izan dira erreformak eta lan-arloko lege-aldaketak, eta grafikagintzakoek uste dute beren lan-baldintzak gero eta urrunago daudela sektorearen errealitatetik, eta horrek langileen prekarizazioa eta pobretzea dakarrela. Errealitate horren aurrean, patronalak erakusten du sektorea sostengatzen duten pertsonen lan- eta bizi-baldintzek bost axola diotela.
Urriaren 4an beste bilera bat deitu dugu, eta LABetik berriro esan nahi dugu patronalak bere asmoei eusten badie, argi dugula gure estrategia zein izango den: negoziazioa, aktibazioa eta mobilizazioa.
Bizkaiko grafikagintzako patronalaren helburu bakarra negoziazioa blokeatzea dela salatu dugu
