2026-01-11
Blog Page 907

Bestelako Euskal Herri bat posible dela berretsi dugu, Eskubide Sozialen Karta oinarri

admin
-
0
Bestelako Euskal Herri bat posible dela berretsi dugu, Eskubide Sozialen Karta oinarri

GUE/NGLk antolatuta, Europako etorkizunari buruzko nazioarteko jardunaldiak egiten ari dira Donostiako Tabakaleran egunotan, “The Left discusses Europe´s future” izenburuarekin. Besteak beste, migrazioa eta errefuxiatuak, euskal bake prozesua, lankidetza, industrializazioa eta arrakala soziala bezalako gaiak ari dira lantzen. Testuinguru honetan, Euskal Herriko Eskubide Sozialen Kartaren ordezkariek kartaren ale bat eman diote Gabi Zimmer GUE/NGLko lehendakariari. Era berean, gaurko lan saioan, LABeko Ekintza Sozialeko idazkari Bea Martxuetak hartu du hitza, eta Euskal Herriko Eskubide Sozialen Karta dela alternatiba nabarmendu du.

Euskal Herriko Eskubide Sozialen Karta egungo egoera sozioekonomikoa eraldatzeko xedez sortutako tresna da eta natura zein pertsonak erdigunean izango dituen eredu sozial berri baten ardatzak biltzen ditu; oinarrizko eskubide sozialak, hain zuzen ere. Hauxe da Gabi Zimmerri azaldutakoa, kartaren ale bat ematerakoan. Euskal Herrian burujabetza prozesu bat martxan jartzen ari garela jakinarazi diogu, eraldaketa soziala gauzatzeko bidean. 

Ezberdinen arteko aliantzen eta mobilizazio sozialaren beharraz hitz egin dugu, eta alternatibak lantzen ari garela nabarmendu dugu. Alternatiben Herria dinamika kokatu dugu hor.

LABeko kide Edurne Larrañagak eman dio Zimmerri kartaren ale bat, ELAko Mikel Novalekin batera, biak Euskal Herriko Eskubide Sozialen Kartaren ordezkari gisa.

Euskal Estatua, hizpide
Nazioarteko jardunaldien gaurko lan saioan LAB egon da gonbidatuen artean, eta sindikatuko Ekintza Sozialeko idazkari Bea Martxuetak hartu du hitza. Hain zuzen ere, Euskal Herriko Eskubide Sozialen Karta alternatiba gisa aurkeztu du, eredu ekonomikoa eta soziala errotik aldatzeko. Prozesu horren baitan Euskal Estatuaren sorrera kokatzen dugula nabarmendu du.

Martxuetak aipatu du Euskal Herrian hiru politika nagusi daudela eskubide urraketen atzean: euskal enpresetan lan erreformak aplikatzea, emakumeak diskriminatzea eta babes-sistema eraistea, horrek lan merkatutik kanporatutako langileengan dituen ondorio lazgarriekin. Honi guztiari aurre egiteko Euskal Herriko Eskubide Sozialen Karta dela alternatiba berretsi du: “Bestelako Euskal Herria posible dela esaten dugu bertan”.

Jarduera ekonomikoa pertsonen zerbitzura, natura eskubideen jabe, elkartasun kolektiboa bizitzaren iraunkotasunerako, emakumeen aurkako indarkeriarik gabeko bizitza, kalitatezko enplegu duina, osasunerako eskubidea, hezkuntzarako eskubidea, etxebizitzarako eskubidea, kultura, hizkuntza eskubideak… hainbat eskubideren jabe izan behar dugula aldarrikatu du Martxuetak. “Hau dena aurrera ateratzeko, parte hartze sozial aktiboa behar dugu egin, mobilizazio soziala ardatz duen prozesu iraunkorra eta euskal instituzioen borondate politiko aldaketa, honen arabera jarduteko”, erantsi du.
 

 

 

Langabezia, murrizketak eta gastu militarraren aurka kalera ateratzeko deia egin dugu Ezkerraldean

admin
-
0
Langabezia, murrizketak eta gastu militarraren aurka kalera ateratzeko deia egin dugu Ezkerraldean

Hainbat eragile sozial eta sindikaletako ordezkariek, LAB sindikatuko zenbait kidek tartean, elkarretaratze bat egin dugu gaur Barakaldon, BEC-en aurrean, bertan egiten ari diren enpleguaren eta azpikontratazioaren azoka dela eta. Larunbatean Santurtzi eta Sestao lotuko dituen martxarako deia egin dugu bertaratutakoek, Ezkerraldean bizi den egoera prekarioa salatu eta gero.

Hauxe da larunbateko martxaren harira eragile sozial eta sindikalok egindako irakurketa:

Hilez hil Ezkerraldea da nagusi langabezia eta pobrezia tasetan: 20.000 langabetu; biztanleria aktiboaren % 19, hain zuzen. % 73k ez dute inolako langabezia-sorospenik. Horretaz gain, lanetiko kaleratzeak eta kontratu prekarioak ditugu eskualdeko enpresa nagusietan.

Egoera are larriagoa da emakumeen errealitateaz hitz eginez gero. Langabezia-tasa %22koa da. Horri prekarietate-tasa handia gehitu behar zaio: zerbitzu-sektoreko (dendak, ostalaritza, garbiketa… ) langileen % 84 emakumeak dira. Horrekin batera lanaldi partzialeko kontratuak: horien % 78 emakumeek beteta; edo behin-behineko kontratuak, emakumeen % 28k beteta. Ezkerraldeko emakumeek soldata-diskriminazio argia jasaten dute: beren soldata % 26 txikiagoa da.

Era berean, gazteen artean langabezia %32koa da. Krisialdi ekonomikoaren azken bost urteotan, mila inguru izan dira Estatu Espainoletik kanpo joan diren Ezkerraldeko gazteak.

Langabezia eta babesgabetasun handi horiek gizartean dauden desberdintasunak areagotzea dakarte: lagunen % 8,6k mantenu-pobrezia jasaten dute; %2’1ek pobrezia metagarria; eta % 5,2ek muturrekoa. %13,6ek ongizate hutsunen bat jasaten dute. Hiru aldiz handiagoa da emakumeek jasaten duten pobrezia. EAEko pobreziaren % 25 Ezkerraldean biltzen da.

Horren ondorioz, gero eta familia gehiagok jotzen dute Caritas-era, Gurutze Gorrira edo Elikagai Bankura. Zehazki, 21.500 familiak bizirik irauten dute erakunde ongigile horien laguntza lanari esker.

Kontuan hartu behar da Ezkerraldean astean behin 9 familia etxegabetzen dituztela.

Hori ikusita, egungo krisi ekonomikoaren ondorioak jasatzen ditugunok – gainera, haren erantzuleak ez gara- kalera irtengo gara, alde batetik, eskualdeko enpresetako langabezia egoerak, kaleratzeak eta EEEak (ERE) salatzeko; etxe-kaleratzeak eta gizarte babesean izandako murrizketak salatzeko… Eta bestetik, dagozkigun Eskubide Sozialen eta duintasunaren alde egiteko, enpresari, bankari eta politikari ustelen aurrean.

Arrazoi horiek guztiak direla eta, dei egiten diegu Ezkerraldeko bizialgun guztiei parte hartzeko datorren larunbatean, ekainaren 10ean, “Santurtzitik Sestaorako Ezkerraldearen aldeko Martxa” mobilizazio jendetsua izan dadin; Santurtziko parketik abiatuko da eguerdiko 12etan. Aurten, gainera, hogeigarren urteurrena beteko du.

Laburbiltzeko, ekimen hau gure eskualdeak jasaten duen gizarte haustura larria salatzeko sortu da, hain zuzen ere, langabezia-indize kezkagarriak, lan prekarietate handia, pobrezia egoerak eta etxe-kaleratzeak ugariagoak direla-eta dugun gizarte haustura; gizarte arloan murrizketak salatzeko: udal gizarte-zerbitzuetan, gizarte-prestazioetan eta zaharrentzako laguntzetan.

Baina egoera hauek ez dira berez sortzen. Administrazioek neurriak sustatu dituzte, langileek, eta herritar guztiek, dituzten lan eskubideak eta eskubide sozialak murrizteari begira. Eskualdeko udalak izan dira lehenengoak murrizketa politika eta zerbitzu publikoen pribatizazioa bultzatzen. Horrek larriagotu egin du egungo krisialdi ekonomikoak jota dauden milaka familiaren egoera.

Gizarte eta lan arloan murrizketak egiten diren bitartean, ikusten dugu zer-nolako diru-xahutzea dakarren gastu militarrak: 33.762 milioi euro, 2017.urte honetarako Estatuaren Aurrekontu Orokorrei esleitu dizkietenak; horietatik, kupoaren bidez, 500 milioi ateratzen dira EAEtik.

Era berean, gerra-gatazkei ihes egiten dieten milioika lagun errefuxiatuei elkartasuna adierazteko izango da mobilizazio hau. Errefuxiatuoi ez zaie inolako eskubiderik aitortzen; eta, gainera, haien aurka NATOren gerraontziak bidaltzen dituzte, Europara ez iristeko.
 

 

 

Akordio duina nahi dute AZTIko langileek

admin
-
0
AZTIko langileek errespetu gehiago eskatu dute, eta euren gaitasuna eta ahaleginak aintzat hartzea, erosteko ahalmena eta lan-baldintza duinak ziurtatuko dizkieten hitzarmen baten sinaketaren bidez, soldata apalak, prekarizazioa, behin-behinekotasuna eta bermerik ezean oinarritutako zientzia eta ikerketa sistema gainditzeko.

Hauxe da AZTIko enpresa batzordeak kaleratu duen oharra:

Fundación AZTI – AZTI Fundazioa Euskadin erreferentziazko erakundea da ozeanografiaren, arrantzaren eta elikagaien ikerketan. AZTI-SIO izenarekin, eta izaera publikoa gordez, “Servicio de Investigación Oceanográfica”ren (SIO) eta “Arrantzarekiko Zientzia eta Teknologia Iraskundea”ren (AZTI) bat-egitearen ondorioz sortu zen. 1994.ean AZTI izena hartu zuen.

Eusko Jaurlaritzak erakundea pribatizatzea erabaki zuen 1997. urtean, Fundación AZTI – AZTI Fundazioa sortuz, itsasoaren eta elikagaien ikerketari bideratutako irabazi asmorik gabeko erakunde pribatua. Fundazio hau Eusko Jaurlaritza kide nagusi zen patronatu batek zuzentzen zuen. Hala, kontrola eta boterea mantentzen zituen, baina administrazioa konprometitu gabe. Gaur egun, arrantza-sektoreari patronatuko bi leku utzi ondoren eta kide berrien sarrerarekin, erakundearen kontrol publikoa lausotu egin da, nahiz eta egoitza nagusia eraikuntza publiko batean dagoen eta sorreran kide pribatuek 10 milioi pezeta bakarrik eman zituzten, Eusko Jaurlaritzak 270 eta AZTIk 384 jarri zituztenean.

2011az gero langileen soldatak izozturik daude, nahiz eta urtero, urte batean izan ezik, Fundazioaren emaitza ekonomikoak positiboak izan diren. Zuzendaritzak erakundearen jasangarritasuna erabili du neurria justifikatzeko arrazoitzat, eta hala onartu dute langileek krisiaren urteetan indarrean egon den hitzarmen kolektiboan. Gaur egun, enpresaren emaitzek eta aurreikuspen makroekonomikoek susperraldi bat erakusten dute. Hala ere, Zuzendaritzak ez du hori langileen baldintzen hobetzean isladatu nahi.

Urtebete luzez hitzarmen berria negoziatzen aritu ondoren, orain etenik dago negoziazioa Zuzendaritzak ez duelako onartzen soldatak KPIaren arabera eguneratzea. Aldi berean, erakunde txiki/ertain honetan dagoen goi-karguen ratioak (10 goi-kargudun 230 langilerentzat) ez du parekorik EAEko erakundeen artean. Gainera, azken urteotan, Fundazioak hainbat enpresatan inbertitu du, horietako batzuk zalantzazko errentagarritasuna zutenak edo zuzenean defizitarioak. Beraz, AZTI Fundazioko langileek sortzen dituzten irabazien xedea eztabaidagarria behintzat bada. Ez da dirurik egon gure erosteko ahalmena mantentzeko, baina bai zalantzazko enpresa-abenturetarako eta neurriz gaindiko goi-kargudun kopurua mantentzeko.

Konpromiso, motibazio, parte-hartze, bikaintasun eta ardura bezalako hitzek betetzen dituzte Zuzendaritzaren aurkezpen eta hitzaldiak, baina bere erabakietan ez dira agertzen esker on eta sustapen ekintzak. Izan ere, AZTIra sartu zenetik inolako sustapenik izan ez duen hainbat langile dago, askok 10 urte baino gehiago daramatelarik lanean, nahiz eta beraien lanbide-kategoriarekin bat ez datozen lanak egin eta ardurak hartzen dituzten. Askotan, lan bajak beteko dituen ordezkorik ez da hartzen eta, zoritxarrez, lan-gainkargak ohikoegiak dira.

AZTIko langileok errespetu gehiago eskatzen dugu, eta gure gaitasuna eta ahaleginak aintzat hartzea, erosteko ahalmena eta lan-baldintza duinak ziurtatuko dizkigun hitzarmen baten sinaketaren bidez. Ikerketa-zentro honetan akordio bat eskatzen dugu, soldata apalak, prekarizazioa, behin-behinekotasuna eta bermerik eza oinarri dituen zientzia eta ikerketa sistema bat iraunaraziko ez duena.
 

 

 

Eraldaketa feminista gauzatzera goaz

admin
-
0
Eraldaketa feminista gauzatzera goaz

Eraldaketa feminista premiazkoa dugu. Aldaketa hau gauzatzeak, Euskal Herri feminista eraikitzea eta LAB sindikatu feminista izateak gure teoria eta praktikan erabateko iraulketa ekarriko du. Erronka honi heldu nahi diogu eta aintzindari izateko borondatea dugu. Zentzu honetan aldaketak etxe barrutik hastea erabaki dugu eta urrats berri bat eman dugu gaur Gasteizen, eta bihar Iruñean, burutuko ditugun batzarretan.

LABek bere sorreratik erabaki hausartak hartu zituen eta sindikatua erreferente bilakatu zen. Emaiatzak agerikoak izan arren ibilbide luzea dugu aurretik. Egungo sistemaren erdigunean kapitala eta merkatuak daude eta bizitza erasotzen du. Honen aurrean eredu berria aldarrikatu eta eraikitzera egin behar dugu jauzi. Bizitzaren sostengarritasuna izan behar da gure helburua.

Bestelako eredu bat eraikitzeaz ari garenean, bestela bizi, ekoiztu, kontsumitu eta inguruarekin zein beste prestonekin harremanak izateko bestelako era batez ari gara. Bizi baldintza duinen aldeko borroka erdigunean kokatuko duen sindikatua izatera pasa behar dugu. Honek eragin zuzena izango du gure funtzionatzeko eta lan egiteko moduetan, egungo lan egiteko erak zalatzan jartzeraino.

Norabide honetan hainbat erabaki hartu ziren amaitu berri dugun Biltzar Nagusian. Hala nola kapital-bizitza konfliktoa eta bizitzaren sostengarritasuna erdigunean jartzea eta horien arabera antolatzeko egitura berriak sortzea. Erronka mardula da eta ezinbestez sindikatu guztia bustiko duena. Guztiok izan behar dugu prozesu horren protagonista eta subjektu aktibo. Horregatik lehenbiziko urratsa sindikatua osatzen duten emakume eta gizonekin datozen urteei begira hartuko dugun norabidea konpartitzea izan da.

 

 

 

Gasteizko Legebiltzarrean erregistratu dugu AHTri buruzko txostena

admin
-
0
Gasteizko Legebiltzarrean erregistratu dugu AHTri buruzko txostena

EKOPOLek, EHUko Ekonomia Ekologiko eta Ekologia Politikorako Ikerketa taldeak, AHTri buruzko lan bat egin du, LABek eta ELAk eskatuta. “Euskal Y-a: irtenbide gabeko atakan” da txostenaren izenburua, eta gaur jarri dugu Legebiltzarreko taldeen eskura, LABeko Urtzi Ostolozagak eta ELAko Nora Onaindiak Gasteizen erregistratu eta gero.

EKOPOLek egindako txostena joan den otsailean aurkeztu genuen komunikabideen aurrean. Orduan esandakoa berretsi du gaur Urtzi Ostolozagak.

Hain zuzen ere, gogoratu du langileok hasieratik egon garela Abiadura Handiko Trenaren proiektuaren aurka, langileon eta euskal jendartearen interesen aurkakoa delako. "Lan hau jasota, urteetan zehar esaten egon garenean berresten gara, proiektuaren alde daudenen aurrean. AHTk ez ditu euskal herritarron mobilizazio arazoak konpontzen, eta beraz, ez da beharrezkoa", adierazi du. "Izugarrizko kalte ekonomiko, sozial eta ingurumenekoak eragin ditu AHTren proiektuak, eta aurrerantzean eragiten jarraitzea ekidin behar dugu. Langileontzat onura sozial bakarra ez du ekarriko, bai irabazi itzelak enpresa gutxi batzuentzat, hori da justifikazio bakarra", erantsi du.

Txosten honekin diskurtso ofiziala desmuntatu eta borrokarako tresna berriak sortu nahi izan ditugula jakinarazi du, alternatibak badaudelako; "merkeagoak dira gainera, gaur egun martxan dagoenaren gainean inbertsioa egitea delako", berretsi du.
 

 

[BIDEOA] Kutxabank publikoa, iruzurrik ez!

admin
-
0

Cabieces auzian gertatutakoa eta herri akusazioak egindako lana azaltzen duen bideoa. Kutxabank publikoa, iruzurrik ez herritarroi!
 

 

 

“Asteburuan arriskuak hartzera behartuak egongo gara berriro”

admin
-
0
“Asteburuan arriskuak hartzera behartuak egongo gara berriro”

Etxeratek agerraldi bat egin du goizean Antiguako frontoian, sakabanaketak aurten eragindako seigarren errepide istripuaren harira. Hain zuzen ere, Asier Ormazabalen bi lagun, LABeko kideak biak, istripu berri baten biktima izan ziren larunbatean. Teruelgo espetxetik zetozen, eta Zaragoza inguruan izan zuten ezbeharra. Gaur arratsaldean, 19:00etan, elkarretaratze batera deitu dute Donostian, Antiguako Benta Berri plazan.

Sakabanaketa politikarekin amaitzeko exijitu dute gaurko agerraldian. "Asteburuan arriskuak hartzera behartuak egongo gara berriro", ohartarazi dute. "Etxean eta bizirik nahi ditugu", adierazi dute, eta sakabanaketarekin amaitzeko erabakiak ezin duela "gehiago itxaron" nabarmendu dute. "Sakabanaketa biktima berrien zain dago", deitoratu dute.
 

 

 

Prekarietateak hiltzen du, itsasoan ere

admin
-
0
Prekarietateak hiltzen du, itsasoan ere

Euskal gehiengo sindikaletik berriro exijitu nahi dugu arrantzale eta itsasgizonen osasuna gauza guztien gainetik bermatzea. Itsasontziak edozer istripu ekiditzeko prestatuak dauden pertsonak kontratatu ditzala, eta administrazioek eta armadoreek inbertitu dezatela dagokien diruak itsasgizonen osasuna bermatzeko. Elkarretaratze bat egin dugu gaur, Lekeition, ostiralean Nigeriako uretan gertatutako lan heriotza salatzeko.

Lehenego eta behin gure samiñik eta elkartasunik haundiena eman nahi diegu joan zen ostiralean Nigeriako uretan hil zen itsasgizonaren familiari. Baina zoritxarrez ezin dugu ahaztu joan zen astean beste bi langile ere hil zirela lan istripuetan. Eta jada 27 langile dira urte hasieratik lan istripuz hil diren langileak. 

Gaur egungo krisi ekonomikoak lanpostuak inoiz baino gehiago prekarizatu ditu, itsasoko lanetan diharduten pertsonei dagozkienak ere. Beraien lan baldintzak, istripu bat gertatu ez gero ezer ezin egina, ez medikurik, ez soroslerik, urruntasuna…
Batzuen aberasteko goseak langileen bizitzen kontura izaten dira. Eta ezin da onartu.
 

 

 

Lanuzteak EAEko Telelaguntza Zerbitzuan, kalitatezko zerbitzu eta lan-baldintzen alde

admin
-
0
Lanuzteak EAEko Telelaguntza Zerbitzuan, kalitatezko zerbitzu eta lan-baldintzen alde

Telelaguntzako zerbitzua kudeatzen duen merkataritza enpresak, Tunstall Televida-GSR-IMQ Aldi Baterako Enpresa-elkarteak alegia, eskaintzen duen zerbitzuaren kalitatea jaisten ari da, beti ere, haren irabaziak handitzeko helburuan. Honez gain, azpimarratu behar da, 2011ko uztailaz geroztik, 85 langile izatetik 105 langile izatera igaro dela, baina zerbitzuaren erabiltzaile kopurua 21.000 izatetik 45.000 izatera igaro da. Elkarretaratze bat egin dugu goizean egoera salatzeko, eta, era berean, lanuzteei ekin diegu gaur bertan.

EAEko Telelaguntzako Zerbitzu Publikoa Eusko Jaurlaritzaren eskuduntza da; hark erabaki zuen azpikontratatuko egin zuela zerbitzu publikoa, lehiaketara atereaz.

Hau guztia are larriagoa da, kontutan hartzen badugu zerbitzua Tunstall Televida-GSR-IMQ Aldi Baterako Enpresa-elkarteari esleitu ziotela duela 9 hilabete, gutxi gorabehera, 15.000.000 euroren truke, aurreko esleipean baino miloi bat euro gehiagorekin. Horrela, ia 5 milioi eurotako izan da enpresa horrek diru publikotik lortu duen irabazi-marjina.

Ahalik eta mozkin gehien lortzeko, zerbitzua kudeatzen duen Aldi Baterako Enpresa-elkartea, lehenengo eta behin, aldatu egin du erabiltzaileen lesiorik eragin gabeko erorketen protokoloa, enpresako langileak bidali baino (urte askoan halaxe egin zen, eta hura erabiltzaileek eta senideek ondo baloratu dutena) nahiago dute senideei deitzea erabiltzaileak jasotzeko, eta ondorioz, atzeratu egiten da maiz laguntza. Jokabide berri horrek senideen eta erabiltzaileen hamaika kexu ekarri du; kexuok ez dira administraziora iristen. Honela, enpresak bere langileen parte hartze kopurua murriztu nahi izan du, eta laneko txandak ezabatu eta azpikontratazioaren bidez ordezkatu izana justifikatu.

Hau guztia gutxi balitz ere, eta ekipamenduak instalatzeko epe berriak bete daitezen, alta berriak eman direlako, eta era berean, erabiltzaile berrien balorazioa egiten duten langileek bisitak egin behar dituztenez, Tunstall Televida-GSR-IMQ Aldi Baterako Enpresa-elkarteak langile kopurua handitzearen hautua egin baino, zerbitzu beraren muina erabat aldatu nahi du, egun arte eskaintzen zen zerbitzu teknikoari dagokionez. Horretarako, erabiltzaileen etxebizitzetara ekipamendua bidaltzea azpikontratatu du, eta bide batez, teknikariek instalatu beharrean, haiei dagokielako aipatu eginkizuna urte askotan egin den antzera, gizarte lanak betetzen dituzten langileek egin ohi dute. Enpresak jarduteko modu berriaz diharduenez, telelaguntzako zerbitzuaren kalitatea urrituko dela igarriko da: beranduago, behin baino gehiagotan joan beharko dutelako teknikariek, gizarte lanetaz arduratzen direnak gauza izango ez direlako tresneriaren instalazio zuzena egiteko. Horrek eragingo du senideek beste egun bat bertan egon behar izango dutela, zegokion unean ezin izan delako ekipamendua instalatu.

Eusko Jaurlaritza da honen konplizea, gaur gaurkoz ez duelako ezer egiten egoera zuzen dadin, are gehiago, haren esku dagoenean egoera zuzentzeko eskumena zerbitzuaren titularra izanik.

Honengatik guztiarengatik, zerbitzuan dihardugun langileok erabaki dugu mobilizazioei ekingo diegula egoera hau salatzeko. Era berean, jasotzen den zerbitzuaren kalitatea urritu izanak eragin senideak eta erabiltzaileak animatzen ditugu kexuak luza ditzaten, Eusko Jaurlaritzaren herritarrentzako zerbitzura deituz (012) edo bestela, Eusko Jaurlaritzara joz.

Hauek dira aurreikusitako lanuzteak:

-Ekainak 6, 10, 12, 17, 19 eta 24. 11etatik a 13etara eta 18etatik 20etara

-Ekainak 30: 10etatik 20etara.

-Uztailak 1: 11etatik 13etara eta 18etatik 20etara.
 

 

 
1...906907908...1,583Page 907 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus