2026-04-13
Blog Page 840

Espainiako Gobernuak EAE eta Nafarroarako ateratako lanpostu publikoen eskaintza berrian euskaraz jakitea aintzat hartzea eskatzen dugu

admin
-
0
Lan eskaintza honetan nabari daitezkeen hizkuntz urraketen inguruan ezer ere esan ez duten EAE eta Nafarroako Gobernuei beraien lurraldeetako administraziopeko langileon hizkuntz eskubide eta lan baldintzak irmoki defenda ditzaten eskatzen diegu; erabakitzeko gaitasuna Euskal Herrian koka dadin baldintzak sortuz, eta Madrilen aurrean jarrera epelak alde batera utziz.

LAB sindikatuak, mota honetako erabakien kontra bere jarrera irmoa erakutsi du, langile zein herritarren hizkuntza eskubideak defendatuz.

Estatuko administrazioak publiko egin berri duen lan eskaintzan, sarrera askeko 2.180 lanpostu eta barne lehiaketa bidezko 2.545 lanpostu iragarri dira. Lehenik eta behin, Javier de Andres Espainiako EAEko ordezkariak pasa den astean egindako agerraldian eskaintza horretatik EAErako 340 plaza direla esatea salatu nahi du LABek. Nondik atera du informazio hori? Sindikatuok ez dugu horren berririk, Estatuko Aldizkari Ofizialean ateratakoa soilik. Bertan, Estatu Mailan zenbat izango diren soilik azaltzen da.

Lanpostu horietan ez da euskara aintzat hartuko, ez eskakizun gisa, ezta meritu gisa ere. Abokatu eta kontu-hartzaile lanpostuetarako, ordea, ingelesa edo frantsesa menperatzea lanposturako derrigorrezko eskakizuna da. Nola liteke?

Honek, administrazioren euskalduntzean atzera urrats nabarmenak dakartza LABen ustez. Langileen hizkuntza eskubideak urratzeaz gain, langileek eskubidea baitaukate euskara jakiteko, herritar ororen hizkuntza eskubideak ere, ez dira bermatzen; horrelako lan eskaintza publikoei bide emanez gero, lehen harrera euskaraz izatea ere ez delako ziurtatzen.

Javier de Andres Espainiako EAEko ordezkariak dioenez, herritarrek aukera gehiago izango dituzte administrazio publikoko lanpostu batera sarrera izateko. LAB ez dago batere ados horrekin, horrela langileei aukerak murriztu baino ez zaizkielako egiten.

Langileok eskubidea dugu euskara jakiteko, eskubidea dugu lana euskaraz egiteko, eta baita, lanean euskaraz aritzeko ere. Mota honetako lan eskaintzek eskubide hauek bermatu beharko lituzkeen administrazioa bera, eskubideurratzaileizatea ahalbidetzendute;

Herritarroi adarra jo nahian?

Lan eskaintza berri honekin berriro ere, argi geratzen da Espainiako Gobernuak euskararekiko eta euskaldunekiko duen jarrerarekin ez dugula sekula, ez administrazioa, ez Euskal Herria ere euskaldunduko. Horregatik, langile eta orohar hiritarron hizkuntz eskubideak bermatuak izan daitezen gure administrazioa nolakoa izango den erabakitzeko gaitasuna izan behar dugula adierazi nahi du LABek.

Bukatzeko, LABek adierazi nahi du, honen berri Hizkuntza Eskubideen Behatokiari helaraziko diola, behar den gisako salaketa jarriz.
 

 

 

Pailazoz jantzita mobilizatu dira Garbialdiko langileek, euren lan gatazka “graziarik gabeko txistea” dela salatzeko

admin
-
0
Pailazoz jantzita mobilizatu dira Garbialdiko langileek, euren lan gatazka “graziarik gabeko txistea” dela salatzeko

Bizkaiko Foru Aldundiko zentroak garbitzen dituzten langileek, Garbialdi enpresakoek, protesta egin dute gaur instituzio honen egoitzaren aurrean. Garbialdi enpresak eguneko 0,14 eurotako soldata igoera eskaintzen die 5 urtez soldatak izozturik izan eta gero, eskubide sindikalak ukatzen dizkie eta, gainera, baldintza duin batzuen defentsan mobilizatzeko duten modua kritikatu egiten du. Eros ahalmenaren galerak hilabete amaieran malabareak egitera behartzen ditu langileak. Negoziazioa mahaiak, non ez duten inoiz ezer berririk eskaintzeko, graziarik gabeko txistea bilakatzen hasi dira. Eta euren mobilizazioen inguruko kritikek erabat tristatzen dituzte. Honela gauzak, ez dago euren egoera pailazo tristearena baino hobeto adieraziko lukeen mozorrorik. Horrexegatik, euren jantzi dotoreenekin apaindu eta berriro ere Aldundiaren aurrean mobilizatu dira hitzarmen duin baten defentsan.
 

 

 

Dei egiten diegu pentsionistei kalera irtetzeko 1.080 euroko gutxieneko pentsioen alde eta Euskal Herriarentzat babes eta segurantza sozialeko sistema propioaren alde

admin
-
0
Dei egiten diegu pentsionistei kalera irtetzeko 1.080 euroko gutxieneko pentsioen alde eta Euskal Herriarentzat babes eta segurantza sozialeko sistema propioaren alde

PP zein PSOEk egindako pentsioen erreformak baztertzen ditugula adierazteko, eta %0,25arekin konformatzen ez garela esateko, gure eros-ahaleman murrizten duelako, eta lapurtu digutena pentsio publiko duinak bermatuz, otsailaren 19tik aurrera euskal pentsionisten plataformek iragarrituako mobilizazioetan parte hartzeko deia egiten dugu, euren aldarrikapenak geure eginez.


LABen Heldu eta Pentsionisten arloak 680.000 euskal pentsiodunak euren eskubideen alde kalera borrokara ateratzera animatu nahi ditu. Urte asko daramatzagu arlo honetako kideok orain eta etorkizun iraunkor baten alde borrokan. Horregatik, bi Greba Orokor deitu genituen pentsioen aurkako azken erreformen kontra. Pobretze politikek ondorio berdinak dituzte esparru honetan, Toledoko Itunaren akordiorik edo gabe: gure bizitza proiektua higatu, prestazioak eskuratzea zaildu eta euren zenbatekoa jaitsi.

Bañez Ministroak bere gutunarekin egin duena iraina da pentsiodunontzat. Miseriazko pentsioa kobratzeaz gain igoera irrigarriarekin zigortzen zaigu, eros-ahalmena galtzera eramaten gaituena

Gero eta suminduago daude kaleak gaur. Duela gutxi, Hego Euskal Herriko Pentsiodunen plataformek 71.724 sinadura aurkeztu zituzten Gasteizko legebiltzarrean eta beste 7.600 Iruñekoan eta ikusi genuen nola EAJ, PSOE, PP eta UPNk euren bidezko aldarrikapenak nola baztertzen dituzten ikusi ahal izan genuen. Nahikoa da!

Argi eta garbi esaten dugu kokoteraino gaudela pentsionistak horrela mespretxatzen dituzten politikariez, bien bitartean eskandaluzko soldatak kobratzen dituztenak eta inolako zalantzarik gabe bankari laguntzen diotenak, pobreziaren atalasetik beherako pentsioak jasotzen dituzten pentsionistak botata uzten dituzten bitartean.

Ezin dugu Estatutik askorik espero, ezta babesa ematen diotenengatik ere. Ez dugu nahi gure izenean erabaki dezaten nola bizi behar dugun. Ez dugu ikusi nahi nola murrizten diren gure pentsioak urtetik urtera eta nola okertzen diren gure bizi-baldintzak. Ez dugu behar Madrilek erabakitzen duena kudeatzea, politika neoliberalak kudeatzeak esan nahi baitu Estatutik datozen murrizketak kudeatzea, bizi bizigarri eta iraunkorrak bermatzeko gaitasunik eta ondorioz, aukerarik gabe.

Ia 40 urte pasa dira estatutua bete zenetik eta bete gabe jarraitzen du. Gure ustez, horrenbeste urte igaro ondoren ezin da ibili transferentzien eskean. Eta honetan ari da Eusko Jaurlaritza. Hemen bizi bagara eta hemen egiten badugu lana, hemen erabaki nahi ditugu gure pentsioak. Horregatik nabarmendu nahi genuke estatus berriak pentsio sistemari dagokionez gaitasun arautzailea osoa izan beharko lukeela. Babes eta Gizarte Segurantzako Sistema Propioa, pentsio publiko duinak izatea bermatzeko balioko duguna, orain eta etorkizunean, 1.080 eurotako gutxieneko zenbatekoa izango duen pentsioa, Europako Karta Sozialak zehazten duen moduan.
 

 

 

Garraiolarien lan baldintzak salatu ditugu Iruñean

admin
-
0
Garraiolarien lan baldintzak salatu ditugu Iruñean

Garraiolari bat hil zen larunbatean Oronoz-Mugairin, eta dagoeneko, gutxienez, hamar langile hil dira urtea hasi denetik; horietako bost garraiolariak. Azken lan heriotza salatzeko, elkarretaratze bat egin dugu gaur Iruñean, euskal gehiengo sindikalak deituta, Nafarroako Gobernuko errepideen mantenuaren ardura duen zerbitzuaren egoitzaren aurrean. Hain zuzen ere, N-121-A errepidearen arriskua salatu dugu, bertan gertatu baitzen istripu hilgarria.
 
Pasa den larunbatean, otsailaren 10ean, N-121-A errepideak bertze langile baten bizia eraman zuen. Lan istripua arratsaldeko 17:23 orduetan gertatu zen N 121-A (Iruñea-Behobia) errepideko 39. kilometroan Zozaia (Oronoz-Mugaire) parean eta Iruneko norabidean. Hilik suertatu den langileak 55 urte zituen eta Almerian bizi zen. Kamioia atseden-gunera ateratzen ari zela zuhaitz batzuen kontra jo zen.

LAB sindikatutik lehenik eta behin gure elkartesuna eta babesa helarazi nahiko genioke lanean ari zela hildako langilearen senitarteko eta ingurukoei. Hau izan da urte hasieratik Nafarroan hil den lehen langilea eta honekin, 10 dira gutxienez urte hasieratik Euskal Herrian hildako langileak.

N-121-A errepidea Nafarroan egunero trafiko handienetakoa duen errepidea da, zenbait autobidek baino gehiago. Egunero 10.000 ibilgailu ibiltzen dira errepide honetan eta horietatik heren bat kamioiak dira. Izugarrizko trafiko bolumena jasaten duen errepidea da, nazioarteko garraioaren ia osotasun guzia hemendik pasatzen delarik. Argi diogu: errepide hau ez dago, inolaz ere prestaturik, egunero pairatzen duen trafiko bolumena jasateko. Eta egoera horreri gehitu beharra zaio azkeneko hilabeteetan, autopistan kamioei kobratzen hasi direnez, bertatik pasatzen diren kamioi kopurua handitu dela eta errepidearen egoeran aunitz sumatzen dire horren ondorioak, geroz eta zulo gehiagorekin eta asfaltoaren egoera kaxkarrarekin.
Tamalez ez da lehenengo aldia langile bat errepide honetan hiltzen dena, denoi heldu zaizkigu istripuak burura. Zoritxarrez zerrenda luzeegia da.

Loteria makabro bat da gaur langile honen bizitza moztu duena, baino edozein momentutan errepide hau erabiltzen ahal duten milaka eta milaka pertsonei tokatu ahal zaiena. Errepide nazional batez ari gara solasean, inondik ere daukan trafikoaren pisua jasateko gaitasunik ez duena duena, batez ere Leitzarandik joateak kamioientzat kostu ekonomiko handiagoa suposatzen duenez N-121-A errepidetik pasatzen joaten direlako. Eta maiatzatikan aintzinerat, zazpi hilabetez guttienez, egoera honek okerrera eginen du, zazpi hilabetez Belate eta Almandozeko tunelak itxiko dituztelako eta Belateko porututikan desbideratuko delakoz trafikoa. Garraiolariek argi utzi dute jada portu zaharretikan baldin bada ere, hemendikan joaten segituko dutela.

Aurreko Nafarroako Gobernuek inoiz ez dute errepide honen egokitzapena beraien lehentasunen artean izan, eta egin duten gauza bakarra egoerari partxeak jartzea izan da, arazoaren erroetara joateko borondaterik ez zegoelako. Baino ez da partxeak jartzeko garaia, irtenbideak bilatzekoa baizik. Errepide honen erabiltzaileak nazkatuta daude.

Aipatutako guztiarengatik LAB sindikatutik Nafarroako Gobernuari behingoz egoera honi soluzioak bilatzen inplikatu dadila eskatzen diogu, tunelak Europako araudirat egokitzeaz gain, berriz ere horrelako idatzirik idatzi behar ez izateko.

Gaiaren inguruan eztabaida ireki eta parte hartzailea zabaltzeko momentua da, jendartearen eskutik eta eragile sozial eta politikoen iritziak kontutan hartuta.

 

 

EUSTATeko enplegua duindu eta egonkortzearen alde egiten dugu, pribatizazio eta prekarietateari amaiera emanez

admin
-
0
EUSTATeko enplegua duindu eta egonkortzearen alde egiten dugu, pribatizazio eta prekarietateari amaiera emanez

Aurreko astean, hurrengo 4 urtetarako Estatistika Plana aurkeztu zen, horrekin batera, Gobernuak aurkeztu duen Lan Postuen Zerrendari alegazioak egiteko epea bukatu zen. Bi gertaera hauek EUSTATeko langileentzat oso garrantzitsuak izan dira, batetik, gobernuak egindako lanpostuen zerrendarekin lan prekarioa betikotu nahi dutelako, eta bestetik iragarri zituzten ikerketa lan guztietatik, %80 pribatizatuko dutelakoan gaudelako. EUSTATeko langileek, gehienak emakumeak, 30 urte daramate euren egoera salatzen, eurentzat lanik ez dagoela esaten diete eta enpresa pribatuak kontratatzen dituzte langileak langabezian uzten dituzten bitartean. Hori da Eusko Jaurlaritzak martxan jarri nahi duen enplegu plana, prekarizazioan eta pribatizazioan oinarrituta. Hau guztiari buruz hitz egiteko, Eustat eta Eusko Jaurlaritzako LABeko delegatuek agerraldi bat egin dute gaur Bilbon.

Hauxe da langileek gaurko agerraldian egin duten irakurketa:

Gobernuak Pribatizazio politikan sakontzen du, eta antolaketa tamalgarri batekin EUSTAT institutua prekarietatera kondenatzen du.

Aurreko ostiralean bukatu zen Gobernuak, mahai sektorialean sindikatuoi aurkeztu zigun EUSTATeko lanpostuen zerrendari alegazioak aurkezteko epea. LAB sindikatuak bere alegazioak aurkeztu ditu.

Gure alegazioekin, betidanik langileok borrokatu dugun helburu berdina aldarrikatu nahi izan dugu: langileon prekarietatearekin bukatzea. EUSTATeko langileok Gobernuak eman dituen azken urratsekin oso kezkatuta gaude, prekarizazioan sakontzeko bideari eusten diotelako.

Gaur egun arte, bizi izan dugun egoera behin eta berriro instituzio ezberdinetan, Parlamentuan edo Arartekoan adibidez, salatu ostean eta, Eusko Jaurlaritzak gure eskubideak urratu eta gero, epaitegietan lortutako epaiei esker, mugagabe diskontinuo ginela zehazten dutenak, egiturazko lan postuak sortzera behartu dugu administrazioa. Eusko Jaurlaritzak, gaur egun EUSTAT institutuan egin duen kudeaketa tamalgarriarekin batera langileon kalterako eta gure lan baldintza prekarioak betikotzeko tresna bihurtu du aurkeztutako lan postuen zerrenda. Prekarietatera, ezegonkortasunera eta zenbat, nola eta non lan egingo dugun ez jakitearen zalantzara kondenatzen gaituzte.

Urtero, EUSTAT institutuak egin behar dituen ikerketa lan gehienak edo Jaurlaritzako sail ezberdinetatik egiten direnak enpresa pribatuen bitartez egiten dira. Aurreko asteazkenean, 2018-2022 Estatistika planaren aurreproiektuaren legeari bide eman zitzaion. Aurreproiektu horretan iragarri zuten 228 ikerketa lan egingo zituztela eta urtero 18 miloi euro inbertituko zutela. Zoritxarrez, aurreproiektu horretako lan karga gehiena enpresa pribatuen esku geratuko da, guk, EUSTATeko langileok, 4 edo 6 hilabetetako kontratuak ditugun bitartean. 228 ikerketa horietatatik 12 edo gehienez, 15 baino ez dira egingo Eustateko langileen bitartez. Lan karga horrekin, epaia dugun langileok 4 edo 6 hilabetetarako kontratuak baino ez ditugu izango, administrazioak dauka sailkapen maila baxuena aplikatuz.

Urtarrilaren 22an argitaratu zen EAEko aldizkari ofizialean azkenengo ikerketa pribatizatzeko iragarkia, guk langabezian jarraitzen genuen bitartean. EUSTATen lan karga Enpresa pribatuen eskuetan uzten da, gu langabezian utzita. Hori da, Eusko Jaurlaritzak martxan jarri nahi duen enplegu plana? Hori da instituzio publiko batek sustatzen dituen lan baldintzak?

LAB sindikatutik Eusko Jaurlaritzari Parlamentuak adierazitakoa bete dezala eskatzen diogu, zeinak EUSTATi eskatzen dion egoera honi konponbidea ematera eta egungo langileei lanpostua lanaldiaren %100arekin bermatzera eta EUSTAT zerbitzu publikoaren eta langileon lan-baldintzen defentsan benetako apustua egin dezala. Negoziazioaren bitartez, enplegu duina lortzeko urratsak eman ditzala eskatzen diogu Eusko Jaurlaritzari. Pribatizazio politika alde batera utzita, ikerketa guztiak EUSTATen esku uztea exijitzen diogu, merkeagoa delako, kalitateko enplegua bermatzeko bidea delako eta emakumeok osatzen dugun kolektibo honetan behar dugun duintasuna eta egonkortasuna zor digutelako. 
 

 

 

Greba mugagabean jarraitzen dute Selectako langileek

admin
-
0
Greba mugagabean jarraitzen dute Selectako langileek

Nafarroako Selecta enpresako langileak pasa den ostiraletik greba mugagabean daude, eta mobilizazio ezberdinak antolatu dituzte. Egunero elkarretaratzeak egingo dituzte, 11:00etan Noaingo sarreran dagoen biribilgunean, fusioaren ondorioz aurkitzen diren egoera salatzeko.

2017ko abenduan, Pelican Rouge, Demas eta Selecta enpresen arteko fusioa adostu zuten. Hilabete geroago, neurri ezberdinak azaldu zituzten, horien artean, Nafarroako langileen kaleratzeak eta lan baldintzen kaskartzea. Egoera honen aurrekariak beste 2 ERE gehiago azken 6 urteetan izan dira, nahiz eta azken urteetan delegaritza honen emaitzak oso positiboak diren, eta jarraitzen duten izaten.

Egoera honi aurre egiteko, Nafarroako delegaritza honetako langileak greba mugagabean daude, eta mobilizazio ezberdinak antolatu dituzte,  langileak diren heinean, beraien eskubideak defendatzen jarraituko dutelako.
 

 

 

Egia, aitortza, erreparazioa eta ez errepikatzeko bermea aldarrikatu ditugu torturaren aurrean

admin
-
0
Egia, aitortza, erreparazioa eta ez errepikatzeko bermea aldarrikatu ditugu torturaren aurrean

Torturaren kontrako eguna da gaur, otsailaren 13aren etorrerarekin. Komisaldegian hamar egunez torturatu ondoren hil zuten Joxe Arregi 1981eko otsailaren 13an, beste asko bezala. Izan ere, gure herria astindu duten indarkeria guztietatik torturak ez du oraindik benetako aitortzarik. Estatuak ez du torturatu duenik onartu ere egiten. Eta guk badakigu estatu tresna izan dela urte askoan.

Torturaren kontrako hainbat mobilizazio daude deituta datozen egunetarako. Gaur, elkarretaratzeak egongo dira Gasteizen (19:00etan Correosen) eta Iruñean (19:30ean Merindadesen). Bilbon, manifestazioa egingo dute ostiralean, otsailaren 16an, 19:30ean Eusko Jaurlaritzatik. Kalera kalera dinamikak Irunen antolatu ditu ekitaldiak: gaur, Palmera-Monteron, 19:30etik aurrera egingo den hitzaldia eta, otsailaren 17an, 13:00etatik aurrera Urdanibia plazan egingo den ekitaldia.

LABek dei egiten die langileei ekitaldietan parte hartzera. Era berean, torturaren aurka beste leku batzutan antolatutako ekimenetan parte hartzeko deia ere egin nahi du sindikatuak.

Milaka izan dira orain arteko tortura kasuak, Euskal Autonomia Erkidegoan Jaurlaritzaren enkarguz egindako txostenak 4.113 tortura kasu egiaztatu ditu eta Nafarroan 700 kasutik jaso ditu Euskal Memoriak. Honen aurrean, egia, aitortza eta erreparazioa ezinbestekoak dira, ukazio ororen gainetik. Bestalde, tortura ez errepikatzeko bermeak ezarri beharko lirateke, inpunitate egoerak gaindituz.

Honetaz, gainera, LABek gogora ekarri nahi du Sarek torturatuak izan diren presoen sententziak berrikustea planteatu zuela, 2017ko irailean egindako ekitaldian, beste aldarrikapen batzuekin batera.

Elkarbizitzari begira, garrantzia du iraganean gertatutakoaren inguruko egia zehazteak, egondako tortura kasu ugariak aitortu eta erreparatuz, eta horrelakorik ez errepikatzeko bermeak emanez.
 

 

 

Ez dugu aurreakordiorik sinatu Bilboko TAOren gatazkan

admin
-
0
LABek bi arrazoirengatik ez du aurreakordioa onartzen. Alde batetik, kaleratutako 7 pertsonak baldintzarik gabe berronartzeko exijitu zuten langileek, abenduko batzarrean. Bada, gure iritziz, aurreakordioak baldintzak ditu. Bestalde, erosketa ahalmenaren galera bat dago. 2011. urtean amaitutako hitzarmen bat da, eta ez du inongo igoerarik izango 2018. urtera arte, eta igoera horiek, egoera onenean, KPI-aren erdia litzateke. Gainera, soldata izozteko aukera legoke hitzarmenaren hiru urteko iraunaldian. Ezezko botoa eskatzen dugu gaurko asanbladari begira.

Batzarra 9:00etan hasi da. Ezin dugu aurreakordioaren edukiari buruzko datu gehiagorik aurreratu, baina batzarraren ostean azalduko du LABek, atalez atal, zergatik ez duen aurreakordioa onartzen. Gure iritziz, langileek kontra bozkatu beharko lukete.
 

 

 

N-240 errepidean ematen den ezbehar-kopuru altua salatzeko ekintza

admin
-
0
N-240 errepidean ematen den ezbehar-kopuru altua salatzeko ekintza

Pesalur enpresako langile-batzordeak elkarretaratzea egin du gaur, astelehena, Usansoloko Labea auzoan, azkenaldian N-240 errepideko puntu honetan izandako istripuak salatzeko. Besteak beste, bi langile hil ziren otsailaren 1ean gertatutako lan istripu batean: Bizkaibus enpresako gidari bat eta kamioi-gidari bat.
 

 

 

1...839840841...1,607Page 840 of 1,607

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus