2026-01-25
Blog Page 722

Ez dugu sinatu Arabako Etxez Etxeko Laguntzako aurreakordioa, ezinbestean negoziatu beharko liratekeen artikulu asko ez direlako aldatu

admin
-
0
Irailaren 12an, Arabako Etxez Etxeko Laguntzako Zerbitzuko langileek batzarra burutu zuten. Bertan, Patronalaren azken proposamena eztabaidatu zen eta irailaren 17rako deituta zen greba mugagabea bertan behera geratzeko erabakia hartu zen. LABek uste du proposamen hori urria dela, ez baitu hitzarmenaren artikulu askoren aldaketa aurreikusten.

Ezin dugu ahaztu, hitzarmena hau 2012. urtetik ultraktibitatean dagoela, eta ordutik mahai negoziatzaileak irekita jarraitzen duela. Hau da, 7 urte luzetan zehar soldatak bere horretan mantendu dira, eta hori prekarietate handiko sektore batean eman da, non langileen %50a baino gehiago lan egindako orduen arabera kobratzen duten eta askotan asteko lanaldia 15 eta 20 ordukoa edo gutxiagokoa den.

Etxez Etxeko Laguntzako sektorea oso feminizatua dago. Azken urteotan 500 lanpostu baino gehiago galdu ditu. Langileen batez besteko adina 50 urtekoa edo altuagoa da, eta hauetako langile askori ez zaizkie jasaten dituzten gihar eta hezurretako arazoak laneko gaixotasun bezala aitortzen.

Gaur, urriaren 15an, Patronala eta Arabako Etxez Etxeko Laguntzako hitzarmena negoziatzen ari garen sindikatuok berriro elkartu gara. Bilera honetan ELAk, CCOOk eta UGTk Patronalarekin batera, aurreakordioa sinatu dute. Bertan onartutzat eman da Enpresek egindako azken proposamena, hau da: %4,1eko soldata igoera 2019ko apiriletik aurrera eta %3koa 2020. urterako. Honez gain, 2019ko urtarriletik aurrera, desplazamendua aldia 2 minututan handituko da, eta disponibilitatea ordubetez murriztuko da. Artikulu hauetaz gain, aurreko hitzarmenaia berdinmantentzendabereosotasunean.

LABek bere iritzia mantentzen du eta ez du plataforma amankomunetik nabarmenki aldentzen den minimoetako aurre-akordioa sinatu. Plataforma horrek Etxez Etxeko Laguntzan lan egiten duten langileen egoera hobetzeko proposamena biltzen zuen.

LABek bere jarrera mantenduko du, eta ez du aurreakordioa sinatu, argi baitauka ezinbestean negoziatu beharko liratekeen artikulu asko ez direla aldatu; eta horiek jaso gabe, hitzarmena sinatuz gero, iruzurra egingo genieke langile guztiei.
 

 

 

Osakidetzaren zentsurari erantzun diogu Basurtuko ospitalean

admin
-
0
Osakidetzaren zentsurari erantzun diogu Basurtuko ospitalean

Osakidetzak bigarren aldiz debekatu du Zigor Merodio presoaren “Zorraztarria” erakusketa, oraingo honetan Basurtuko ospitalean. Bada, Donostiako Ospitalean uztailean jasotako debekuaren ondoren egin bezala, LABek ospitaleko atariraino eraman du erakusketa, mundu guztiak ikusi ahal izateko. 
 

 

 

Babesa erakutsi diogu Bilboko Harrera Auzoak ekimenari, atzoko desalojoaren ondoren

admin
-
0
Babesa erakutsi diogu Bilboko Harrera Auzoak ekimenari, atzoko desalojoaren ondoren

Atzoko desalojoaren ondoren, Bilbok Harrera Auzoak ekimeneko kideekin egon da Garbiñe Aranburu idazkari nagusia gaur goizean, bertatik bertara egoeraren berri jasoz. Politika migratorioak eta atzerritarren legea salatzeaz gain, migrarien harreran egon den herri erantzuna txalotu du Aranburuk, eta bere sinadurarekin, babesa erakutsi dio Bilbo Harrera Auzoak ekimenari.

Bilboko Udaleko LABeko atal sindikalak egindako oharra, atzoko desalojoa dela eta:

Atzo, urriak 14 zuela, Bilboko Udaltzaingoak Bilboko Harrera Auzoak ekimenak Areatzako tingladoetan ipinita zuen errefuxiatuekiko elkartasunezko kanpamendua desegin zuen. Gure ustez udalaren erabaki honek zera adierazten du:

1.- Bilboko Udala, Alkatea buru, askatasun publiko eta demokratikoen kontra egiteko prest dagoela.

2.- Bilboko Udaltzaingoaren erabilera politikoa.
3.-Inposaketa asmoargiaUdalarenpartetik.

Non ote daude Alkateak defenditzen dituen elkartasuna eta tolerantzia baloreak?

Azkenean zertarako? Espainolen erregea itxurazko Bilbo distiratsu eta otzan batetik lasai pasea dadin.

 

 

 

Ez dugu Gipuzkoako eraikin eta lokalen garbiketako akordioa sinatu, KPIaren erreferentziarik jasotzen ez duelako

admin
-
0
Gipuzkoako eraikin eta lokalen garbiketako negoziazio mahaian, 2018 urterako akordioa sinatu dute gaur ELA, UGT, CCOO eta ESK sindikatuek. LAB sindikatuko kideok ez dugu sinatu izan ere, akordio honek ez baitu KPIaren erreferentzia jasotzen. Arrazoi berdinagatik ez zuen sinatu LABEko aurreko hitzarmena.

Apirilean ekin genion Gipuzkoako eraikin eta lokalen garbiketako negoziazio mahaiari eta bost sindikatuok, ELA, LAB, UGT, CCOO eta ESKak, plataforma bateratu bat aurkeztu genuen. Besteren artean aldarrikapen nagusi bat jasotzen zuen plataforma horrek, Eraikin eta Lokalen Garbiketako eta Bide Garbiketako hitzarmenen artean aurkitzen den soldata arrakala gainditzea. Lau hilabete inguruko negoziaketaren ostean ELA, UGT, CCOO eta ESK sindikatuek, urte beteko iraupena izango duen aurre akordioa sinatu dute, ondorengo hiru puntuak jasotzen dituena. Lehenik ultra aktibitate mugagabea, %1,5eko soldata igoera eta diskriminazioa gainditzeko asmoa.

LAB sindikatuak ez du aurre akordio hau sinatu, hain zuzen ere, KPIaren erreferentziarik jasotzen ez duelako. Gipuzkoako garbiketan aurkitzen den soldata arrakala gainditzeko konpromisoan berresten gara, baina bidean galdutako erreferentziak berreskuratuz egin behar dugula uste dugu.

Oso positiboki baloratzen dugu ultra aktibitate mugagabea, aurrera begirako berme bat baita, sektoreko langileei hitzarmena aplikatzen jarrai dezaten beste bat adostu bitartean. Soldata igoerari dagokionean, %1,5 horrek 2017ko KPIa jasotzen badu ere (%1,1) erreferentzia bera presente izatea oso garrantzizkoa da. Patronala erreferentzia hau ezabatzeko ahaleginetan dabil, inolako irizpide edo konpromisorik gabeko jokatzeko. LAB sindikatuan Euskal Herrirako indize propio bat sortzea helburu badugu ere, egun KPIa dugu bizitzaren garestitzea islatzen duen datu objektibo bakarrenetako, eta beraz, soldatek erreferentzia hau gutxienez jasotzea beharrezkotzat jotzen dugu. Aurreko hitzarmena ez sinatzeko arrazoia bera da, eta hurrengoetara begira ere, LAB sindikaturentzat KPIaren erreferentzia berreskuratzea borroka frontea izango da. Azkenik, diskriminazioa gainditzeko asmoaren gainean, abiapuntu bat izan daitekeela ulertzen dugun arren, gerora pausoak ekarri ezean hitz hutsak besterik ez dira.

Hain zuzen ere, negoziaketa honetan azpimarratu izan dugun bezala, Gipuzkoako garbiketan aurkitzen den soldata arrakala gainditzea lehentasuna da LAB sindikatuarentzat. Hitzetatik ekintzara pasatzeko unea da. Jakitun gara, oso jakitun ez dela inolaz ere bide erreza izango. Bide luzea izango da eta garaipena eskuratzeko baldintzak sortzea gakoa izango da. Gaur osatu dugu hurrengo negoziaketa mahaia, eta guk, orain, ezinbestekotzat jotzen dugun sindikatuen arteko batasuna, langileen parte hartze eta jarrera aktiboa eta aurrera begirako borroka agenda progresibobatizatea. LAB, langileen baldintzak hobetzeko tresna izango da.Denon artean egingo dugun bide gogor bezain eder honetan bidelagun izango gara.
 

 

 

“Orain Presoak” dinamikak larunbaterako egindako deialdietan egongo gara hainbat sindikatu

admin
-
0
“Orain Presoak” dinamikak larunbaterako egindako deialdietan egongo gara hainbat sindikatu

LAB, ELA, UGT, STEILAS, ESK, Etxaide, Hiru eta EHNE sindikatuok agerraldi bat egin dugu gaur Bilbon, Foro Sozial Iraunkorraren ekimenez, "Orain Presoak" giza ekimenaren harira larunbaterako antolatutako ekitaldia eta manifestazioarekin bat egiteko.

Hauxe da sindikatuok sinatutako adierazpena, gaurko agerraldiaren harira:

Hemen gauden zortzi sindikatuok Foro Sozial iraunkorraren ekimenez elkartu gara eta preso dauden pertsonak txertatzeko auziari buruzko amankomuneko irakurketa egin nahi dugu.

Lehenago ETAren behin betiko eta erabateko armagabetzeari gure sostengua adierazteko elkartu ginen eta geroztik beste hiru aldiz modu ezberdinetan elkartu gara, gaixorik dauden presoen arazoa eta hurbiltzea zirela eta.

Beraz, ELA, LAB, UGT, Steilas, ESK, EHNE, Hiru eta Etxalde sindikatuek euskal gizarteari, bere erakundeei eta eragile politiko eta sozial ezberdinei honakoa adierazi nahi diegu:

1. Egungo egoeran, preso dauden pertsonen arazoa konpontzea bizikidetza demokratikoa eta adiskidetzea sustatzeko beharrezko ekarpena litzatekela uste dugu.

2. Beraz, arazo honen konponbide orokorra lortzeko asmoz, honako urratsak beharrezkoak lirateke.

a) Gaitz larriak pairatzen dituzten presoen arazoa dela eta, iazko uztailaren 5ean egindako eskaerari berretsi egiten diogu: ”Sindikatuok agintariei estatuan indarrean dagoen legedia eta nazioarteko irizpide zorrotzenak aintzat har ditzaten eskatzen diegu, gaitz larriak edota sendaezinak pairatzen dituzten presoak hirugarren graduan sailkatzeko edo espetxetik ateratzeko, duintasun pertsonal eta gizatasun arrazoiak direla eta”.
b) Espainia eta Frantziako gobernuei preso guztiak EAE(Euskal Autonomia Erkidegoa) eta Nafarroako espetxeetara ekar ditzaten exijitzen diegu, espetxe zigorra presoaren sorlekutik urruti ez betetzeko eta senideekiko lotura errazteko.
c) Preso bakoitzaren baldintza eta egoera zehatzak benetan aztertuz, lehen gradutik bigarren gradurako bilakaera eskatzen dugu, espetxe legediak zehazten duen moduan.

3. Hemen elkartu garen sindikatuok urriaren 20an Donostiako Miramar jauregian arratsaldeko 16:00etan bizikidetzaren alde antolatuko den ekitaldian eta arratsaldeko 17:00etan burutuko den manifestazioan(biak “Orain Presoak” giza ekimenak antolaturik) egongo garela jakinarazten dugu.

4. Gizarteari, eta bereziki langileei, bakoitzak bere eremutik, auzi honen behin betiko konponbidea lortzeko lana egin dezan deia luzatzen diegu.
 

 

 

Iraultza bolibartarrarekiko lehen Europako elkartasun sarea osatu dugu

admin
-
0
Iraultza bolibartarrarekiko lehen Europako elkartasun sarea osatu dugu

Venezuelako iraultza bolibartarrarekiko lehen Europako elkartasun sarea ibiltzen hasi dela esan dezakegu. Hemendik aurrerako helburua, herrialde ezberdinetan egiten dugun lana koordinatzeaz gain, kanpaina ezberdinak antolatzea eta Venezuelako proiektu bolibartarra inperialismoaren atzaparretatik defendatzeko, intoxikazio mediatikoari aurre egitea izanen dugu helburu.

Larunbatean, urriak 13, Bruselan egindako bilkuran, Iraultza bolibartarrarekiko lehenengo Europako elkartasun sarea osatu zen. Sare honen lehen bultzatzaileak Europa guztitik etorriak izan ginen, tartean Euskal Herritik LAB sindikatuak eta Sortuk hartu genuelarik parte Euskal Herriko Venezuela Aurrera plataformaren izenean.

Egun osoa iraun zuen lehen bilkura hau Belgikako Venesol taldeak antolatua izan dzen, eta topaketan parte hartu genuen eragile guztiak eztabaidatzeko eta iraultza bolibartarrari gure elkartasuna adierazteko aukera izan genuen.

Goizean zehar, talde ezberdinetan banaturik, etorkizuneko sarean izan beharreko funtzionamenduari eta antolakuntza ereduari buruz eztabaidatzen egon ginen, eta, arratsaldean, plenarioan ideia guztiak komunikatu batean eta hasierako lanerako oinarri batzuetan jarri genituen. Eguna bukatzeko "Venezuela en tiempos de guerra" izeneko filmaren emanaldia egon zen eta Maurice Lemoine kazetari frantziarrarekin hitzaldi eta eztabaida egon zen.

 

 

 

Matia Fundazioko langileek protestak areagotzea erabaki dute

admin
-
0
Matia Fundazioko langileek protestak areagotzea erabaki dute

Donostian bildu ziren igandean, Antiguako tunelaren ondoan, Hiru Hondartzetako Krosa baliatuta euren aldarrikapenak gizarteratzeko.

Hauxe da langileek igorritako oharra:

Matia Fundazioko langileak aldarrikapen ekimenak areagotzen ari dira, enpresaren hitzarmena negoziatzen ari den honetan. Honen harira, Fundazioaren lantokietan nahiz kalean egin ekintzei eusten zaie, bilkurak eginez, auto-karabanak eginez… 

Gogora ekarri behar dugu 2012-2015 urteetan, langileok jasan behar izan dugula hitzarmena bere horretan gelditu izana; horrez gain, bete behar izan dituzten aparteko orduekin (geroztik itzuli dituztenak) 3 milioi euro baino gehiagoko ekarpena egin dute, fundazioak bizi izan duen egoera ekonomiko eta finantzario larria gainditze aldera (porrot teknikoa izan zen erabili zuten terminoa).

Hori guztia, hitzarmena ez aplikatzeko mehatxu argiari aurre eginez, hitzarmenari eusteko helburuan ari gara lanean, nahiz eta gu ez garen egoera horren arduradunak; egoera horren eragilea, izatekotan, Matia Fundazioak egin kudeaketa eta M.F.-ko jabeen batzarrak onartu izana dira.

Behin aldi hori gainditu dugula, eta M.F. bete-betean lanean ari dela eta pentsatu dutenez hura handituko dutela hainbat proiektuekin, onartezina eta lotsagarria deritzagu, gaurko egunez, M.F.-ko hitzarmena izoztua egoteari!

 

 

 

Kontziliazio politikak oraindik ere emakumeon kontura egiten dira eta Aldundiek, gainera, egoera hauek areagotu egiten dituzte

admin
-
0

Aste honetan Auzitegi Gorenak Gizarte-Segurantzatik jasotako amatasun prestazioak PFEZetako ordainketatik salbuetsita daudela deklaratu du. Foru Ogasunek, Estatuko erabakiei lotu gabe, beren erabaki propioak hartzeko burujabetza izan behar dutela uste dugu. Hori esanda, era berean, bizitza erdigunean kokatuko duen eredua aldarrikatzen dugu. Zaintza lanak zentrora ekartzeaz ari gara. Hau da, lan hauek modu korresponsable batean aurrera eraman daitezen neurriak hartzeaz, benetako kontziliazio neurriak bultzatzeaz. Ildo horretatik, Foru Ogasunei eskatzen diegu zaintza lanei aurre egiteko ezarriak dauden prestazioetan erretenitutako dirua itzuli dezaten. Ogasunek erabaki hau hartu ezean zilegi iruditzen zaigu horrelako prestazioa jaso izan duten pertsonek erreklamazioa Ogasunei bideratzea, eta LABetik horrela egin dezaten aholkatu diegu gure afiliatuei.

Sententziak atzeraeraginezko izaera du baina denbora muga du. Honela, 2014tik amatasun-bajan egondako pertsona guztiek bere prestazioetako PFEZagatik ordaindu zutena itzultzea eska dezakete. Honek 2014, 2015, 2016 eta 2017ko Errentaren aitorpenak, eska daitezkeela esan nahi du.

Hala ere, eta ebazpena tarteko sortu den eztabaidak, gogoeta sakonago batera garamatza: Kontziliazio politikak oraindik ere emakumeon kontura egiten dira eta Aldundiek, gainera, egoera hauek areagotu egiten dituzte.

Aldundien jarrerak salatzearekin batera, sakoneko gogoetari heldu behar zaio: egoerari buelta emateko erabaki politikoak behar dira. Ez da serioa gaur egun gobernuek “berdintasunaren” aldeko politikak lehentasuna direla esan eta sententzia baten zain egon behar izatea emakumeon eskubideak zeintzuk diren edo ez jakiteko. Ez da serioa erantzukidetasunerako neurri eraginkorrik ez eta kontziliaziorako neurriak egun batetik bestera aldatzen ibiltzea.

Emakumeon eskubideak, dirua eta denbora ez daude salgai. Emakumeak erreklamazioa sartu ala ez, epaileak onartzen duen ala ez… erabakiak eta azken emaitza ezin dute urrats edo faktore horien araberakoak izan, ezta momentu politiko bakoitzean balantzak hartze duen pisuaren arabera ere. Berdintasunaren aldeko politikak ez dira epaitegietatik etorriko, benetako erabaki politikoak behar dira eta eskatzen ditugu.

 

 

 

Lan Harremanetarako eta Babes Sozialerako Euskal Esparrua eta esparru sozioekonomiko propio bat artikulatzeko erabaki ahalmen osoa izatea beharrezkoa da

admin
-
0
Lan Harremanetarako eta Babes Sozialerako Euskal Esparrua eta esparru sozioekonomiko propio bat artikulatzeko erabaki ahalmen osoa izatea beharrezkoa da

Gaur bilera egin dugu EH Bildurekin, azken honen Donostiako egoitzan. LABetik, Garbiñe Aranburu Idazkari Nagusia, Xabier Ugartemendia Ekintza Sindikala eta Negoziazio Kolektiboko Idazkaria eta Maider Jauregi Komunikazio Idazkaria izan dira bertaratutakoak. EH Bilduko ordezkaritzari dagokionez, Maddalen Iriarte, Pello Urizar eta Unai Urruzunok osatu dute, Autogobernu Ponentzian ari diren hiru legebiltzarkideek.

Bilera LAB sindikatutik egiten ari garen errondaren barruan kokatzen da, eta aste honetan bigarrena izan da, urriaren 10ean Podemosekin abiatu baitzuen LABek erronda. Sindikatuak estatus politiko berriari eskatzen diona konpartitzea du helburu ekimen honekin.

Giro adeitsuan garatu da batzarra eta LABeko kideek EH Bildukoei azaldu dizkiete sindikatuaren kezka nagusiak: euskal herritarrei bizitza duina bermatzearen beharra, eredu ekonomiko eta sozial berri baten alde eginez horretarako.

EAEn Indarrean dagoen autonomia estatutuak hasieratik izan dituen hutsune estrukturalak gainditu eta Euskal Herrian garrantzia betekoak diren gai ezberdinen inguruan erabakiak hartu ahal izateko burujabetzaren beharraz aritu dira; burujabetza, aldaketa sozial eta politikoa lortzeko.

Araba, Bizkaia eta Gipuzkoako herritarrek Lan Harremanetarako eta Babes Sozialerako Euskal Esparrua eta esparru sozioekonomiko propio bat artikulatzeko erabaki ahalmen osoa izatearen beharrari azpimarra egin dio LABek. Erabaki ahalmen osoa, herri bezala aurrera pausoak eman eta langileok egunerokoan ditugun arazoei irtenbidea emateko. Horretan ere bat etorri gara alde biak.

Bileran beste hainbat gai ere izan ditugu aztergai: elkarrizketa sozialari buruz eta aurrekontuen inguruan aritu dira, besteak beste. Azken gai honi dagokionean, diru-sarrerak handitzearen beharra aipatu du LABek, orain arteko erreforma fiskalak atzera botata. Halaber, behar sozialei aurre egiteko aurrekontuek duten garrantzian bat etorri dira alde biak.
 

 

 
1...721722723...1,586Page 722 of 1,586

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus