Epaiketa egin zuten Bilbon joan den asteartean, amatasun baimena hartu zuen langile batek jarritako salaketa dela eta. Bada, Zornotzako Abrasivoz Texajax enpresako langile horri babesa eman zioten larunbatean, Zornotzan, manifestazio baten bitartez.
Blog Page 819
Akordioa sinatu dugu Heziketa Berezian
Grebak borrokarako tresna gisa ulertuta emaitza onak ematen dituela erakusten du akordioak.
Gaurko Heziketa Bereziko mahai negoziatzailean akordioa sinatu du LABek, STEILAs eta CC.OO.-ekin batera. Akordio hau hurrengo ikasturtetik aurrera indarrean sartuko da eta langileen lan baldintzetan zein eskaintzen den hezkuntza eta zerbitzuaren kalitatean hobekuntza nabarmenak suposatuko ditu, hezitzaileon lanaren aitortza politikoan urratsak emateaz gain. Era berean, lan hitzarmen berria garatzeko abiapuntua edo oinarria markatuko du akordio honek, eta elementu honi berebiziko garrantzia ematen diogu LAB sindikatutik. Langileen borrokaren balioa azpimarratzea eta grebak borrokarako tresna gisa ulertuta emaitza onak ematen dituela eta garaipenak lortzen direla agerian geratzen da akordio honen sinadurarekin. Bere momentuan Sukalde eta Garbitzaileen eta Haurreskoletako langile eta hezitzaileen kolektiboetan lortutako akordioak ere honen adibide garbiak dira.
LABen hasierako apustua akordioak ahalik eta babes sindikal zabalena jasotzea izan da eta saiakera handiak egin ditugu gainontzeko sindikatuak erakartzeko. Zentzu honetan, LABen ahaleginak bere saria jaso du, eta, zorionez, STEILAS-ek akordioa sinatzea eta berrestea erabaki du.
Gehiengo sindikalaz (%70) gain, gure afiliazioak, oinarri sozialak eta hurbileko langilegoak adierazitako elkartasun eta babesak gure erabakia indartzen du zalantzarik gabe.
Bukatzeko, hezitzaileek greba eta mobilizazioei emandako erantzun zabal eta arrakastatsuarengatik zoriondu nahi ditugu, euren borrokarik gabe sinatu berri dugun akordio hau ezinezkoa izango litzateke eta. Orain, lan hitzarmen duin bat lortzera bidean borrokan eta lanean jarraituko dugu. Ibilbidearen amaieran gaudela pentsa dezaketenen aurrean, LABek argi utzi nahi du ibilbide horren hasieran besterik ez gaudela. Borrokan jarraituko dugu zalantzarik gabe, eta prekarietate ororekin amaitzea, lan baldintza duinak eskuratzea eta eskaintzen dugun hezkuntza eta zerbitzuaren kalitatea iparrorratz izango ditugu.
Justiziaren alde, larunbatean Iruñeko kaleak betetzeko deia egin dugu
Mobilizazioa 17:30ean abiatuko da Golem zinemetatik eta 2016ko urriaren 15eko goizaldean, Altsasuko taberna batean gertaeraren ondorioz auzipetutako 8 gazteen kasuaren aurrean, “Justizia, ez da terrorismoa” lemapean egingo da.
Hiru gaztek 500 egun baino gehiago beste dituzte kartzelan honezkero eta 8ei eskatzen dizkieten zigorrak, 375 urtetako kartzela-urtetakoak basakeria dira, sindikatuaren arabera.
LAB sindikatuak bat egiten du Altsasuko gazteentzat justizia aldarrikatzeko ekimenekin, eta manifestazioan masiboki parte hartzera deitzen du langileria.
Mobilizazioan LABen Batzorde Exekutiboko ordezkaritza batek parte hartu du, Igor Arroyo Idazkari Nagusi Ondokoa buru, bertan izango dira Saul Arangibel, Bea Martxueta edo Imanol Karrera, besteak beste.
Honetaz gain, LABeko gogora ekarri nahi ditu astelehenean gainontzeko sindikatuekin batera Iruñeko epaitegien aurrean egindako eskariak. Batetik, errugabetasunaren-presuntzio, defentsarako eskubidearekiko urraketarik gabeko epaiketa justuaren eskubide eta epaile naturalaren eskubidearekiko errespetua.
Eta bestetik, terrorismo-delituaren kalifikazio penalaren deuseztatzea, presoaldi prebentiboko kautelazko neurriak kentzea eta kasu honen instrukzioa Nafarroako Auzitegietara itzultzea.
Gure herrian abian dugun garai berriari tresna eta estrategia zaharrekin erantzuten jarraitzen duen Estatua da orain armagabetu behar dena. Eraiki dezagun, herriaren bulkadaz eta eragileon inplikaziotik murru demokratiko sendo bat Euskal Herrian, Madrildik datozen eraso zibil eta politikoei, eraso antidemokratiko guztiei bidea mozteko.
Gazteak Altsasun nahi ditugu, gurekin behar ditugu, libre!
Ez da delitu gipuzkoarren osasuna eta interes orokorra defendatzea
Gipuzkoako Hondakinen Kontsortzioko lehendakari ohi Ainhoa Intxaurrandietak eta Gipuzkoako Ingurumen diputatu ohi Iñaki Errazkinek Madrilen deklaratu dute gaur, 2013an Donostialdeko errauste planta gelditzeagatik euren aurkako epaiketa dela eta.
LABetik babesa luzatu nahi diegu auzipetuei, eta, aldi berean, nabarmendu nahi dugu Intxaurrandietak eta Errazkinek herritarrengandik jasotako agindua bete baino ez zutela egin. Erabakiarekin, ordea, batzuen negozioa oztopatu zuten, eta hori da ordainarazi nahi dietena; EAJk sustatutako eredua zalantza jarri izana.
Kasua benetan larria da, gure osasuna baitago jokoan. Hain zuzen ere, guztiontzat ekonomikoki kaltegarria eta milaka herritarren osasunarentzat arrisku garbia den errauste planta gelditzeagatik zigortu nahi dituzte Intxaurrandieta eta Errazkin. Herritarron interes orokorra defendatu zuten, diru publikoa esku pribatuetara pasatzen aritzen diren mafien aurrean. Gipuzkoarren osasuna babesteko hartu zuten erabakia.
Zentzu honetan, bi auzipetuen alde eta errauste plantaren aurka deitzen diren mobilizazioak babestuko ditu LABek; datorren apirilaren 18an, Gipuzkoako osasun etxeetan egingo dituzten elkarretaratzeak, tartean.
Tubos Reunidos taldearen egoitzaren aurrean mobilizatu dira berriro
Trapagarango Productos Tubulareseko langileek protestekin jarraitzen dute. Hain zuzen ere, gaur Bilbon egin duten elkarretaratzearen ostean –bigarrena Tubos Reunidos taldearen egoitzaren aurrean–, bi mobilizazio gehiago dituzte aurreikusita aste honetarako: bihar, apirilak 13, Bilboko Gran Viako BBVAn egingo dute elkarretaratzea; eta larunbatean, apirilak 14, manifestazio bat egingo dute Trapagarango altzairutegietatik Barakaldoko udaletxeraino.
Irakasleen kolektiboak ez du apirilean grebarik egingo Administrazioaren erantzunaren zain
LAB, STEILAS eta ELA sindikatuok apirilaren 18ko mahaian gertatzen denaren arabera erabakiko dugu maiatzean mobilizazio eta grebekin jarraitzea ala ez.
STEILAS, LAB eta ELA sindikatuok apirilak 23ko asterako aurreikusita geneuzkan grebak ez ditugu burutuko, Administrazioak gure aldarrikapenei erantzuten dioten neurriak planteatzen dituen ikusi arte. Apirilaren 18ko mahaian Administrazioak gure aldarrikapenek erantzunik izan ezean, maiatzean mobilizazio eta grebekin jarraitzea beste biderik ez dugu izango.
EAJk, PPek eta PSEk murrizketa politika gogorrak inposatu dituzte zerbitzu publikoetan azken hamarkadan, baita hezkuntza publikoan ere. Negoziazio kolektiborako eskubidea ere nabarmen urratu da. Ondorio zuzenenak plantillak murriztea, lan-kargak handitzea, hezkuntzako langileon prekarizazioa, ikastetxeetarako baliabide eskasia, azpiegituren kaskartzea eta zerbitzu publikoen okertze eta pribatizazioa izan dira.
5 greba egun gauzatu behar izan genituen Jaurlaritza bere jarrera immobilistatik ateratzeko eta mahai gainean proposamenen bat jartzera behartzeko.
Hezkuntza publikoko irakasleen inguruko proposamena abendukoa da, eta azken mahai negoziatzailea urtarrilaren 26koa izan zen. Hezkuntza Sailak abenduan egindako proposamenaren inguruko balorazio bilera bezala planteatu zuen mahai hura, sindikatuon proposamen haren inguruko balorazioa zein zen soberan jakin arren eta hurrengo hilabeteetarako mobilizazio egutegiaren berri izan arren. Arduragabekeria politiko gisa kalifikatu genuen sindikatuok Jaurlaritzaren jarrera hura.
Martxoaren 14 eta 15eko greba arrakastatsuen ondoren, Hezkuntza Sailak apirilaren 18rako deitu du Irakasleen Mahai sektoriala. Honek argi erakusten du beste behin ere Jaurlaritzaren negoziaziorako borondatea aurrean dituen mobilizazio eta greben araberakoa dela, eta langileak zoriondu nahi ditugu mobilizazio eta grebei ematen ari diren erantzun eta babesarengatik. Deigarria eta salagarria da Jaurlaritzak deiturik dauden greben bezperara arte itxarotea negoziazio mahaiak deitzeko.
Sindikatuok argi eta garbi plazaratu izan ditugu zeintzu diren kolektibo honi begirako gure aldarrikapen eta proposamenak:
• Eusko Jaurlaritzak Hezkuntza Publikoan egiten duen inbertsioa nabarmen handitzea. EAEko hezkuntza inbertsio publikoa egungo BPGren %3,5etik gutxienez Europar Batasuneko batez bestekoa ezarriz eta progresiboki UNESCOk gutxienekotzat jotzen duen %6ra iritsiz.
• Azken urteetan eman den matrikulazio igoerari, lan-kargen handitzeari eta ikastetxeen behar izanei aurre egiteko plantilak gutxienez 1.800 irakasletan handitzea.
• Egun irakasle funtzionarioetan %38koa den behin-behinekotasuna %6ra murriztu, urteetan behin-behinean egon diren langileak egonkortuz.
• Ikasle-ratioak %10 murriztea.
• Soldata murrizketa eta %15 murriztu den eros-ahalmena berreskuratzea.
• Gehienetan astebetera atzeratzen diren ordezkapenak lehen egunetik egitea kidego eta maila guztietan.
• Bajak zigortzeari utzi eta lehen egunetik bere osotasunean ordaintzea.
• Erretiroa errazteko eta laguntzeko neurriak berreskuratzea.
• LOMCE Euskal Herriko gure ikastetxeetatik ateratzea eta honen moldaketa hutsa den Heziberri bertan behera uztea.
• Hezkuntzaren merkantilizazioa alde batera uztea, egungo desorekak eta segregazio egoerak gaindituz hezkuntza garapen pertsonal eta sozial integralerako tresna izan dadin (kohesio soziala, integrazioa, aniztasuna, berdintasuna, hezkidetza oinarri).
• Ikasle euskaldun eleaniztunak sortzeko euskarazko murgiltze eredua garatzea.
• Balizko Hezkuntza legearen aurrean sindikatu, hezkuntza eragile eta herritarron parte hartzea eta iritzia aintzakotzat hartzea. Euskal Herritarrok erabaki behar dugu gure hezkuntza sistema gure errealitate eta beharren arabera, eta horretarako hezkuntza burujabetza ezinbestekoa dugu.
Enpresa azpikontratatuetako lan-baldintzak duintzen dituen kontratu publikoen lege bat lortu dugu Nafarroan
Nafarroako Legebiltzarrean onetsitako legean, subrogazioa, laneratze-ezaren kasuetan ordezpenak, gutxienezko plantilla eta lanaldia bermatu dira, eta hitzarmenik aldekoena izanen da aplikagarria plantilletan.
Zerbitzu publikoen azpikontratazioak administrazio paralelo bat sortu du Nafarroan, non milaka langilek lan egiten duten. Azpikontratazio hori sarritan negozio-hobi bilakatu da enpresa pribatuendako, baina hori tamalez zerbitzu horietako langileen lan-baldintzen kaltetan joan ohi da. Horregatik CCOOek, ELAk eta LABek zorionak eman dizkiote elkarri, Nafarroako Parlamentuan Kontratu Publikoen Legea onetsi delakotz. Izan ere, aitzinatze nabaria izan da enpresa azpikontratatuetako lan-baldintzak duintzeko bidean, eta testuan txertatu diren gizarte-arloko, ingurumeneko eta berdintasuneko klausulei esker irizpide ekonomizistak lehenesten zituen sistema azkendu da.
Hiru sindikatuen iritziz, onetsi berri den legearen alderdirik nabarienak hurrengo hauek dira: subrogazioa, gutxienezko plantilla eta lanaldia bermatu dira zerbitzuetako eta zerbitzu-emakidako kontratu guztietan, hitzarmenik aldekoenaren aplikagarritasuna ezarri da, sindikatuei eskumena aitortu zaie baldintza-orriak (pleguak) errekurritzeko, laneratze-ezaren kasuetan ordezpenak bermatu dira, eta jendeari begirako postuetan euskara-planak sustatu dira.
CCOOek, ELAk eta LABek ongi deritzogu Parlamentuko izapidean egindako lanari, lege berrian aurrerapauso nabarmenak eman baitira enpresa azpikontratatuetako lan-baldintzak duintzeari dagokionez. Alde horretatik aipatu beharrekoa da Gobernuak Parlamentuari igorritako lege-proiektuan ezta subrogazioa ere ez zela bermatzen. Lege berri hori ezinezkoa izanen zen, hiru sindikatuok egin dugun behartze-indarra egin gabe.
Bertzalde, CCOO, ELA eta LAB sindikatuok administrazioak premiatzen ditugu (Nafarroako Gobernua, udalak, mankomunitateak…) hemendik goiti lizitazioak Kontratu Publikoen Legearen arabera egitera, eta enpresa azpikontratatuetako lan-baldintzak duintzeari gogotik lotzera.
Azkenik, dei egiten diegu enpresa azpikontratatuetako langileei lan-eskubideen defentsa antolatzera, hitzarmen onak lortzera, Kontratu Publikoen Legea betearaztera, eta pleguetan gutxienezko plantillen betebeharra eta lanaldi bermatuak jasotzea erdiestera.
Pentsio duinak bermatzeko oinarriak aurkeztu ditugu
LABeko idazkari nagusi Garbiñe Aranburuk, Ekintza Sozialeko idazkari Bea Martxuetak eta sindikatuko Heldu eta Pentsionisten arloko ordezkariek agerraldi bat egin dute gaur Bilbon, sindikatuak pentsioen egoerari buruz egindako txostena aurkezteko eta gaiaren inguruko irakurketa egiteko. "Sistema propio bat eraiki behar da, Gizarte Segurantzako euskal sistema bat", berretsi du Garbiñe Aranburuk.
Garbiñe Aranburuk ohartarazi du Espainiako Estatuko politikek ez dituztela pentsio duinak bermatzen eta pentsioak berak arriskuan daudela, hau guztia, politika publiko neoliberalen eta lan erreformen ondorioz: "Inposatzen diren neurrien helburua arlo publikoa murriztea da, arlo pribatua loditzeko. Kontu publikoetan kolapsoa eragin nahi dute, dagoeneko ematen ari dena, alternatiba gisa pentsioen funtsa eta plan pribatuak saltzeko".
Hau zehaztuta, LABeko idazkari nagusiak berretsi du politka neoliberalak errotik aldatzea dela konponbidea, eta horretarako Madrilera begiratzeari utzi behar zaiola nabarmendu du: "Sistema propio bat eraiki behar da, Gizarte Segurantzako euskal sistema bat".
Mobilizatzen jarraitzea behar beharrezkoa dela adierazi du: "Pentsio duinen borroka Gizarte Segurantzako sistema propio baten aldeko borrokarekin lotzea da erronka. Burujabetza behar dugu, Gizarte Segurantzan erabateko eskumena izan, sistema alternatibo bat eraiki nahi badugu Estatutik inposatzen digutenarekiko".
LABek zer proposatzen duen zerrendatu du ondoren. Hain zuzen ere, pentsio duinak bermatzeko bost oinarri proposatzen ditugu:
1) Hilean 1.080 eurotako gutxieneko pentsioa, hemen eta orain
• Hilabetean gutxienez 1.080 eurotakoa izango den pentsioa eskatzea honakoan oinarritzen da. Europaren barruan gaude eta bertan, soldaten medianaren, ez batazkebestekoa, balioaren %60ak ematen digu aipatutako kopurua. Medianaren %60 da mugatzat jotzen den kopurua pobrezia arriskuan ez kokatzeko. Proposamen hau baliagarria da baita emakume pentsionisten egoeran pentsioen arrakalak sortzen duen diskriminazio egoerari erantzuteko.
• Botere publikoek bermatu behar dute orain zein etorkizunean pertsona guztiek euren pentsioa eskuratzea, eta horretarako, ulertzen dugu duina izango den gutxieneko bat zehaztu behar dela. Horregatik eskatzen dugu Diru Sarrerak Bermatzeko Errenta (DSBE) edo Gizarteratze eta Bermatutako Errentaren (GBE) bidez Madrilen erabakitako miseriazko pentsioak osagarritzea. Konpetentzien gabezia honek pobretu egiten gaitu.
2) Pentsioen eros ahalmenari eutsi, KPIren arabera eguneratzearen bidez.
• Indize honi eusteak suposatzen du pentsioen eros-ahalmena bermatzea.
• 1.000 eurotik beherako pentsioetan, 2011-2017 artean %1,8koa izan da eros-ahalmenaren galera EAEn eta %0,3koa Nafarroan.
• 1.000 eurotik gorako pentsioentzat, 2011-2017, artean, %2,9koa izan da EAEn eta %1,3koa Nafarroan.
3) Pentsioen erreformak atzera botatzea
• Exijitzen dugu indargabetu izan daitezela Madrildik iritsitako pentsio-murrizketa etengabe eta gogorrak, inposizioaren, adostasun politikoaren edota CCOO eta UGT sindikatuek garatutako eztabaida sozialaren ondorio direnak.
• Etorkizuneko erreformen aurrean euskal esparrua blindatu behar dugu eta aurretik egindakoak lehengoratu, sistema publikoari balioa kendu eta berau suntsitzen dutenak.
• Toledoko Ituna ez da espazio neutrala zeinetan espero dezakegun egoera lehengoratzea, osatzen duten aditu eta gehiengo politikoak konpromiso handiagoa duelako finantza-interesekin pentsio-sistema publikoaren defentsarekin baino.
4) Gizarte Segurantzako euskal sistema
• Kontuan izanda pentsioen erreformak inposatu egin zituztela Hego Euskal Herrian, Greba Orokorrekin erantzunak izan baitziren, kontuan izanda pobretu egiten gaituztela eta kontuan izanda pentsio-sistema publikoaren gainean dauden mehatxuak, ezinbestekoa da gizarte segurantzako sistema propioa izatea konpetentzia legegile osoekin.
• Gainera, Hego Euskal Herrian dagoen korrelazioa bera, bai esparru politiko-instituzionalean bai sindikalean, gure interesen aldekoagoa da esparru estatalean baino. Honek ahalbidetuko luke euskal langileriak modu zuzen eta eraginkorragoan parte hartzea, bere interes propioen defentsan, bere lan-baldintza eta babes sozialerako funtsezkoak diren gaietan.
• Pentsio-sistemak errenten bermerako eta mundu guztia babestuko duen babes sozialerako sistema zabalago baten parte izan behar du.
5) Etorkizuneko pentsioak duinak izan daitezen, kalitatezko enpleguak izan behar du abiapuntua
• Lan Denboraren Banaketa orokortua soldata gutxitu gabe, enplegu osora eramango gaituena eta pertsona guztiek pentsio duina izan ahal izatera, bai kotizazio bai zergen bidez.
• Laneko Denboraren Banaketa laneko eta bizitza pertsonala modu efektiboan uztartzeko, eta ehun produktiboaren berreuskalduntzea laguntzeko.
• Soldatak eta laneko egonkortasuna nabarmen hobetzea.
• Zaintza-lanen korrespontsabilitatea, aukera berdintasuna eta emakumeen enplegurako sarbide-eskubideak bermatzea, eta soldata-arrakala diskriminatzailea erauztea.
• Lanbidearteko Gutxieneko Soldata 1.200 eurotakoa izatea.