2025-12-30
Blog Page 973

Greba mugagabe partzialean dauden Jasoko langileek manifestazioa egin dute

admin
-
0

 

Jaso Industrialeko langileak greba mugagabe patrialean jarraitzen dute hitzarmen duin baten alde. Tailerreko langileek ere eskubide sozial duinak edukitzeko eskubidea dugu, beraz, zuzendaritzari, bulegoa eta tailerraren artean dagoen diskriminazioarekin amai dezala eskatzen diogu. Asteak aurreara joan arren langileak mobilizatzen jarraitzeko indarrarekin daude eta aldaketarik egon ezean asteazkenero manifestaldia egingo dute.

Jaso Industrialeko enpresa batzordearen prentsa oharra

Itsasondon kokatua dagoen JASO INDUSTRIAL enpresako langileok, manifestazioa egin dugu gaur asteazkena, goizeko 10:45etan Ordiziako San Juan auzotik abiatu eta Ordiziako azokan amaituaz, "JASO Itsasondo, hitzarmen duin baten alde" lemapean. Ostegun honetan, 2 aste beteko dira Greba Mugagabe Partziala hasi genuenetik eta momentuz ez da kontakturik egon zuzendaritza eta komitearen artean."Langileok argi dugu, eman beharreko urratsak eman ditugula, zuzendaritzari akordio batera iristeko irtenbide ezberdinak eman dizkiogu eta orain zuzendaritzari tokatzen zaio egoera honi soluzioa ematea". "Langileak, asteak aurrera doazen arren, bat eginda eta oso indartsu gaude".

Akordio batera iritsi arte, JASOko langileak, asteazkenero manifestaldiak egingo ditugu, Ordiziako azokan. JASO Itsasondoko zuzendaritzak jakin beharko luke, egoera hau luzatzeak, min handia egin behar diola gure enpresari, barne gatazkek ahuldu besterik ez gaituztela egin behar eta ondorioz, arduraz jokatzeko esaten diogu eta historikoki zuzendaritzak erakutsi duen seriotasuna, kasu honetan ere erakusteko. Tailerreko langileek ere Eskubide Sozial duinak edukitzeko eskubidea dugu, beraz, zuzendaritzari, bulegoa eta tailerraren artean dagoen diskriminazioarekin amai dezala eskatzen diogu.

(Bideoa: Goierriko Hitza)
 

 

 

Lau orduko lan uztea egin dute Arcelorreko Legasako langileek

admin
-
0
Lau orduko lan uztea egin dute Arcelorreko Legasako langileek

Lantegiak, azken urteetan, hitzarmenaren negoziaketetan izandako jarrera inposatzailea gainditzeko asmoz egin zuten atzo geldialdia. Langileek euren eskariak azaldu dituzte, eta lantegiak bere hitza betetzea eskatu dute; hots, bere garaian hartutako konpromisoak errespeta ditzan.

Lantegiak hitz eman zien duela urte batzuk, egoera ekonomikoaren ondorioz, kaleratuta izan ziren langileak, langile gehiago behar izatekotan, lehenak izango zirela lantegian sartzen. Baina, orain, denbora dexente gutxieneko langile kopuruarekin lan egiten egoteaz gain (honek zailtzen du produkzioa behar den moduan ateratzea eta segurtasuna murrizten du ere), urteetako borroken ondorioz, oraingoan, dirudienez, onartuko den errelebo kontratuan ez zaie lehentasuna emango langile horiei.

Legasako langileak ez daude prest beraiekin hartutako konpromisoak ez errespetatzera, eta gutxiago mehatxuen bidez beraien erabakia baldintzatzea. Horregatik, beraien eskubideen defentsan borrokatzea erabaki dute, eta, enpresak jarrera aldaketarik ez badu, horretan jarraituko dute.
 

 

 

Presoen alde irtengo gara kalera

admin
-
0
Presoen alde irtengo gara kalera

Preso politiko ohiek ‘Kalera Kalera’ ekimena jarri dute abian, eta, dinamika horren baita, Usurbilgo plaza bilgune bilakatu dute joan den larunbataz geroztik, datorren urtarrilaren 8a arte bertan egoteko. Bada, LABeko Nazio Komitearen ordezkaritza zabal batek bihar, abenduak 15, elkargunera egingo du bisita babesa eskaintzeko. Hain zuzen ere, sindikatuak hainbat mobilizazio deitu edo babestuko ditu datozen egunetan, beti ere presoen kaleratzea eskatzeko.

Urrutira joan gabe, Durangaldeko LABek bat egin du gaur ‘Kalera Kalera’ ekimenarekin berarekin –irudian, gaurko protesta–. Sindikatuko ordezkariek lau orduko elkarretaratze bat egin dute Iurretako Mallabiena industriagunean, eta hainbat enpresako delegatuak egon dira bertan: Gestamp, Cemosa, Estancal, Odi Bakar, Cemvisa, Durangaldeko Udal, Cespa, Rothenberger, Auzo Lagun, Bertoko, Geroko, Industrias Amaya Telleria, Inyectametal, TVA, Larzep, Bruss, Ona Electroerosion eta Fumbarri enpresatako LABeko ordezkariak, kasu. “Euskal preso, iheslari eta deportatu politikoen aldeko konpromiso, elkartasun eta borroka gure egin dugu”, adierazi dute, eta Euskal Preso Politikoen Kolektiboak abiatuko duen eztabaida prozesuari babesa adierazi diote.

Hauek dira presoen alde aurreikusitako mobilizazioetako batzuk, LABek deitu edo babestuta (gaurkotzen joango gara zerrenda):

Abenduak 15. Nazio Komitearen bisita
Usurbileko plazan, 11:30ean

Abenduak 15. Debaldea
Eibarren, 19:30ean, elkarretaratzea

Abenduak 17. Hego Uribe Arratia
Basauriko espetxerako martxak. Galdakaotik 10:30ean eta Ugaotik, 10:00etan. Era berean, azken ostiraleko mobilizazioa.

Abenduak 20. Busturia-Lea Artibai
Gernikako ospitale aurrean, 11:00etan, protesta: preso gaixoak eta bereziki Ibon Iparragirre etxera ekarri behar ditugula aldarrikatuko dugu.

Abenduaren 22. Aiara
Laudioko Herriko Plazan, 12:00etan, elkarretaratzea

Abenduak 22. Gasteiz
Gasteizen, 12:00etan, Andra Mari Zuriaren Plazan

Abenduak 22. Eskumaldea
Algortan, 12:30ean, elkarretaratzea Telletxe plazan. 13:00etan, handik abiatuta, giza-katea Correoseraino, postal bidalketak egiteko

Abenduak 22. Debaldea
Eibarren, 19:30ean, elkarretaratzea eta ondoren betso-poteoa.

Abenduak 23. Iruñerria
Iruñean, 12:00etan, giza-katea Gaztelu Plazan

Abenduak 28. Goierri
Ordiziako merkatuan, mobilizazioa

Abenduak 30. Hego Uribe Arratia
Basaurin, 12:00etan, elkarretaratzea Benta Plazan

Abenduak 30. Oarso Bidasoa
Azken ostirala indartuko dugu deialdi zabalagoa eginez.

Abenduak 30. Donostia
Azken ostirala indartuko dugu deialdi zabalago bat eginez. Urdaneta kaleko Korreos-en izango da elkarretaratzea, eta, ondoren, Donostiako presoei eskutitzak bidaliko dizkiegu.

 

 

Lan istripuak salatzeko manifestazio bat egingo dugu Bilbon, abenduaren 20an

admin
-
0
Lan istripuak salatzeko manifestazio bat egingo dugu Bilbon, abenduaren 20an


‘Prekarietatea hiltzailea. Lan istripu gehiagorik ez!’. Horixe izango da, datorren asteartean, Bilbon egingo dugun manifestazioaren leloa. Euskal gehiengo sindikalak deitutako protesta Plaza Zirkularretik abiatuko da, 11:30ean, eta Hego Euskal Herrian aurten hil diren 53 pertsonak ekarriko ditu gogora. “Lan osasuna ez da lehentasun bat agintarientzat”, salatu du LABeko Exekutiboko kide Garbiñe Aranburuk, gaurko agerraldian.

LAB, ELA, ESK, STEILAS, EHNE eta HIRU sindikatuek deitu dute abenduaren 20ko manifestaziora. Euskal gehiengo sindikaleko ordezkariek agerraldia egin dute Bilbon, eta 2016. urteko lan istripuen txostena aurkeztu dute. Hauek dira txostenaren datu esanguratsuenak: 

2016. urtea bukatzen ari den honetan, lan ezbeharren egoerak nabarmen egin duela txarrera salatu nahi dugu. Izan ere, iaz urte osoan 52 izan ziren guztira eta aurten, Hego Euskal Herrian, bederen, 53 langile hil dira jada lan istripu baten ondorioz.

Araban 03
Bizkaian 29
Gipuzkoan 08
Nafarroan 13

Egoeraren larritasuna adierazteko, ondorengo datuak ere esanguratsuak iruditzen zaizkigu. Hain zuzen ere, 2016. urteko lehengo 10 hilabeteetan %9,5 handitu da istripuen kopurua. Larritasunaren arabera: bajarik gabeko istripuak %11,3 handitu dira; baja arinak, %6,7; hilgarriak, %6.

Arinak eta bajarik gabeko istripuei dagokienez, 2013. urtetik %15 handitu dira. Urtero igo dira: 2014. urtean, %1; 2015. urtean, %3,5; 2016. urtean, %9,5.

Lan istripu hilgarriei dagokienez, 2013. urtetik %15 handitu dira.

Lan istripu bat, 5 minuturo

Egunero 288 lan istripu jazotzen dira. Edo bestela esanda, 5 minuturo lan istripu bat gertatzen da. Istripu horietako 178k ez dute bajarik eragiten, eta 109k egun bat baino gehiago irauten duen ezintasuna sortzen dute. Sei egunean behin istripu hilgarria gertatu ohi da.

Lanbide gaixotasunak, guztira, %8,2 handitu dira. Egunero 10 bat lanbide gaixotasun sortzen dira. Horietako 6k ez dute bajarik eragiten, eta lauk egun bat baino gehiago eragiten dute.

Kontuan hartzen baditugu egun bat baino gehiagoko ezintasunak sortzen dituzten lan istripuak eta lanbide gaixotasunak: egunero 96 pertsonei ematen diete baja,
hots, 15 minuturo langile bati ematen diote baja.

Deigarria da gainera aurten izan diren istripuen hilgarrien herena azpikontratetan izan direla.

Estatistikek ezkutatzen dutena
Zenbaki hauek ez dira bat etorriko Osalan edo Nafarroako Lan Osasun Institutuak emango dituen datuekin. Izan ere, askotan salatu dugu estatistika ofizialek ez dutela errealitatea islatzen, istripu ugari ez dituztelako lan istripu gisa sailkatzen. Horien artean ditugu autonomo batzuek izaten dituztenak, etxeko langileenak, ezkutuko ekonomian lan egiten dutenenak, garraiolariek lanaldian izaten dituztenak, in itinere batzuk eta Euskal Herrian lan istripua jasan duten arren, baina haien enpresa kanpokoa duten langileenak.

Bestalde, lan harremanetan hedatzen ari den prekarietatearen ondorioz lan ezbeharren gero eta zati handiagoa ezkutuan geratzen ari da. Askotan enpresariak dira istripu hauek estaltzen dituztenak edo “istripu arin” bezala sailkatzen dituztenak, mutualitateen laguntzarekin, hainbat kasutan eta batez ere enpresa handietan, benetako lan istripu kopurua ezkutatu asmoz, langileak baja hartu ordez, beste jarduera batera bideratzen dira. Beste batzuetan langileak dira istripuak ez dituztenak komunikatzen, prekarietatearen ondorioz ziurgabetasun egoeran daudelako.

Hortaz, argi dago gaur egun dauzkagun informazio estatistiko sistemek ez dutela errealitatea islatzen. Eta hala ere, 2016. urteko lehenengo 10 hilabeteetan, baja gabeko lan istripuak, arinak eta hilgarriak areagotu egin dira. Honek agerian uzten du, premiazko neurririk bideratu ezean, datozen urteotan, lan istripuen kopuruak gora egingo duela.

 

 

 

Hitzarmen guztien defentsa eta negoziazio kolektiboaren desblokeoa eskatuko ditu LABek Akordio Interprofesionalaren mahaian

admin
-
0

EAEn Akordio Interprofesionalaren mahaian negoziazio kolektiboa egituratzeko akordioaren negoziazioari ekin diogu, bertoko hitzarmenak estatu mailakoengandik –CCOO, UGT eta CEOEren eskutik– jasotzen ari diren erasoetatik babesteko asmoz. Azaroaren 30eko bileran ezagutu genuen Confebasken proposamena, eta abenduaren 16a bitarteko epea zabaldu zen sindikatuok geure proposamenak egiteko.

Confebasken proposamena abiapuntu egokia izan daiteke bertoko hitzarmenak estatu mailako hitzarmenetatik babesteko, baina, LABen iritziz, mugapen argi bat du: indarrean edo ultraktibitatean dauden hitzarmenei soilik aplikatuko zaiela. Beraz, bi galdera garrantzitsu erantzun gabe uzten ditu: zer gertatuko da jada indarraldia amaituta duten hitzarmenekin? Nola geratuko dira ultraktibitatea amaitzen zaienean?

LABek EAEko hitzarmenen egoeraren azterketa egin du, eta argazkia oso kezkagarria da: hitzarmenen %60k indarraldia amaituta dute, hitzarmenen %16 indarrean daude eta hitzarmenen %24ri ultraktibitatea aplikatzen zaie (batzuei mugatua eta beste batzuei mugagabea). Bada, Confebasken proposamenarekin hitzarmenen %22 bakarrik geratuko lirateke babestuta, alegia, indarrean daudenak eta ultraktibititate mugagabea dutenak soilik. Akordioak, beraz, eraginkortasun mugatua izango luke negoziazio kolektiboa desblokeatzen ez den heinean.

LABen eskakizunak Akordio Interprofesionalaren mahaiari

LABen iritziz, hitzarmenak babestearekin batera, negoziazio kolektiboaren desblokeoaz ere hitz egin behar da Akordio Interprofesionalean, eta, horretarako, bi eskakizun egingo ditugu:

-Akordio interprofesionala sinatzen denetik hurrengo bi hilabetean indarraldia amaituta edo ultraktibitate mugatuan dauden hitzarmenen mahaiak deitzea eta negoziazioak abiatzea.

-Mahai negoziatzaile horietan hitzarmen bakoitzari ultraktibitate epe berria ematea, negoziazioa era normalizatuan eman ahal izateko eta denbora tarte horretan estatu mailako hitzarmenak aplikatzea ezinezkoa egiteko, indarraldia amaitu zaien eremuetan.

Bi eskakizun hauek Akordio Interprofesionalaren mahaira bidaliko ditugu, eta bilerak egiteko eskaera egingo diegu Confebask eta Garen patronal elkarteei, gure proposamena aurkeztu eta azaltzeko.

Patronalak zapuztutako saiakerak

Negoziazio kolektiboa blokeatua dago gurean, eta blokeo horrek arduradun nagusi bat du: Confebask. Patronalak hitzarmenak blokeatu ohi ditu, aurrera eraman nahi duen prekarizazio eta pobretze prozesuarekin jarraitu ezin duenean. Orain baino lehen ere egin izan dira saiakerak hemengo hitzarmenak Estatuko erasoetatik babesteko; 2011 eta 2013 urteetakoak, kasu. Confebasken jarreragatik ezerezean geratu ziren guztiak. LABek saiakera guztietan parte hartu du, baita orain ere, negoziazio kolektiboaren egoera inoiz baino larriagoa denean.

Negoziazio kolektibo osoa estatu mailatik datozen erasoetatik babestea eta blokeo egoerari irtenbide orokor bat bilatzea ez da arazo legala, borondate kontua besterik ez da. Beraz, LABen iritziz, gure hitzarmenak aurrera ateratzeko borondatea behar da; urtarrilaren 10ean egingo den bilerara alde guztiak langile guztien egoerari irtenbidea emateko borondatearekin etortzea espero dugu, ez soilik hitzarmen gutxi batzuk babestera.
 

 

 

Aurrekontu sozial, parte hartzaile eta burujabeen aldeko ekitaldia Labriten

admin
-
0
Aurrekontu sozial, parte hartzaile eta burujabeen aldeko ekitaldia Labriten



Euskal Herriko eskubide sozialen Kartak eta Parlamentu Sozialak deituta datorren abenduaren 16an aurrekontu sozial, parte hartzaile eta burujabeen aldeko ekitaldia eta manifestazioa izango da Iruñean. "+Cambio +Social" lemapean burutuko da ekimena Iruñeako Labriten eta LAB, ELA, STEILAS, CGT, ESK, Attac, Bilgune Feminista, Nafarroako Osasun Plataforma eta Martes al Soleko kideek osaturiko ordezkaritza batek aurkeztu du medioen aurrean.

Aste honetan aurrekontuak eztabaidatzen ari dira Nafarroako Parlamentuan eta aipatutako eragileek eztabaida horretan parte hartu nahi dute era honetan. Izan ere, "aurrekontuak dira politika publikoak gauzatzeko tresnarik nagusiena. Hortaz, aurrekontuen eztabaida aldaketa sozialaren alde gaudenoi ere badagokigu".

Karta eta Parlamentua kritikoak dira, bai formari dagokionez (inongo parte hartze sozialik ez) nola edukiei dagokionez: zenbait arlotan aurrerapausoak eman dituzten arren, aurrekontu hauek ez dute eredu aldaketa ahalbidetzen. Diru bilketa ez da nahikoa, ezta justua ere, enpresek eta kapital errentek beharko luketeena baino askoz gutxiago ordaintzen dutelako, Europako Batasunaren batez besteko presio fiskaletik urrun. Bestalde, ez dira beharrezkoak diren inbertsioak egiten sektore publikoa garatu, enplegua sortu eta behar sozialei erantzuteko".

Bi plataforma hauek bat egin dute aurrekontuei begirako sei aldarrikapenetan: politika publikoen egiturazko aldaketa; erreforma fiskal sakona: genero ikuspegia txertatzea; zorraren auditoria; parte hartze soziala; eta Nafarroan bertan eredu sozial eta ekonomikoaz erabakitzeko eskubidea
 


  
 

Saharako errefuxiatu eremuetan egon gara UGT SARIO sindikatuari babesa ematen

admin
-
0
Saharako errefuxiatu eremuetan egon gara UGT SARIO sindikatuari babesa ematen


LAB sindikatuko ordezkaritza bat Tindouf Argelian dauden Saharar herriaren errefuxiatu eremuetan egon da Saharako UGT SARIO sindikatuaren 8. kongresuan, bertako sindikatuari eta oro har Saharar herri guztiari bere elkartasuna adierazten. Egun guzti hauetan, bertako errealitatea gertutik ezagutzeko aukera izan dugu eta harrituta itzuli gara, nola hain baliabide guttirekin hainbertze gauza egin ditzazketen.

Saharar herria egoera larria pairatzen ari da. 1975. Marokok okupatu zuen eta gaur egun 3 eremuetan banatuta dago Saharar herria: alde batetik Marokok okupaturiko lurraldea, bertze aldetik askatuta eremua eta azkenik Argeliako errefuxiatu eremua.

1991ean bakea sinatu zen, erreferendum bat egiteko konpromisoarekin baino Marokoko gobernuak ez du bere hitza bete eta Europak ere deus gutti egiten du egoera hau blokeotik ateratzeko. Bitartean Saharar herria okupatuta eta errepresio gordina pairatzen bizi da.

Egon garen eremu guztietan LAB sindikatuaren konpromisoa Saharar herriaren askatasunarekin helarazi diegu bertakoei. Haien aldetik gurekiko harrera ezin hobea izan da. Egun guzti hauetan herrixka ezberdinak ikusi ahal izan ditugu eta beraien antolaketa eredua ere gertutik ezagutzeko aukera izan dugu.

Eskolak, liburutegiak, ospitaleak, ezgaituentzako zentroak, emakume eta gazte antolakundeen taldeak eta abar luze bat ezagutu ahal izan ditugu bertakoen aldetik ongi etorri beroa jaso dugun bitartean.

UGT SARIOren 8. kongresua ere bertatik ezagutzeko aukera izan genun eta bertan ere Saharako sindikatuarekiko eta Saharar herriarekiko gure elkartasun osoa helarazi genien. Idazkari nagusi bezala hautatua izan zen Salama Brahim Bashir Eri-ri eta bere ekipoari zorterik onena opa diogu etorkizunerako, Saharar herriaren askatasunean egin beharreko bide honetan.

LAB sindikatuaren interbentzioa UGT SARIOren 8. kongresuan, Saharar errefuxiatu eremuetan, Abenduak 3, 4 eta 5ean 

"Kaixo eta arratsalde on guztioi! Gure herriko hizkuntza nazionala den Euskaraz agurtzen zituztedan,

Salam alekun sukran ale stigbel

Lehenik eta behin UGT SARIO sindikatuari bere kongresura gonbidatu izana eskertu nahi genieke. Espero dugu kongresu honek Euskal Herria eta Saharar herria batzen dituen harremanak estutzeko balio izatea oraindik eta gehiago. Bertze alde batetik Kongresu hau UGT SARIOrentzat eta orokorrean Saharar herriarentzat aurrerapauso handia suposatzea espero dugu beraien askatasuna lortzeko bidean.

Euskal Herria ere estaturik gabeko herri bat da. Izana, existentzia eta libre eta demokratikoki etorkizuna erabakitzea ukatu egiten zaiona. Gure antolakundea den LAB Euskal Herriko langile klasearen zerbitzurako egoteko borondatearekin sortu zen, euskal errepublika independiente bat eraikitzeko borrokan, justizia sozialean eta gizon eta emakumeen arteko parekidetasunean oinarrituko zena.

Estaturik gabeko herrietara benetako demokrazia bat iristea nahi badugu, herrietako prozesu soberanistetan pausuak eman behar ditugu; hau da, 1978ko erregimena atzean utzi behar dugu, herrien askatasun aldarriak itotzeko sorturiko erregimena hain zuzen ere.

Saharar herriaren askatasunaren alde bere bizitza eman duten guztiak gogoratuz jarraitu nahiko nuke, eta bereziki Brahim Saika burkide sindikalista.

Ezin ditugu ere ahaztu Marokoko kartzeletan bahituta dauden preso politiko Sahararrak. Euskal Herrian oso ongi dakigu hori zer den, gaur egun oraindik 350 Euskal Preso politiko baino gehiago baitaude beraien etxetik ehunka kilometrotara. Horietako bat gure Idazkari nagusi ohi Rafa Diez da, orain dela 6 urtetatik espetxean Euskal Herriarentzako bake, demokrazia eta askatasun eszenatoki baten alde lan egiteagatik.

Ez nuke bukatu nahi Saharar herriarekiko gure herriaren konpromiso osoa berretsi gabe beraien lurra eta askatasuna berreskuratzeko borroka legitimo honetan. LABen eta Euskal Herrian lagun bat daukazue.

Gora Sahara askea!
Yahia Sahara horra!"
 

 

 

CCOOek Mercedesen hitzarmen prekarioagoa ahalbidetzen du

admin
-
0

CCOOek Mercedes lantokian hitzarmen atzerakoiagoa ezartzeko bere laguntza eman duela salatzen dugu. Hitzarmen honek prekarietatea handitzen du kontratazio berrientzat, aurretik zegoen erabateko malgutasunean sakontzen du eta erridikuluzko soldata igoerak jasotzen ditu, aurreko urteetan jasotakoak baino apalagoak.

Asteetako indefinizio susmagarriaren ondoren, atzoko Mahai Negoziatzailearen bileran CCOOek erabaki zuen UGT, EKINTZA eta PIMekin bat egitea langileen gehiengoak babestu ez duen eta Mercedeseko Zuzendaritzari nahi zuen guztia eskaintzen dion hitzarmena babestuz. Jarrera honekin, CCOOek eragotzi egiten du hitzarmenaren edukiak hobetzeko negoziazioa berrartzea, LABek proposatu zuen bezala, eta uko egiten dio berriro langileak aktibatzeari lan-baldintza hobeak lortzeko.

Bere atxikimendua azaltzeko hobekuntzarik ez dago idatzizko testuan. Hortaz, beldur gara publiko ez diren sindikatuko honentzako prebenden truke izan dela atxikimendua. Horregatik, eta gardentasuna eta diskriminazio eza bermatzearen begira, LABetik berriro exijitzen ditugu irizpide objektibo eta gardenak aldi baterako kontratuak mugagabe bihurtzeko eta ardi egongo gara edozein irregulartasunen aurrean, dagokion esparruan salatuz.

Era berean, LABek Mercedeseko prekarietatea eta ebentualitatearen kontra jarraituko du borrokan, kontratazioan egiten diren iruzurrak salatuz.

 

 

 

TPE Hauteskundeetan izango gara

admin
-
0
TPE Hauteskundeetan izango gara

Pariseko Kasazio Gorteak berriro eman digu arrazoia

"CGTk galdu duela onartzeko garaia da". LABeko ordezkarien hitzak dira hauek, Pariseko Kasazio Gorteak sindikatuari berriro arrazoia eman diola jakinarazi ondoren egindakoak. Hain zuzen ere, enpresa txikietako hauteskundeetan LABen hautagaitza eragozteko helburuarekin epaitegietara jo du CGTk, baina emaitzarik gabe.

LABeko ordezkariek agerraldia egin dute gaur Baionan, Pariseko Kasazio Gortearen epaiaren berri emateko. Hain zuzen ere, CGTren helegitea baztertu eta arrazoia eman dio berriro sindikatuari. Horrenbestez, CGTk enpresa txikietako hauteskundeetan LABen hautagaitzarik ez egoteko egindako saiakera bertan behera utzi du Pariseko auzitegiak, irailean egin zuen bezala. 

Dena dela, gaurko helegitea ere atzera bota zuen Bordeleko auzitegiak, urrian. Parisekoak erabaki hori berretsi du orain.
 

 

 
1...972973974...1,583Page 973 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus