LABek, Kontseiluak eta ELAk 50 langiletik gorako enpresetan Euskara Planak bultzatzearen aldeko Lanbidearteko Akordio proposamena aurkeztu diegu PSE-EE, Elkarrekin Podemos, EAJ eta EH-Bilduri. Maiatzaren 14tik 17ra egin dira batzarrak, eta zehazki Rebeka Ubera, Aitor Aldasoro, Irune Berasaluze eta Miren Gorrotxategi legebiltzarkideekin eta Idoia Mendiaren Gabinete Buru den Pau Blasirekin elkartu gara.
Bileretan, azaroan jendarteratutako proposamena aurkeztu diegu: hiru eragileon asmoa da CONFEBASKekin Lanbidearteko Akordioa sinatzea 50 langiletik gorako enpresa guztietan Euskara Plan bat negoziatzeko konpromisoa berresteko.
Argi azaldu diegu, norberaren eskakizun propioei uko egin gabe, aurkeztutako proposamenak gutxienekoa izan beharko lukeela lan-munduan aritzen diren eragile guztientzat. Gainera, azpimarratu dugu akordio horren bidez euskararen gaia agendan sartzea besterik ez dugula nahi, hori protokolizatuz, eta, ondorioz, eskaera bakarra dela enpresetan horri buruz hitz egitea, Berdintasun Planekin gertatu den bezala.
Alderdi ezberdinei adierazi diegu udazkenean negoziaketa formala hasteko asmoa dugula, eta akordioaren aldeko giroa sortu nahi dugula. Horregatik, Legebiltzarrean proposamenaren aldeko adierazpena egitea eskatu diegu.
Alderdiek harrera ona egin diete proposamenari eta azaldutako adierazpena nola gauzatuko den eztabaidatzekotan geratu dira.
Alderdiekin eta CCOO sindikatuarekin egon ondoren, aurkezpen errondarekin jarraituko dugu; UGT, Lan Sailarekin, Hizkuntza Politiketarako Sailburuordetzarekin eta CONFEBASKekin, hain zuzen.
