LAB eta ELA sindikatuok eskatu dugu bi gobernuen ‘argipen oharrak’ (oinarrizkoak ez diren zerbitzuak eskaintzea ahalbidetzen dutenak) 24 orduko epean eten daitezela, kautelazko neurri gisa. Salaketak EAEko Justizia Auzitegi Nagusian eta Nafarroako gizarte gaien Auzitegian jarri ditugu.
LAB eta ELA sindikatuok salaketa bat jarri dugu oinarrizko eskubideen tutela oinarri (osasuna, bizia eta integritate fisikoaren eskubidea), Eusko Jaurlaritzaren (Ekonomia Garapena eta Azpiegiturak Departamentua) eta Nafarroako Gobernuaren aurka. Hain zuzen ere, sindikatuok iritzi dugu bi gobernuek martxoaren 31n argitaratutako ‘argipen oharrekin’ lantokietara joatera behartuta dauden langileen osasuna eta bizia arriskuan jarri dituztela, oinarrizkoak ez diren jarduerak egiteko. Salaketak EAEko Justizia Auzitegi Nagusian eta Nafarroako gizarte gaien Auzitegian jarri ditugu.
Bi gobernuek muturreraino malgutu dute oinarrizko zerbitzuaren kontzeptua, Errege Dekretua urratuz (oinarrizkoak ez diren jardueren etena) eta oinarrizkoak ez diren beste industria zerbitzu eta jarduerak eskaintzea bideratuz (langileak euren lanpostuan kutsatzeko arriskuan jarriz eta pertsona hauek besteak kutsatzea ahalbidetuz), modu honetan alarma egoeraren printzipio nagusiak hankaz gora utzita: “Herritarren osasuna eta segurtasuna bermatu, gaixotasunaren garapenari aurre egin eta osasun sistema publikoa indartu”.
Honela gauzak, LAB eta ELA sindikatuok honakoa exijitzen dugu salaketan:
[1] Ebatzi dadila Eusko Jaurlaritzak eta Nafarroako Gobernuak EAEko eta Nafarroako industria sektoreko langileen osasuna, bizia eta integritate fisikoaren eskubidea urratu dutela.
2] Ebatzi dadila gobernuen ‘argipen oharrak’ baliogabeak direla, legez.
[3] Zigor daitezela bi gobernuak sententzia honen edukia argitaratzera, ‘argipen oharrak’ argitaratu zituzten hedabide berdinen bitartez.
[4] ‘Bi argipen oharrak’ eten daitezela kautelazko neurri gisa, 24 orduko epean.