2025-12-13
Blog Page 915

Europako sindikatuok elkartasuna adierazi diogu Palestinari

admin
-
0

LAB kide den Palestinarekiko Europako Sindikatuen elkartasun sareak Palestinako preso politikoei babesa adierazi nahi die daramaten gose grebaren harira. Pasa den apirilaren 17an 1.500 preso politiko Palestinarrek gose greba baten hasiera iragarri zuten. Gose greban dauden preso politiko hauek Israelen gehiegikeria, isolamendu, tortura, arduragabekeria medikua, eta nazioarteko zuzenbideak bermatzen dituen eskubideen urraketa salatu nahi dute. Bertzeak bertze epaiketa justu baten aldeko eta bisita edukitzeko eskubidea urratzen ari zaie momentu honetan.

6.300 inguru preso politiko palestinar daude Israelgo kartzeletan Adameer erakundearen arabera (Presoen eskubideen aldeko eta giza eskubideen aldeko erakundea), horietatik 300 inguru haurrak. Gaza eta Cisjordaniako preso politikoak Israelgo kartzeletan preso daude, eta aunitzetan senitartekoen bisita erregularrak ukatzen zaizkie, Amnistia Internacional erakundearen arabera “azken hamarkadetan daramaten politika ez soilik legearen urraketa krudel bat, baizik eta nazioarteko zuzenbidearen urraketa larri bat”.

Europako sindikatu bezala beldurra sentitzen dugu ikusten dugunean nola Europako Estatutak eta Europar Batasunak ez duten beraien betebeharra egiten Palestinak pairatzen duen injustizia egoera garbi hau Israeli aurpegiratzea, eta nola ez duten Israelen giza eskubideen eta nazioarteko zuzenbidearen urraketaren aintzinean deus ere egiten. Europar Batasunak eta multinazionalek etekin ekonomikoak lortzen dituzte errepresioarekin eta Palestinarren atxiloketekin.

Sindikalista eta hiritar kontziente bezala egoera honen aintzinean posizio bat hartu behar dugula uste dugu. Gose greban dauden preso politiko palestinarrei gure elkartasuna adierazten diegu tratu justu eta justizia aldarrikatzen dutenean. Gure sindikatuen barruan HP eta G4S enpresetako kontratuak ez berritzera konprometitzen gara, hauek preso politiko palestinarren egoeraren konplize diren neurrian. Hortaz gain Europar Batasuneko estatuei eta Europako nazioei Israelekiko haien konplizitatearekin bukatzea exijitzen diegu eta giza eskubideen urraketengatik kargu hartu diezaiotela.

 

 

 

Osakidetzaren pribatizazioaren aurka egin dugu protesta

admin
-
0
Osakidetzaren pribatizazioaren aurka egin dugu protesta

Iñigo Urkullu lehendakariaren aurrean mobilizatu gara gaur, Urdulizko ospitaleko larrialdi zerbitzuaren inaugurazioa dela eta. Hain zuzen ere, Osakidetzaren pribatizazioa arbuiatzeaz gain, irekieraren atzerapena salatu dugu LAB, SATSE, ELA, CCOO, UGT eta ESK sindikatuetako ordezkariok. Urtebete beranduago inauguratu dute larrialdi zerbitzua.

Pribatizazioaren adibideak nonahi daude Osakidetzan, atzoko inaugurazioaren lekuko izan den Urdulizko ospitalean ere. Urrutira joan gabe, Urdulizko Ospitaleetako sukalde, ikuztegi eta garbikuntza zerbitzuen baldintza-agiria geldiarazteko agindua jaso ondoren ere, Osakidetzak zerbitzu horiek eta beste zentro batzuetakoak pribatizatzeko asmoarekin darrai.

Osakidetzak pribatizazioaren estrategiari eusten dio. Eta sindikatuok egiaztapen bat azpimarratu nahi dugu: osasun-sistemak zenbat eta pribatizatuago egon, orduan eta desberdintasun handiagoa osasun-zerbitzuak eskuratzeko. Guk apustu egiten dugu ekitatearen alde; baina, horretarako, ezinbestekoa da gure osasun publikoa sendotzea.  
 

 

 

CETA itunaren eragin kaltegarriaz ohartarazi dugu berriro

admin
-
0
CETA itunaren eragin kaltegarriaz ohartarazi dugu berriro

Madrilgo Kongresura iritsi da CETAren izenpetzearen inguruko eztabaida. Horren harira, itun honen aurka egiteko jarrera berretsi dugu, ondorio kaltegarriak besterik ez baititu ekarriko. Korporazio handien neurrira egindako legediak bultzatzea du helburu; hauek bertako merkatuan dituzten azken mugak ezabatzea, hain zuzen ere. Hitz batean, CETA bezalako nazioarteko itun ekonomikoek neoliberalismoan sakontzen dute.

Europako Parlamentuaren osoko bilkurak Europar Batasunaren eta Kanadaren arteko Ekonomia eta Merkataritza Akordio Orokorraren testua bozkatu zuen otsailean; hots, CETA ituna, bere ingelesezko laburdurekin ezagutzen den tratatua. Hala, Euskal Herriko Eskubide Sozialen Kartak, Bizkaiko eta Nafarroako TTIP/CETA ez plataformekin batera, hainbat mobilizazio antolatu zituen Hego Euskal Herriko hiriburuetan, itunak ekar ditzakeen ondorioaz ohartarazteko.

Madrilgo Kongresura iritsi da orain eztabaida, eta salaketa bere horretan mantentzen dugu, CETAren aurkako plataformak zerrendatutako arrazoiak direla medio.

Legebiltzarkideei gutuna

Autonomia Erkidegoek ez dute eskumenik CETA onartzeko, baina bertan dauden alderdietako batzuk izan dira bai Europar Batasunean, bai Espainiar Parlamentuan, bere negoziazioa eta onarpena bultzatu dutenak. Beraz, orain eskumen ezaren aitzakiapean eskuak garbitu nahi badituzte ere, erantzukizun zuzena daukate. Hori dela eta, legebiltzarkideei azalpenak eskatzeko kanpaina abiatu du CETAren aurkako plataformak: "Ez iezaiezu utzi eskuak garbitzen! Herritar zaren heinean, behartu zure eskubideak babesten! Idatzi CETA babesten duten alderdietako parlamentari guztiei, euren postura aldatzera behartzeko!".
 

 

 

Igandeko herri kontsultekin bat egin dugu

admin
-
0
Igandeko herri kontsultekin bat egin dugu

LABeko Nazio Komiteko kideek bat egin dute Gure Esku Dago dinamikak maiatzaren 7rako deitutako herri kontsultekin. Hain zuzen ere, 91 herritan egingo dituzte galdeketak eta 250.000 gora lagun daude deituta. Gure etorkizuna erabakitzearen alde gaude, erabakitzeko eskubidea behar dugulako egoera laboral eta soziala iraultzeko. Oinarri berriak dituen jendarte eredu askea nahi dugu, eta langileok aukera paregabea dugu gure hitza eta erabakia aktibatzeko eta gure borondatea adierazteko antolatu dituzten herri kontsultetan.
 

 

 

Espetxeetara antolatutako martxekin egin dugu bat

admin
-
0
Espetxeetara antolatutako martxekin egin dugu bat

LABeko Exekutibako kide Garbiñe Aranburuk hitza hartu du gaur Bilbon egindako agerraldian, maiatzaren 20an Espainiako eta Frantziako sei espetxetara egingo dituzten martxen berri emateko. Hain zuzen ere, sakabanaketa salatzeko iniziatiba Curtis, Fleury, Picassent, Puerto, Roanne eta Saint Maur herrietako kartzeletara iritsiko da, "presoei bakarrik ez daudela gogoratzeko eta munduaren aurrean bidegabekeria hau konpon dadin eskatzeko". Sindikatuak atxikimendua luzatu dio Bilbon aurkeztutako ekimenei, espetxeetara egingo duten martxa ez ezik, beste zenbait protestetara ere deitu baitute egunotarako, Amnistiaren aldeko aste odoltsuenaren 40. urteurrenaren harira.

Duela 40 urte, Euskal Herria bidegurutze garrantzitsu batean zegoen. Orduan antolatu zuten Amnistiaren Astea, eta euskal jendarteak babes ikaragarria eman zion. Espainiako Estatuak, ordea, errepresioarekin erantzun zion ekimenari, eta zazpi pertsona hil zituen amnistiaren alde borrokatzeagatik. 40 urte pasa dira aste odoltsu hartatik, eta datozen egunotan berriro ekarriko dugu gogora, baita presoak etxeratzeko aldarria ere.

Esaterako, mobilizazioak eta omenaldiak egingo dituzte, "Agur eta ohore" leloarekin: maiatzaren 11n, Iruñean (20:00); maiatzaren 12an, Bilbon (20:00); maiatzaren 13an, Oreretan (17:30); eta maiatzaren 14an, Ortuellan (13:00).

Era berean, espetxeetara martxak egingo dituzte, "Maite zaituztegu, kalera!" leloarekin. Maiatzaren 20an izango da, eta Curtis, Fleury, Picassent, Puerto, Roanne eta Sain Maur herrietako kartzeletara abiatuko dira.

Uztailaren 20 eta 27 artean, Askatasunaren Ibilbidearen 40. urtemuga gogora ekarriko dute, Gernikatik Sakanara ibilaldia eginez.

Ekimen hauei guztiei babesa eskaini die LABek, eta langile guztiei parte hartzeko deia luzatu diegu.

 

 

 

Pineko langileek greba egin dute euren lanpostuen defentsan

admin
-
0
Pineko langileek greba egin dute euren lanpostuen defentsan

Pine enpresako langileek jakin berri dute Ingeteam taldeak pine marka saldu duela. Egoera salatu eta beraien lanpostuak defendatu nahian, langileek greba eta elkarretaratze bat egin dituzte gaur Zamudioko Teknologia Parkean. 500 langile inguruk lan egiten dute Pinen.

Pineko enpresa batzordeak zuzendaritza desberdinek azken urteetan egindako "zorigaiztoko kudeaketari" leporatu diote egungo egoeraren ardura, kaleratu duten adierazpenaren arabera.
 

 

 

Espainiatik dakarten industria ereduak prekarietatean murgilduko gaitu

admin
-
0
Espainiatik dakarten industria ereduak prekarietatean murgilduko gaitu

Miramongo Parke Teknologikoko Auditorio parean elkarretaratzea egin dugu, "PNV, zuen eredua #Spanishprecarity4.0, langileok euskal Estatua!" leloarekin. Protesta honekin, Espainiako erregearen bisita salatu nahi izan dugu, EAJk bultzatzen duen benetako ereduaren erakusgarri baita; alegia, Espainiako lan erreforma eta prekarietatean oinarritutako eredua, etorkizunik ez duen eredua.

Erregearen bisitak ongi asko erakusten du zein de hemengo instituzioek, batez ere Eusko Jaurlaritzak bultzatzen duen eredua. Industria 4.0. propagandaren atzean prekarietatea zabaltzeko apustua besterik ez dago. Egiten duten apustua espaniar Estatuko eredua kopiatzea da. Honek prekarietatearekin lehiatzen saiatzea suposatzen du eta LABen iritziz industriak ez du etorkizunik bide honetatik jarraituz gero.

Gainera lotsagarria iruditzen zaigu inoizko aberastasun haundiena sortzen ari den bitartean negoziazio kolektiboa blokeatzen duen patronalari Jaurlaritzak babes osoa eskeintzea. Industria aurreratua izango bada, sozialki eta lan baldintzetan aurreratua izan behar da.
Espainiako eredua aplikatzeari utzi eta industria politika propioa, inbertsioan eta aberastasunaren banaketan oinarritutakoa bultzatzea behar du herri honek.

Tamalez, aurrekontuetan erdietsitako akordioak, beste behin erakusten du EAJ eta PPren proiektu ekonomikoa berberak direla: patronalaren, eta bereziki Confebasken eredu berbera, burujabetza ekonomikoari, erabakiak hemen hartzeari uko egiten diona. LAB hau aldatzeko borrokatuko da, hau baita egoera aldatzeko bide bakarra.
 

 

 

Iruñean eta Bilbon bildu gara errebalidei planto egin eta ebaluazio hezitzailea aldarrikatzeko

admin
-
0
Iruñean eta Bilbon bildu gara errebalidei planto egin eta ebaluazio hezitzailea aldarrikatzeko

Azken urteetako bideari jarriki, tantaka tantaka,NA zein EAEko hezkuntza sailek LOMCE legea inplementatzen darraite. Eta ikastute honetan LOMCEtik eratorritako rebalida guztiak (LH3-LH6-DHB4,BATX2) egiteko asmotan dabiltza. Modu batean zein bestean mozorrotuta,hurrengo egunetan rebalida hauei bide eman eta hego Euskal Herriko ehunka ikasle ebaluatuak izango dira: arrotza, antipedagogikoa, atzerakoia, segregatzailea…den eredu baten arabera. Honen aurrean, LABek elkarretaratzeak egin ditu gaur Nafarroako hezkuntza sailaren eta Bilboko hezkuntza delegaritza aurrean.

LABek garbi utzi du bere jarrera gaurko elkarretaratzeetan:

– Hezkuntza Plataformen Topaguneak egindako deiarekin bat egiten dugu eta rebalidei planto egitera animatzen dugu hezkuntza komunitatea.

– Bide honetan dei egiten diogu gure kidegoari jarrera proaktiboa hartzera planto dinamika ekimenetan.

– Azkenik, LABk, bestelako ebaluazio eredu berri baterako urratsak ematen jarraitzeko hitza hartzen du. Ikasturte honetan irekitako bidean sakondu eta eguneroko hezkuntzaren errealitatea eraldatzeko tresnak sortu nahi ditugu.

LABen ustez, Euskal Herrira begirako bide propioa garatzeko ausardia behar dugu une hauetan, EAEko zein Nafarroako Hezkuntza Sailek erakusten ez dutena. Horrela, LABek hezkuntza burujabetzaren bidean herri gisa elkarlanean ebaluazio eredu propioa osatzeko determinazioa du. Izan ere, beharrezkoa dugu bestelako ebaluazio sistema bat, non ikaslea ez ezik, irakasle taldea, eskola, familia eta finean sistema guztia ere baloratuko den, beti ere hobekuntza, ekitate, aukera berdintasunean oinarrituz eta garrantzizkoa dena, bide horretan aurrera egiteko plan, neurri zehatzak eskainiz.

Eredu berri horren eraikuntza, hezkuntza komunitate guztiaren parte hartzean oinarrituko da. Izan ere, ebaluazioaren afera, ikuspegi poliedrikotik landu behar dugu. Bizi dugun ziurgabetasun egoera probestu eta ebaluazioaren izaera, funtzio, helburu, ereduen inguruko hausnarketa integrala burutu eta tresnak, ereduak, eraikitzea dagokigu.
 

 

 

SAT sindikatuari elkartasuna adierazteko bildu gara Bilbon, BBVAren egoitzaren aurrean

admin
-
0
SAT sindikatuari elkartasuna adierazteko bildu gara Bilbon, BBVAren egoitzaren aurrean

Bilboko Gran Viako BBVAren egoitzaren parean elkartu gara LAB, ELA, ESK eta STEILAS sindikatuetako kideak, Jaengo El Cerro finka okupatu duten Sindicato Andalúz de Trabajadores (SAT) sindikatuko kideei gure babesa adierazi eta, aldi berean, haien aurka BBVAk abiatu duen erasoa salatzeko.

Pasa den apirilaren 1ean, Andrés Bódalok espetxean urte bat betetzen zuen egunean, Andaluziako SAT sindikatuak Adarves Altos izeneko lursaila okupatu zuen, San Cristobaleko muinoaren magalean, Jaenetik 6 kilometrotara. Behin lursaila okupatuta, Cerro libertad bezala izendatua izan zen Andrés Bódaloren oroimenez eta bere askatasuna exijitzeko.

73 hektareatako lursail hau SAREB izeneko Banku Txarrekoak zen, eta gaur egun ANIDA-ren eskuetan dago, BBVAren erakunde bat, aipaturiko banku horren jabetza inmobiliarioak gestionatzen dituena hain zuzen ere.

SAT-eko kide hauen okupazioaren ondoren 5 urtez ahaztuta eta baztertuta utzi duten lursail honi bizitza eman diote, eta, aldi berean, bertako langileei lan egin ahal izateko aukera bat eman diote langabezi tasa izugarriak dauden lurralde batean.

BBVA, ordea, ez da geldirik gelditu eta bere interes espekulatiboak defendatze aldera SAT-eko 28 kide salatu ditu, eta, aldi berean, finka husteko salaketa jarri du, erakutsiz bankuarentzat bere lehentasuna ez dela lurralde bateko langileei lana eta etorkizun duin bat bermatzea, bere interes espekulatiboak eta lurraren espekulaziotik ahalik eta etekin ekonomiko gehien ateratzea baizik.

Gauzak horrela, elkarretaratzean elkartu garenok helburu bikoitza daukagu; alde batetik, SAT-eko kideei gure babes eta elkartasun osoa adieraztea, eta, bestze aldetik, BBVA-ren jarrera espekulatiboa eta anti-soziala salatzea. Lurrak bertan lan egiten duenaren eskuetan egon behar du, espekulaziotik etekin ekonomiko hutsa atera nahi duen banku baten eskuetan beharrean. Horregatik lurra eta aberastasunaren aldeko aldarria luzatzen dugu.

Ezin bukatu kartzelan dagoen Andrés Bódaloren askatasuna exijitu gabe, jadanik urtebete kartzelan El Cerro okupatu dutenen ideiak defendatzeagatik eta Andaluziako langile klasearentzat etorkizun duin baten alde borrokatzeagatik.


 

 

 
1...914915916...1,580Page 915 of 1,580

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus