2026-02-22
Blog Page 694

Babesa eta elkartasuna erakusten diogu Bartzelonako Kale Saltzaileen Herri Sindikatuari

admin
-
0
Babesa eta elkartasuna erakusten diogu Bartzelonako Kale Saltzaileen Herri Sindikatuari

LAB sindikatutik, beste behin, ere Bartzelonako kale saltzaileen aurka Mossos d’Esquadra eta Guardia Urbanak egindako polizia-operazioa salatu nahi dugu. Kaleko saltzaile diren kide hauen aurkako jazarpena ez da onargarria, eta argi esan nahi dugu langile migrante hauek gure langile klase berekoak direla..

LABetik, kide eta lagun ditugun Bartzelonako Kaleko Saltzaileen Herri Sindikatuari gure elkartasuna eta babesa helarazi nahi diegu. Izan ere, kaleko saltzaile hauek, aste honetan, beste behin ere segurtasunaren izenean, Catalunya plazan atxilotu zituzten, isuna jarri, eta saltzen zeudena dekomisatu zieten.

Atxiloketa hauen atzean, interes turistiko eta botere ekonomikoen aldetik, arrazakeria eta errealitate bat izkutatzeko beharra dago eta administrazioak interes horiei men eginez, polizia beraien zerbitzura jartzen du. Esan beharra dago gainera, poliziaren interbentzioak tratu txar eta gehiegikeriaz betetzen direla, inpunitate osoz gainera.

Jendartean gorrotoa eta kriminalizazioa sortzeko goitik behera orkestratua dagoen antzezlanaz ari gara. Komunikabideek iritzi publikoari gezurrak azaltzen dizkiete: kaleko saltzaileak indarkeria erabiltzen dutela, lapurrak direla, gaizkileak direla… eta handik gutxira poliziaren interbentzioak izaten dira.

Bizirauteko lanean ari diren langile migranteak dira. Kalean saltzen egon beharrean, eskubide osoz lan egin eta bizi nahiko lukete. Lan eta bizitza duina izateko eskubide osoa daukate. Zorionez, langile hauek badute ahotsa, antolatuta daude, eta bai Katalunian eta bertatik kanpo ere babesa dute. Beraien eskubideen alde egiten duten lana txalotzen eta babesten jarraituko dugula berresten dugu.

 

 

 

Babesa erakutsi diogu Maravillas gaztetxeari eta aldaketaren jatorrizko balioetara itzultzea exijitu dugu

admin
-
0
Gazteen eta beren proiektuen aurkako errepresio eta bortizkeria poliziala kapitalismoaren aldeko bortizkeria politikoa da, elite ekonomikoen aldekoa, Erregimenaren aldekoa.

LAB sindikatuak honakoa adierazi nahi du Nafarroako Gobernuak agindu duen Iruñeko Maravillas gaztetxearen ezkutuko utzaraztearen inguruan (Alde Zaharra militarki okupatu duten Foruzaingoaren eta Espainiako Poliziaren bortizkeria eta errepresio bidez eginiko utzaraztea, gainera):

1. Gure erabateko babesa adierazi nahi diogu Maravillas gaztetxeari eta bere autogestio proiektuari. Era berean, gure elkartasuna adierazi nahi diogu gazteriari, bereziki polizien bortizkeria dela-eta zaurituriko pertsonei. Gainera, gure babesa eta elkartasuna adierazi nahi diegu Alde Zaharreko bizilagun eta merkatariei; ez da onartzen ahal auzo horrek jasan behar izan duen okupazio poliziala, beren bizitzak eta lan jarduerak modu normal batean izatea oztopatu diena. Hori guztia dela eta, LAB sindikatuak bat egiten du urtarrilaren 19rako Iruñean deituta dagoen manifestazioarekin.

2. Gazteen eta beren proiektuen aurkako errepresio eta bortizkeria poliziala kapitalismoaren aldeko bortizkeria politikoa da, elite ekonomikoen aldekoa, Erregimenaren aldekoa. Uxue Barkos buru duen Nafarroako Gobernuak hartu du erabaki politikoa gazteen eta Maravillas gaztetxearen mobilizazio soziala bortizkeria polizialaren bidez erreprimitzeko. Jokabide horrek mobilizatzeko eskubidea urratzen du eta aspaldi bateko garaietara eramaten gaitu. Horregatik eskatzen dugu berriz Maria Jose Beaumont Barne kontseilariaren berehalako dimisioa eta Uxue Barkos lehendakariari eskatzen diogu, gertaera tamalgarri hauen azken arduraduna baita, utz diezaiola bokatxa eta borra artean ezkutatzeari, Aldaketaren jatorrizko balioak errespeta ditzala eta Erregimenaren modus operandi-a bazter dezala.

Asteotan ikusi dugu nola Foruzaingoak bortizkeria erabili duen Azkoienen bizitza eta lan duinen alde borrokan diren grebalari eta sindikalisten kontra. Eta egunotan ikusi dugu nola Foruzaingoak mobilizazio soziala erreprimitzen duen eta nola erabiltzen duen bortizkeria gazteen eta bizilagunen kontra. Onartezina da. Eta onartezina delako Foruzaingoan ordezkaritza duten sindikatuak interpelatu nahi ditugu, beren lan baldintzen inguruan mobilizatu ziren modu berean orain ere planto egin dezaten eta egoera hau guztia salatu dezaten. Izan ere, deigarria bezain tamalgarria da ikustea nola beren eskubideen alde mobilizatzen direnek gero bortizkeria erabiltzen duten gauza huraxe bera egiten duten pertsonen kontra.

3. LAB sindikatuak salatu nahi du Geroa Bai alderdiak erabaki politiko bat hartu duela 2015ean UPN-PSNren Erregimena erakundeetatik atera zuen Aldaketaren norabidea errepresioaren bidez aldatzeko. Gu ez gaude, noski, norabide aldaketa horrekin ados eta ulertzen dugu Aldaketaren jatorrizko balioetara itzuli behar dela, bizitzaren demokratizazioa eta gizarte aldaketa helburu duten balioetara. Ildo horrretan, herritarrei dei egiten diegu kalera atera daitezen UPN-PSNren Erregimena kanporatzearen alde borrokatu, lan egin eta bozkatu zuten guztien ondare diren balioen defentsan.

 

 

 

Huerta de Peraltako kaleratuak berronartzea, zorra ordaintzea eta enpresa itun baterako negoziazioa irekitzea aldarrikatu dute hainbat eragilek

admin
-
0
Huerta de Peraltako kaleratuak berronartzea, zorra ordaintzea eta enpresa itun baterako negoziazioa irekitzea aldarrikatu dute hainbat eragilek

Iruñean, 35 gizarte eragile baino gehiagok prentsaurrekoa eman dute Huerta de Peraltako grebalariei beren atxikimendua adierazteko eta biharko, urtarrilaren 11rako, Elkartasun Egunean parte hartzera deitzeko. Bitartean, enpresa batzordeko kideak Azkoiengo alkate Juan Carlos Castillorekin bildu diar, euren egoeraren berri emateko.

Huerta de Peralta enpresako gatazkaren harira, idazki hau sinatu dute eragile sozialek, Iruñeko agerraldian irakurritakoa:

1. Huerta de Peraltako Enpresa Batzordearen nahiz grebalarien aldarrikapenekin bat egiten dugu: lankideen berronartzea, herrialdeko hitzarmena ez betetzeagatik sortutako zorraren ordainketa eta enpresa itun baterako negoziazioen irekiera.

2. Huerta de Peraltako gatazka, gure ustez, Nafarroan bizirauten duen arazo larri baten adierazle da: landa eremuan ematen den esplotazio eta prekarietatea, hala aldizkako langileena nola urte osoan zehar lan egiten duten horiena. Ez da beharrezkoa Almeriaraino joatea, gutxi batzuen etekinak potoltzearren, zaurgarritasun egoeran diren pertsona migranteekiko abusu patronalak ikusteko. Ez dugu orokortu nahi: Nafarroan badira nekazari aunitz erreferentziazko hitzarmena bete eta lan eskubideak aintzat hartzen dituztenak. Langileen eskubidean urratzen dituzten jarrerak dira, besteak beste Huerta de Peraltako jabeenak, deslegitimatu eta gainditu beharrekoak.

3. Pertsona guztientzako eskubide guztiak aldarrikatzen ditugu, landa eremuan nahiz hirian, lanean nahiz eguneroko bizitzan, edozein delarik beren jatorria edota egoera. Ildo honetan, enplegu duina izatea ezinbestekoa da gizon-emakume orori bizitza duina bermatzeko.

4. Huerta de Peraltako zuzendaritzak erakutsitako itxikeriaren aurrean, Nafarroako instituzioei (Gobernua nahiz Parlamentua) eskatzen diegu esku har dezaten, Zuzendaritzaren eta Enpresa Batzordearen arteko benetako negoziazio bat ahalbidetzeko. Enpresak diru publiko ugari jaso du (kasik 300.000 euro pasa den urtean) eta ondorioz ezartzen dituen lan-baldintzekiko erantzunkizun erantsia eskatu behar zaio.

5. Era berean, nekazariei, nafar jendarteari nahiz nafar instituzioei zera proposatzen diegu: lan egin dezagun, denok batera eta indar guztiekin, gure herrien eta biztanleen garapena, aberastasunaren sorrera eta bere bidezko banaketa, eskutik joan daitezen. Denon artean lortuko dugu!

Orain arteko sinatzaileen zerrenda:

EH Hamaika kolore
SOS arrazakeria
Iruñea Ciudad de acogida / Harrera Hiria
Africa United
Papeles denontzat
Askapena
Bilgune Feminista
Martes al Sol
Zabaldi
Pentsionistak Martxan
Parlamentu Soziala
Sasoia
Oneka
Lugatibe
Sortzen
AEKko Iruñerriko irakasleak
AHT Gelditu Elkarlana Nafarroa
Memoriaren bideak
Autobus de la memoria
Mugarik Gabe
Mundu bat
Tomate gorriak
Piztu Alarma elkartasun tresna
Ernai
Zizurreko Gazte Mugimendua
Piztu Uharte Gazte Mugimendua
Tutera Alai Gazte Mugimendua
Arrotxapeako Gazte Mugimendua
Mendillorriko Gazte Mugimendua
Txantreako Gazte Mugimendua
Atarrabiako Gazte Mugimendua
LAB
ESK
CGT
EHNE
HIRU
STEILAS

Elkartasun Eguna, bihar
-Goizean zehar: informazio gunea, Sarasate pasealekuan
-9:00 Burrunba Parlamentuaren aurrean: landa eremuko langileentzat eskubideak ORAIN!
-11:00 Kalejira Alde Zaharretik
-11:30 Ekitaldia. Grebalariak + Oskar Reina, SATeko bozeramailea (Sindicato Andaluz de Trabajadores y Trabajadoras) + Imanol Karrera (LAB)
-12:00 Mikro irekia eragile sozial eta sindikal desberdinentzat.
-14:00 Bazkari eusko-arabiarra Arrano elkartean
-18:00 Hitzaldia Kaldereria 11 aretoan: Huerta de Peralta, landa eremuko langileen eskubideen aldeko borroka.
• Hossein Yagoubi (Presidente Comité de Empresa de Huerta de Peralta)
• Oskar Reina (portavoz del SAT, Sindicato Andaluz de Trabajadores y Trabajadoras)
• Berta Garcia (LAB)

 

 

 

Tubos Reunidoseko azpikontratetako Aldi Baterako EEEak salatzen ditugu

admin
-
0
Pasa den azaroaren 12an Tubos Reunidoseko zuzendaritzak kontratuak eteteko 16 hilabetetako Aldi Baterako EEEa aurkeztu zuen Amurrioko bere lantegian. Egun batzuk beranduago beste horrenbeste egin zuen Trapagarangoan.

Hasieratik salatu du LABek neurri honen helburu nagusia beste modu baera lortu ezin izan duen malgutasuna eskuratzea dela eta gainera, kasu honetan, diru publikoz ordaindua. Taldeko langileek urteak daramatzate gero eta okerragoak diren lan-baldintzak jasaten, lanpostuen amortizazioak, malgutasunaren igoera, lanaldi irregularren ezarpena, mugikortasun funtzionala, kaleratze mehatxuak…

Gogoratu behar da taldeak duen zorrak ez duela Amurrio eta Trapagarango lantegien jarduera eta produktibitatearekin zerikusirik. Bere jatoria zuzendaritzaren kudeaketa negargarrian eta zenbai urten akziodunek eraman duten diruan.

Zuzendaritzak aldebakarraez inposatzen dituen neurriek zuzenean eragiten diete taldeak azpikontratuta dituen langileei, honezkero kaleratzeak jasan dituztenak eta oraingo espedientearen kasuan, ikusten ari direnak nola inposatuko zaien Aldi Baterako EEE bat Tuboseko langileen baldintzetan edo okerragoetan. Hauxe da Redena eta Montajes Jauregui enpresen kasua.

LABek publikoki salatu du egoera hau eta Eusko Jaurlaritzarekin batzartu da honen berri eman eta enpresaren aurrean bitartekari lanak egiteko deia egin dio, instituzio bezala exijituz gardentasuna kudeaketan eta benetako plan industrial baten beharra ezinbestean pasatzezn dena kapitala sartzetik eta akzionistek eraman duten dirua bueltatzetik. Hala ere Eusko Jaurlaritzak beste alde batera begiratzea erabaki du, langileen bizkarra emanez.

LABen borrokan jarraituko dugu taldeko eta azpikontratetako langileen eta Aiara eta Trapagarango etorkizunaren alde, inguru hauek ere jasotzen baituzte neurri hauen ondorio zuzenak.

 

 

 

Bilera batera deitu ditugu Bizkaiko bulego eta langeletako hitzarmenaren negoziazioan ari diren sindikatu guztiak

admin
-
0
Bilera batera deitu ditugu Bizkaiko bulego eta langeletako hitzarmenaren negoziazioan ari diren sindikatu guztiak

LAB sindikatutik jakinarazi nahi dugu ostiralean, urtarrilak 11, bilera bat egongo dela Bizkaiko bulego eta langeletako hitzarmenaren negoziazioan parte hartzen ari diren sindikatu guztien artean, LABek berak sustatuta.

Aurretik, mobilizazio egutegi baten proposamena helarazi zaie sindikatuei. Hauek egutegi hori baloratu eta euren posizioa adostu beharko dute ostiralean bertan.

Deialdi honek bere estrategia birplanteatzera behartu du ELA sindikatua, bakarrik aritzeko erabakia hartu eta gero, hitzarmen bat sinatzeko gehiengoa ez izan arren.

 

 

 

Ulertzen dugu Bizkaibus eta Bilbobuseko bidea ez dela edozein hitzarmen lehenbailehen sinatzea

admin
-
0
Ulertzen dugu Bizkaibus eta Bilbobuseko bidea ez dela edozein hitzarmen lehenbailehen sinatzea
CCOO eta UGTk Bizkaibuseko EMBko hitzarmena sinatu dute. Horrek dakarrena salatzen dugu LABen.

Sinatutako hitzarmenak enplegu suntsiketa babesten du, ez du langileentzako hobekuntza sozialik aurreikusten, ebentualen arteko prekarietatea igoaraziko du eta gainera, enpresa pribatu bat diru publikoarekin are gehiago aberastea ekarriko du, aurrerapauso sozialik ez dagoelako eta soldata- igoera oso apala delako.

Hurrengo taulan ikus dezakegu nor ateratzen den irabazle, askogatik gainera, EMB enpresak Aldunditik jasotako diru publikoarekin, UGT eta CCOOekin lortutako akordioarekin.

Akordio honekin enpresak ziurtatuta dauka 2018an 7,5 milioi euro baino gehiago eskuratuko dituela, eta 3 milioi euro baino gehiago 2019 eta 2020an. Diru-sarrera hauek azken urtean irabazitan lortzen zituen 4 milioi eurei batu behar zaizkie.

Aldundiak igoera hauek onartu ditu EMB eta Bizkaibuseko beste emakideentzat. Hau, 2014an salatu zen aurrekontu-partida horren jarraipena baino ez da. Ondorengoak lirateke kopuruak beste sozietateentzat:

Zenbaki hauek mahai gainean jarrita argi geratzen da Aldundia enplegu suntsiketa eta lan- baldintzen prekarizazioa saritzen ari dela, kalitatezko zerbitzu publikoa ziurtatu gabe. Diru publikoz saritzen ditu enpresak igoera horiek suposatuko dizkien irabaziak banatu ditzaten eta gainera, diru gehiago irabaziko dute amortizatu edo azpikontratatuko dituzten lanpostuekin.

Lotsagarria da diru publiko guzti hau ez erabiltzea bizkaitarren onurarako, langileok barne, eta enpresa pribatuek poltsikoratzea, negozioa egin eta bidaiarien garraio publikoaren kontura irabaziak are gehiago handitzea besterik ez dutenak buruan.

Horregatik, LABetik dei egiten die PESA LUR eta GAM Txorierriko langileei, mahai gainean greba- deialdiak dituzten Bizkaibuseko enpresa biak, ez dezatela lortu edozein akordio enpresekin eta lanpostuak amortizatuko ez direla berma dezatela. Horrela, zerbitzu hobea emango zaie herritarrei eta lan-baldintza ekonomiko eta sozial hobeak bermatuko zaizkie langileei.

Beste alde batetik, LABek ohartarazi nahi du arazoa Bilbobusen birsor daitekeela, eta horregatik argi utzi nahi du Bilboko Udalak bere erantzukizuna onartu behar duela kalitatezko zerbitzua bermatuz lanpostuak amortizatu gabe, langilee ebentuales prekarietaterik gabe, langileentzako segurtasunarekin, etab. Bilbotarrei ziurtatuz Bilbobusera bideratutako diru publikoa kalitate sozial eta laborala duen zerbitzu baterako dela eta ez ALSA bezalako enpresak Bilbo eta Bizkaia aberasten jarraitzeko.

Horregatik, LABek jarrera oso argia izango du Bizkaibuseko enpresetako bakoitzean eta Bilbobusen, langileentzat onuragarriak izango diren akordioa lortzen saiatuz, CCOO eta UGTren akordioaren antzerakoak sinatu barik, egiten duten bakarra enplegua suntsitu, lan-baldintzak prekarizatu, garraioko zerbitzu publikoa kaltetu eta enpresa pribatuen irabaziak loditzea besterik ez denean. Baliteke honek zerikusia izatea Aldundian zein Udalean garraioaren ardura daukatenei egindako mesede politikoekin.

 

 

 

GTH enpresako langileek protestekin jarraitzen dute

admin
-
0
GTH enpresako langileek protestekin jarraitzen dute

Lanuzteak egin dituzte, eta Erandioko GTEren aurrean egin dute gaur mobilizazioa. GTE eta GTH, biak dira Gestamp taldeko enpresak. Biharko protestei dagokienez, hamaiketakoa egingo dute enpresaren egoitzaren aurrean, Derion.
 

 

 

Bizkaiko Foru Aldundiko garbiketako langileek lortutako akordioa berretsi dute

admin
-
0
Bizkaiko Foru Aldundiko garbiketako langileek lortutako akordioa berretsi dute

Bizkaiko Foru Aldundian lan egiten duten Garbialdiko langileek baiezko biribila eman diote LAB, UGT, CCOO eta ESK sindikatuek lortutako akordioari.

Ostiralean bilduko dira enpresarekin hitzarmena sinatzeko, ondorioz, 2010. urtetik langileek jasandako soldata izozketari eta horren harira piztutako gatazkari amaiera ipiniko zaio.

Akordioak Udalhitzeko 6. mailarekiko ekiparazioa onartzen du du 2018-2021 urte bitarteetan. Enpresak urtarrilaren 1ean %2,4ko igoera aplikatu beharko du langileen soldatetan eta 2018rako akordatu den %1,2ko soldata igoeragatik sortu diren atzerapenak ordaindu. 2020. urteko soldata igoera %1,8koa izango da eta 2021ekoa %2,34koa.

Gainera, nominaren kontzeptu guztien gainean aplikatuko diren igoera hauez gain, langileek urtean 225 euroako osagarri berri bat jasoko dute 2020.urtetik aurrera.

Eskubide sozialei dagokionez, langileek urtean zehar zubi batez gozatuko dute opor egunetatik deskontatu barik eta horrez gain, enpresak urtero asumitzen duen errebisio ginekologikoa bere gain hartzen jarraituko du.

Langileen aldarrikapen nagusia Udalhitzeko 6. mailarekiko soldata ekiparazioa zen, hau da, udaletxeetako garbiketa langile propioek irabazten duten beste irabaztea, eta horrek %6,54ko soldata igoera suposatzen zuen. Hainbat hilabeteetan zehar enpresak %0,3ko igoera baino ez zuen eskaintzen. Estrategia argia zuen: langileak nekarazi, negoziazioa luzatu eta finean, hitzarmen honen desagerpena eragin.

Baina duela urtebete baino gehiago, langileek kalera irtetzea eta mobilizazioak piztea erabaki zuten. Urte honetan 50 protesta baino gehiago antolatu dituzte, baita 6 egunetako greba ere. Asteartero, bilkura ospatzen zela aprobetxatuz, bere lanbesak altxatu dituzte Foru Jauregiaren aurrean.

Bizkaiko Foru Aldundiko garbitzaileek, hainbat urtetan zehar, sektorearentzat erreferentziazkoa den hitzarmen bat izan dute; euren antolakuntza eta borroka nekaezinari esker erreferentziala izaten jarraituko du, hitzarmena berritzea eta euren soldata-baldintzak hobetzea lortu baitute.

LABen iritziz gatazka honek ondorio argi bat uzten digu: borroka egiteak balio duela. Hori dela eta langile guztiak goraipatu nahi ditugu, dena kontran zegoela ematen zuenean borrokari eutsi egin diotelako, aurrera egitea aukera bakarra dela erakutsiz.
 

 

 

Babes eta elkartasun osoa eskaini nahi diegu Gasteizko Mendizabalako ikastetxean itxialdia hasi duten irakasle teknikoei

admin
-
0
Babes eta elkartasun osoa eskaini nahi diegu Gasteizko Mendizabalako ikastetxean itxialdia hasi duten irakasle teknikoei

Denbora luzez bizi duten babesgabetasun egoera salatu ondoren, urrats bat gehiago eman eta itxialdia egitea erabaki dute beraien eskubideen defentsan.

Gaur egungo araudiekin lanbide heziketako ikasgai teknikoetan irakasle lanbidean hasteko bi bide daude: ordezkoen zerrendaren bidez eta oposizio bidez.

Ulergaitza egiten bada ere, araudiak ezberdinak dira. Ordezkoen zerrendan sartzeko eskakizunak zabalagoak dira. Lanbide heziketako goi mailako titulazio askorekin ordezkoen zerrendan izena emateko aukera dago (prestakuntza pedagogikoa izanda). Eta gaur egun langileen zati handi bat multzo honetan kokatzen da.

Oposizio bidez, aldiz, lanbide heziketako goi mailako ikasketa gutxik ematen dute aukera irakasle tekniko gisa sartzeko. Eta beste kasu gutxi batzutan, 2007. urtea baino lehen bi urteko lan esperientzia egiaztatuta. Gainontzeko lanbide heziketako titulazioa duten langileek, nahiz eta gaur egun irakasle gisa lanean egon, ez dute inoiz aukera izango oposizioetara aurkezteko.

Gainera, datozen urteotan lanpostu asko oposizio bidez egonkortuko dela kontuan hartzen badugu eta eredu berriaren arabera oposaketak gainditutakoei 6 puntu emango balizkiite, egoera oso larrian geratuko lirateke langile hauek. Urteetan hezkuntzan zerbitzuak emanda, lanbide heziketaren zutabe garrantzitsu bat eraiki duten irakasle asko lanpostua galtzeko bidean egon daiteke neurririk hartzen ez bada.

Honi guztiari prestakuntza pedagogikoari dagokion arazoa gehitu behar diogu. Aparteko azterketa merezi duena.

Hezkuntza Sailaren ardura da arazo larri honi irtenbidea ematea. Urgentziazko neurri hauek eskatzen dizkiogu:

1. Egoeraren diagnostiko zehatza egitea, egoera honetan zenbat langile eta zein titulaziorekin aurkitzen den aztertuz.

2. Beharrezko araudi aldaketak egin langile hauei sarbidea errazteko.

3. Egoera konpontzen den bitartean irakasle teknikoen oposiziorik ez deitzea.

 

 

 
1...693694695...1,594Page 694 of 1,594

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus