2024-02-29
HomeEkintza SozialaPPk langabetuen etengabeko babes falta sustatzen duela salatzen du LABek

PPk langabetuen etengabeko babes falta sustatzen duela salatzen du LABek

Hainbat filtrazioen arabera, PP-ren Gobernuak iraupen luzeko langabetuentzako laguntza berri bat martxan jarri nahi duela ezagutu dugu. Horretarako ondoko baldintzak eskatu nahi ditu: familia ardurak izan eta urtebete egon inolako prestazio ekonomikorik gabe. Laguntza 400 eurokoa izanen litzateke, eta gehienez, 6 hilabetez.

LAB Sindikatuak Gobernuak langabetuekiko duen jarrera salatu nahi du. Lehenik, enplegua suntsitu duen lan erreforma inposatuz, langileoi enpleguaren atea itxi diguna. Bigarrenik, langabeziaren prestazioetan murrizketak ezarriz, prestazioen zenbatekoak gutxituz eta gero eta baldintza gogorragoak eskatuz. Ondorioak begi bistan daude: babesik gabeko langabetuen kopurua biderkatu baino ez da egin.

Euskal Herrian, 88.000 lagunek (langabetuen % 40) bi urte baino gehiago daramate enpleguaren bila. Langabetuen erdia baino gehiagok (110.000 lagun) ez dute inolako babes ekonomikorik. Eta prestazioren bat jasotzen dutenen artean, gero eta gehiago dira zenbateko txikienak, hots, prestazio asistentzialak jasotzen dituztenak. Emaitza: milaka langabeturi ukatu egiten zaie, enplegu duina, baita bizitza duina eramateko beharrezko babesa ere.

PP-ren Gobernuaren asmoen berri izateak agerian jartzen du haren zitalkeria milaka lagunen egoera dramatikoarekiko: pobreziaren mugaren azpitik dauden laguntzak proposatzen ditu, langabetuak urtebete egotea inolako laguntzarik gabe eskatzen du, aldi baterako (6 hilabete) izanen dira eta familia ardurarik ez duena baztertu egiten du. Ezin da burla handiagorik egin luzean enplegurik eta diru-sarrerarik gabe dagoenarentzat! Nola nahi dute horrela jendea bizitzea?

Eskatzen dugu irmotasunez babes ekonomikoa langabetu guztientzako, enplegurik gabe dauden bitartean. Eta laguntza ekonomikoa duina izan dadila, inola ere ez pobreziaren mugaren azpitik. Eskatzen diegu Gasteiz eta Iruñeko Gobernuei beste aldera begira ez dezaten. Bere gain hartu behar dute aldaketa juridikoak eragiteko beharra, baita aberastasuna banatzeko neurriak, Euskal Herrian Babes Sozial sistema propio bat izan dezagun, bizi baldintza duinak bermatu behar dituena.

 

 

 

AZKEN ALBISTEAK | ÚLTIMAS NOTICIAS

Greba egun arrakastatsua Amazonen, enpresak langileen asmoei jaramonik egiten ez dien bitartean

Gaurko greba egunaren balorazioa oso positiboa da, parte-hartzea erabatekoa izan dela esan dezakegu. Plantilla finkotik arduradun gehienak sartu dira, baina kontuan izan behar da arduradunek ez dutela pakete bat bera ere ukitzen, eta, beraz, oinarrizko langileek ez badute lan egiten Amazoneko operatiba guztia ez da ateratzen.

SKOLAEren kontrako azken erasoa salatzen dugu

Administrazioari eskatzen diogu har ditzala beharrezko neurriak ikastetxeetan aniztasunaren aldeko programa hau aurrera eramaten dela bermatzeko. Hezkidetzan eta feminismoan oinarritzen den programaren aurkako enegarren erasoa da hau, eta LAB sindikatuan ez dugu onartuko horrelako eraso gehiagorik!

Envases multinazionalak 68 kontratu iraungitzeko Enplegu Erregulazio Espedientea aurkeztu du

Envases Universal 7 lantoki dituen multinazionala da, horien artean Ugaokoa, 108 langile dituena. 2023ko uztailera arte lantoki hori Domiberiarena izan zen, harik eta Envases Universal enpresak ordura arte Domiberiarenak ziren lantokiak erosi zituen arte, hain zuzen ere. Aste honetan, multinazionalak Enplegua Erregulatzeko Espedientea aurkeztu du, Ugaoko eta Montmeloko zentroen artean 68 lanpostu iraungitzeko ekoizpen- eta antolaketa-arrazoiak argudiatuta.