2026-04-29
Blog Page 652

Ezin da industria aurreratu batetaz hitz egin Bizkaiko Metalgintzako langileak prekarietatera kondenatzen dituzten bitartean

admin
-
0
Ezin da industria aurreratu batetaz hitz egin Bizkaiko Metalgintzako langileak prekarietatera kondenatzen dituzten bitartean

Bizkaiko Metalgintza sektorean deitutako grebak jarraipen oso zabala izan du gaur. FVEM patronalak zabaldutako gezurren gainetik, eta hainbat enpresatan egoera okerrenean dauden langileek jasandako presioaren gainetik, grebak %85eko jarraipena izan du. Aurreko greba egunean baino handiagoa izan da grebarekin bat egin duten langileen kopurua. Zorionak kalera ateratako langile guztiei, erakutsitako duintasunagatik.

Bizkaiko Metalgintzan une historikoa da bizi duguna, eta FVEM patronalak bere jarrera harroputza baztertu eta langileen egoera okertzearen kontura aberasteari utzi beharko lioke.

BECen antolatutako azpikontratazioaren azokaren aurrean gaur salatu dugun moduan, ezin da industria aurreratu batetaz hitz egin langileak prekarietatera kondenatzen dituzten bitartean; emakumeek industriara sarbiderik ez duten bitartean; milaka direnean 10 urtez euren lan baldintzak izoztuta dituzten enpresa txikitako langileak; ETT eta azpikontratetan esplotazioa pairatzen ari direnean. Hauentzat subrogazioa beharrezkoa da bizi duten prekarietate egoerari aurre egiteko.

Patronalak gaurko aldarria entzun eta Bizkaiko Metalgintzako hitzarmen duin baten aldeko apustua egin beharko luke. Honela ez bada, LABek langile batasuna eta borrokaren aldeko apustuarekin jarraituko du. Bihar, ekainaren 7an, Bizkaiko Metalgintzako hirugarren greba eguna egingo dugu. Manifestazio nagusia Bilbon izango da, 11:30ean. Jesusen Bihotzean irten eta FVEM patronalaren egoitzan amaituko da.
 

 

 

SEAren jarrera inmobilistaren aurrean, aktibazioaren beharra aldarrikatzen dugu Arabako metalgintzan

admin
-
0
Atzo, ekainaren 5ean, Arabako metalgintzako mahai negoziatzailea bildu zen eta bertan, nagusiki, sailkapen profesionala eta soldatak izan zituzten hizpide. SEAren jarrera argia zen: estatuko hitzarmena gurera ekartzea eta soldata igoera eskasak adostea, 2018ko urtea ezabatuz. Horren aurrean, LABen aktibazioaren beharra azpimarratu nahi du.

Atzoko bileran bi gai nagusi jorratu zituzten, sailkapen profesionala eta soldata igoerak. Lehenengoari dagokionez, SEAk sailkapen berri bat proposatu zuen Arabako Metalerako, talde profesionalak ezarriz. Halere, proposamen hori da hain justu Estatuko metalgintzako hitzarmenean agertzen dena, zaharkituta gelditu diren mailak mantentzen ditu eta ez du suposatzen langileentzat inolako hobekuntza ekonomikorik.

Bestaldetik, SEAk berretsi zuen 2018rako ez duela inongo soldata igoerarik aurreikusten, eta hurrengo urteetarako igoerak bere horretan mantentzen dituela. Aldi berean, patronalak berretsi zuen lanaldia ezin dela jaitsi (1.735 ordutakoa da, Euskal Herriko metalgintza hitzarmenen arteko altuena) eta ez duela onartzen subrogazioa hitzarmenean jasotzea.

Hori guztia dela eta, LABek oso larritzat jotzen du SEAren jarrera, bere planteamenduak erabat onartezinak direlako eta bilera burutu ahala, akordio bat urrun du besterik ez du egiten.

Horren aurrean, LABek argi eta garbi azpimarratu nahi du aktibazio eta mobilizazioaren beharra eta norabide horretan, hurrengo asteetan mobilizatzeko prestutasuna agertu nahi dugu, sektoreko beharrei erantzungo dien hitzarmena lortzeko helburuz.
 

 

 

Osakidetzako Lehen Arreta sendo, eraginkor eta iraunkor baten alde egingo dugu greba, ekainaren 17an

admin
-
0
Osakidetzako Lehen Arreta sendo, eraginkor eta iraunkor baten alde egingo dugu greba, ekainaren 17an

LAB, SATSE, ELA, CCOO, UGT eta ESK sindikatuok eta Lehen Arreta Arnasberritzen plataformak grebara deitu dugu ekainaren 17rako, Lehen Arretako egungo eredua guztiz urria dela salatzeko eta Osakidetzari bere jarrera zuzentzea eta profesionalen beharrizanetan oinarritutako konponbideak martxan jartzeko exijitzeko. Atzo iragarri bezala, grebaren erregistroa egin dugu Bilbon, Eusko Jaurlaritzaren egoitzan, eta ekainaren 17an Gasteizen manifestazio bat egingo dugula jakinarazi dugu (Plaza de Bilbao, 12:00).

LAB, SATSE, ELA, CCOO, UGT, ESK eta Lehen Arreta Arnasberritzen plataforma oso pozik gaude langileen aldetik jaso dugun babesarekin.

Osakidetzako zuzendaritzak, konponbideak luzatzeko, aldebakar gisa mahai sektorialeko deialdia atzeratu du. Guk, ordea, emaginak, erizainak, erizain laguntzaileak, medikuak, gidariak, pediatrak, zelariak, administrari laguntzaileak, administrariak, etabarrek tinko jarraituko dugu Lehen Arreta Mailan jardun dugun guztion aldarrikapenei uko egin gabe.
 

 

 

Iruñeko El Corte Inglesek bi langile kaleratu ditu gezurretan oinarrituz, langileak izutzeko helburuarekin

admin
-
0
Iruñeko El Corte Inglesek bi langile kaleratu ditu gezurretan oinarrituz, langileak izutzeko helburuarekin

Kaleratzeak salatzeko, elkarretaratzea egingo dugu ekainaren 7an, 11:00etan, El Corte Inglesen aurrean. Ez gara isilduko!

 

 

 

Nafarroako Hezkuntza Departamentuak behin-behineko langileen esleipenak atzeratu izana egonkortasuna finkatzeko atzerapausua da

admin
-
0
Aurreko astean jakin genuenez, Hezkuntza Departamentuak behin-behineko langileen esleipen prozesu guztia abuztura atzeratzea erabaki du. Oposizio garaian -aurten Haur eta Lehen Hezkuntzari dagokio- prozesu horretan parte hartzen dutenei plazen aukeraketa abuztura atzeratzea logikoa izan ohi da, baina oraingo honetan alor publikoko irakasleria osoari eragingo dio -Bigarren Hezkuntza eta Lanbide Heziketa barne-, oposizioak izan ala ez. Erabaki horren zergaitirik ez dugu oraindik jaso eta ulergaitza egiten zaigu, aukeraketa ekainaren amaieran izanda, irakasleriak datorren ikasturterako planifikazioa egin ahal izateko aukera gehiago izan baititu.

Iragarpen horren ondorioz, azken urteotan esleipenak ekainean izateko ahalegina zapuztu egin da eta ondorioz ikasturteko planifikazioa eta prestaketa didaktikoa egokiagoa egiteko xedea. Beraz, ikasturtean barna gabeziak pairatzeko tartea berriro handitu egingo da. Irakasleok erabaki ezberdinak hartu behar ditugu esleipenen ondorioz: bizitzeko lekua, mugikortasuna, edukin didaktiko eta metodologiko berriak nola ezarri…
Esleipenak atzeratzeak bertze ondorio pedagogiko batzuk dauzka pertsonalez haratago: jardunaldi murritza duten plazak, profil anitz edo berezietakoak zein ibiltari direnak betetzea zail izaten ohi denez, urtero plaza multzo bat hasierako deialdian esleitu gabe gelditzen ohi da. Dena abuztura gibelatzeak ikasturte hasieran hainbat ikastetxetan hutsuneak daudela hasiko garela aurrikusten dugu.

Planifikazio egokia
Mota horretako erabakiak hartzeko askoz ere egokiagoa iruditzen zaigu oposizio prozesuan ez dagoen irakasleriak ekainean jakitea nora joango den datorren urtean, planifikazioa patxada handiagoz egin dezan, hala nola behin-behineko irakasleriaren egonkortasuna sendotzeko bidean aurrerapausoak finkatzeko.

Horregatik prozesu hori guztientzat abuztura atzeratzea kaltegarria dela deritzogu eta Hezkuntza Departamentuari erabaki hori birplanteatu eta oposizioen eraginpean ez dauden esleipenak orain arte bezala ekainean egitea galdegiten diogu.
 

 

 

Asteburuan, gaueko txandan, erizaintza zerbitzurik gabe egon dira Egogain helduen egoitzan

admin
-
0
Asteburuan, gaueko txandan, erizaintza zerbitzurik gabe egon dira Egogain helduen egoitzan

Eibarko Egogain helduen egoitzako langileek protestekin jarraitzen dute, euren egoera jasangaitza dela salatzeko. Hain zuzen ere, Eibarren, Urkizun egin ohi duten azokan elkarretaratzea egin dute, eta, bertan, azken egunotan egoera okertu egin dela jakinarazi dute: "Irailaz geroztik daramagu Gipuzkoako Foru Aldundiak Egogainen ezartzen ari den eredua salatzen: pribatizazioak, lan baldintzen kaskartzeak, azpikontratan lan egiten duten lankideen egoera eskasa… Ematen ari diren arretaren kalitatean eragin handia du; horren adibide da asteburu honetan erizaintza zerbitzurik gabe egon garela gaueko txandan, inposatzen ari diren neurriek langileak beste enpresa batzuetara joatea eragiten dutelako. Borrokan jarraitzen dugu, eta ez dugu etsiko".

 

 

 

KYBSE-ko Enpresa Batzordeak errefusatu du KYB multinazionalak Nafarroan 133 langile kaleratzeko duen asmoa

admin
-
0
Orkoiengo KSS lantegian kaleratuko dituen 133 langileak Ororbiako KYBSE lantegian berriz hartzeko proposamena egin dio KYB multinazionalak KYBSEko Enpresa Batzordeari, baina gaur azken honek baztertu egin du hitzarmenaren aldaketa hori -UGT sindikatuak hala eskatuta eta aho batez- multinazionalak eginiko proposamen horrek KYBSEko behin-behineko langile batzuk kaleratzea ekarriko lukeelako.

Paradoxikoki, orain aste batzuk multinazionalak proposamen berbera egin zuen Los Arcosen duen lantegian (KAMS), eta kasu horretan UGT-k eta CCOO-k onartu egin zuten, baina LABek, ez, noski. Izan ere, proposamen horrek aurrera egiteak une honetan KAMSen dauden 13 langile kaleratzea lekarke.

LAB-en uste dugu multinazionalak nahikoa bitarteko dituela langile bat bera ere lanik gabe geratu ez dadin bermatzeko, eta argi utzi nahi dugu ez dugula landuko kaleratzeak suposatuko duen proposamenik. Ildo horretan, KYB-k Nafarroan dituen hiru lantegietako -Orkoien, Ororbia eta Los Arcos- langileen enplegua bermatzeko oinarria abiapuntu hartuta, behar beste neurri adosteko gure prestutasuna azaldu dugu. Baina, horren aurrean, multinazionalak adierazi du bere asmoa dela 133 langile kaleratzea, lantegi batean edo bestean.

KYB Multinazionalak eta Nafarroako Gobernuak duten erantzunkizuna kontuan hartuta, langile guztientzat enplegua oinarri izanen duten neurriak har ditzaten exijitzen diegu, langileen artean inolako ezberdintasunik egin gabe.

 

 

 

Correosek Bilbon egindako murrizketa berriaren aurrean, mobilizazioa bihar posta zerbitzu unibertsalaren defentsan eta kalitatezko posta publiko baten alde

admin
-
0
Funtzionarioen batzordeak eta enpresa komiteak, atal sindikal guztien babesarekin, ordezkarien kontzentrazio bat egingo dute bihar osteguna, ekainaren 6an, goizeko 11etan Bilboko posta- bulego nagusian (Urkixo zumarkalea, 19).

2016an, Correos-ek Bilboko banaketako 54 postari kentzea erabaki zuen, horrek dakarren enplegu galerarekin. Orain, berriro ere, 16 postari gehiago kentzea erabaki du, guztira, hiriburuko langileen herena. Postari bakoitzak 2.500 biztanletik gorako errolda hartu behar du egunero. Bilboko banaketan murrizketa berri hau arrazoitzeko argudiorik ez dago, are gehiago Internet bidezko erosketetatik datozen paketeen hazkundea banaketa-unitateetan arazo eta zailtasun asko sortzen ari denean, enpresaren aurreikuspen eta garai berrietara egokitzeko neurri faltagatik.

Correos-eko funtzionarioen batzordeak eta enpresa-komiteak, atal sindikal guztien babesarekin, publikoki salatu nahi dute erabaki horrek hiritar guztion eskubidea den eta Correos-en esku dagoen posta-zerbitzu unibertsalaren gainean duen eragina.

Lehenagotik ere legeak agintzen duen bezala astelehenetik ostiralera etxebizitza guztietara heltzeko arazoa bazuten, neurri berri honekin arazoa are handiagoa izango da. Postari bakoitzak ezinezkoak diren lan-zamak jasan beharko ditu herritarrei gutunak banatu ahal izateko, honek posta-zerbitzu unibertsalaren ez betetzea ekarriz.

 

 

 

Bilboko Udaleko 010 zerbitzuko langileek ekaineko bigarren greba eguna egin dute

admin
-
0
Bilboko Udaleko 010 zerbitzuko langileek ekaineko bigarren greba eguna egin dute

Bilboko Udaleko 010 zerbitzuko langileek 6 greba egun deitu dituzte ekainerako; bada, bigarren greba eguna egin dute gaur. Oporraldian eta soldatetan hobekuntzak eskatzen dituzte, baita zerbitzua hobetzeko langile bat gehiago kontratatzea ere.

 

 

 
1...651652653...1,613Page 652 of 1,613

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus