ELA, LAB, ESK, STEILAS, CGT/LKN, CNT, HIRU, EHNE eta Etxalde sindikatuek elkarretaratzeak egin dituzte gaur Bilbon, Donostian, Gasteizen eta Iruñean, “Ezin da gehiago luzatu, euskal langileria Bilbora!” lemapean. Urtarrilaren 10ean Bilbon Sarek egingo duen mobilizazion parte hartzeko deia egin dute.
Bilboko mobilizazioan egon da Garbiñe Aranburu eta adierazi du garaia dela gatazkaren ondorioak gainditzeko. Adierazi du “presoen etxeratze bidea” ezin dela “gehiago atzeratu”, eta gaineratu du beharrezkoa dela “presoak etxeratzeko presio soziala egiten jarraitzea”.
Nabarmendu du 15 urte betetzera doazela ETAk bere jarduera armatua utzi zuenetik eta “garaiz kanpokoa eta anomalia demokratikoa” dela “gaur egun oraindik presoek etxeratze bidean hainbat traba eta oztopo gainditu behar izatea”.
Urtarrilaren 10ean Sarek Bilbon egingo duen mobilizazioa agendan urte asko daramatzan eguna dela ere aipatu du, eta bertan parte hartzera animatu ditu langileak: “Bilboko kaleak betetzeko indar berezia egin behar dugu”.
