2024-05-30
HomeUncategorized"Hezkuntza sailak entzungor egin die gure aldarrikapenei"

“Hezkuntza sailak entzungor egin die gure aldarrikapenei”

LAB, ELA eta STEILAS sindikatuok elkarretaratze bat egin dugu gaur Lakuan, “Haurreskolak Partzuergoa, Heziketa Berezia, Irakasleak, Sukaldari eta Garbitzaileak benetako negoziazio bidean borrokan” leloarekin. Martxoaren 22an burututako grebaren jarraipen arrakastatsuak bultzatuta bertaratu ginen iragan maiatzaren 4ko irakasleen mahai sektorialera, baina Hezkuntza Sailak ez zituen gure aldarrikapenak kontutan hartui. Gaurko protestan, bilera hartako irakurketa plazaratzeaz gain, maiatzaren 16, 20 eta 23rako iragarritako greba eta mobilizazioekin bat egiteko deia luzatu dugu berriro, "iragarritako bidearekin jarraitzeko aukera besterik ez baitigu uzten gobernuak".

Hauxe da sindikatuok gaur egin dugun irakurketa:

Martxoaren 22an burututako grebaren jarraipen arrakastatsuak bultzatuta bertaratu ginen iragan maiatzaren 4ko irakasleen mahai sektorialera. Bertan, Hezkuntza Sailarekin gaur egungo egoeraren inguruan egiten dugun hausnarketa partekatzeko aukera eduki genuen; eta horrela, gure aldarrikapenak plazaratu genizkion, hauen inguruan behar bezalako negoziazio serio bat garatzeko asmoarekin.

Mahai gaineratu genizkion aldarrikapenak honakoak izan ziren:

-Hezkuntza inbertsioa handitzea (gutxienez Europar Batasuneko bataz-bestekoa, progresiboki %6ra iritsiz).

-Plantilak gutxienez 2.000 langiletan handitzeko beharra.

-Bataz-besteko ia %40ko behin-behinekotasuna (%38 irakasleetan, %41 Haurreskoletan, %58 Heziketa Berezian eta %63 Sukalde eta Garbiketan), %6ra murrizteko premia. Horretarako 6.000tik gora lanpostu egonkortuz kolektibo ezberdinetan.

-Ikasle-ratioak %10 murriztea.

-Hezkuntzako langileen eroste ahalmena berreskuratzea.

-Ordezkapenak lehen egunetik egitea.

-Bajak lehen egunetik bere osotasunean ordaintzea.

-Erretiroa erraztu eta laguntzeko neurriak berreskuratzea.

-LOMCE Euskal Herriko gure ikastetxeetatik ateratzea eta honen moldaketa hutsa den Heziberri bertan behera uztea.

-Hezkuntzaren merkantilizazioa alde batera uztea, egungo desorekak gaindituz hezkuntza garapen pertsonal eta sozial integralerako tresna izan dadin (kohesio soziala, integrazioa, aniztasuna, berdintasuna, hezkidetza oinarri).

-Ikasle euskaldun eleaniztunak sortuko dituen euskarazko murgiltze eredua garatzea.

-Balizko Hezkuntza legearen aurrean sindikatu, hezkuntza eragile eta herritarron parte hartzea eta iritzia aintzakotzat hartzea.

Zerrendatutako aldarrikapen guzti hauek ordea, irakasleetaz gain, grebara deitu ditugun gainerako kolektiboentzat ere aldarrikatu genizkion, Haurreskolak Partzuergoa, Heziketa Berezia eta Sukaldari eta Garbitzaileak, alegia.

Hezkuntza Sailak ordea entzungor egin zien gure aldarrikapenei. Hezkuntza inbertsioa edo kostu ekonomikoa suposatzen duen edozein aldarrikapen negoziatzeari uko egin zion eta, ondorioz, ez du sindikatuok mahai gainean jarritako gai nagusienak negoziaziatzeko asmorik agertu.

Aipatu kolektiboen behin behinekotasunaren aurkako behar bezalako neurririk ez mahaigaineratzeaz gain, egin zuen proposamenak (legealdi honetan 3.000 plaza oposizioetara ateratzeak), justu-justu gauzatuko diren erretiroak asetzera mugatuko da. Hortaz, behin behinekotasun tasak bere horretan jarraituko du.

LAB, ELA eta STEILAS sindikatuak negoziatzeko borondate osoa dugula adierazi nahi dugu. Baina momentuz ez dugu gure aldarrikapenei erantzunez negoziatzeko aukera emango digun inolako proposamen zehatzik jaso Hezkuntza Sailaren eskutik. Are gehiago, administrazioak deitu ere ez ditu egin oraindik greban dauden sektore ezberdinetako negoziazio mahaiak.

Iragan maiatzaren 4ko irakasleen mahai sektorial etsigarriaren ondoren iragarritako bidearekin jarraitzeko aukera besterik ez digu uzten gobernuak. Bide horretan, dei egiten diegu langile, familia eta herritarrei bat egin dezaten maiatzaren 16, 20 eta 23rako deituta ditugun mobilizazioakin.
 

 

 

AZKEN ALBISTEAK | ĂšLTIMAS NOTICIAS

Kanakyar herriari elkartasuna adierazi diogu bertako askapen mugimenduko ordezkariekin izandako bileran

Igor Arroyo koordinatzaile orokorrak, Argitxu Dufau Ipar Euskal Herriko arduradunak eta Koldo Saenz Nazioarteko idazkariak osatutako LAB sindikatuaren ordezkaritza bat, FLNKSeko (Kanakyako Nazio Askapen Mugimendu Sozialista) ordezkaritza batekin bildu dira. Kanakyatik etorritako ordezkaritza FLNKSeko exekutiboko kide eta Kanakyako gobernuko kanpo aferen arduraduna den Mickael Forrestek eta FLNKS-eko exekutiboko kide nahiz Batasun Kaledoniarreko Komisario Orokor ondokoa den David Wanabo-k osatu dute.

Pentsio sistema publiko propioaren norabidean eginiko proposamena jendaurrean aurkeztu dugu Iruñean

LAB sindikatuaren Haritik argitalpenaren ale berrian, pentsio sistema publiko eta propio baterako gure proposamena bildu dugu, hiru zutabe nagusi dituena: zaintzagatiko pentsioa, trantsizioa bideratzeko sistema osagarri publiko, unibertsal eta birbanatzailea eratzea eta Gizarte Segurantzaren arloko eskumen osoa keskuratzea. Gaur Iruñean, proposamen hori Nafarroako zenbait eragile sozial eta politikori aurkeztu diegu, Amanda Verrone politika publikoen azterketarako arduradunaren eta LABeko bozeramaile Imanol Karreraren eskutik.

Askatasun sindikala defendatu dugu gure jarduna oztopatzeko saiakeren aurrean

11 langile baino gutxiagoko enpresa oso txikietako hauteskunde sindikalak (TPE deitzen ditugunak) 2024ko azaroaren 25etik abenduaren 9ra iraganen dira Ipar Euskal Herrian.