Egungo sistema ez da batere gardena eta ez da demokratikoa. Horregatik gero eta gehiago gara CONFEBASKen ordezkaritza zalantzan jartzen dugunak.
LAB, gaia LHKra eramanda saiatu da CONFEBASKek ere gogoeta horri bide eman ziezaion. Hauek bere bozak erabili dituzte eztabaida ekiditeko. Ez dute lortuko, LABek, bere eskura dituen bitarteko guztiekin, egoera salatzen eta iniziatiba desberdinak hartzen jarraituko du.
Guretzat ez da sorpresa izan CONFEBASKen jarrera. Ez dugu zalantzarik eztabaida hau ez dela CONFEBASKen gustokoa, inoiz neurtu gabeko ordezkaritzaz baliatzen ari baita negoziazio kolektiboa blokeatzeko, lan erreforman sakontzen jarraitzeko, enpresari guztien izenean elite patronalaren interesak defendatzeko edota diru publiko kopuru itzela jasotzeko. Kontua ordea, ez da CONFEBASKek nahi duen edo ez, demokrazia kontua da.
Gure ustez, orain bai oso argi geratu dela, pilota hau noren teilatu gainean dagoen. Eusko Jaurlaritzak ezin du geldirik eta isilik egon, ezin du patronal hau babesten jarraitu. Eusko Jaurlaritzari dagokio patronalaren ordezkaritza neurtzeko prozedura bat ezartzea.