2026-07-25
Blog Page 651

Itxialdia egingo dute greba mugagabean dauden Tecmaneko langileek Mendaroko ospitalean

admin
-
0
Itxialdia egingo dute greba mugagabean dauden Tecmaneko langileek Mendaroko ospitalean

Mendaroko ospitalean mantenu lanak egiteko kontratatuak dauden Tecman SVA S.L. enpresako langileek 70 egun daramatze greba mugagabean. Luze egin zaizkien 2 hilabete hauetan egoera ez da ezertan aldatu; Tecman SVA S.L.ren nahiz Osakidetzaren gogo ezak, akordioren bat lotzeko eta egoera askatzeko, ez du mugarik.

Langileen arabera, enpresaren zuzendaritzak ez du kezkarik agertzen ere beraien ekonomia-interesak, beraien irabaziak, beraien marjinak,… guztiaren gainetik jartzeko. Jakina, beti diru publikoa erabiltzen dute, Tecman SVA S.L.-ko langileen kontura, Mendaroko Ospitalaren eta Debabarrenaren erabiltzaileei eskaini behar zaien arretaren kontura. Gutxiengo jakingura eta begirunea erakutsiko baliete langileei eta Osakidetzaren erabiltzaileei, duela aste batzuk itxiko litzateke akordioren bat.
Grebalariak egiten ari diren borroka hau, lan baldintzak duindu daitezen borroka izateaz gain, kalitateko zerbitzu publikoa lortzearren egin borroka ere bada. Osakidetzak azpikontratatzen ditu lan baldintzak eta Tecmanek, langileen bizkar, poltsikoak betetzen ditu.

Jadanik 70 egun igaro dira; 70 egun hauek baliagarriak gertatu zaizkie langileei euren borrokan, hitzarmen duina eta oinarrizko helburuak lortzeko borrokan berrets daitezen. Honatx euren aldarrikapen nagusiak:

1. Soldata igoerak KPIri lotuak. Soldatek 2011. urteaz geroztik bere horretan diraute; garaia da eguneratzeko.

2. Zaintzak eta “guardia” izenez ezagutzen diren txandei dagokienez, hauen xedea da ordu erdiko epe batean Ospitalean sor litezkeen edozein matxurari edo ustekabekoari aurre egiteko. Lan honen ordainez Osakidetzako mantentze lanetako teknikari batek 43 € eguneko kobratzen du, Tecmanekoek aldiz, 11 € kobratzen dituzte. Horrengatik, lan bera egiteagatik kopuru bera kobra dadila eskatzen dute soilik.

Gainera, 70 egun hauetan, Tecman SVA S.L.-ek eta Osakidetzak, funtsezkoa den grebarako eskubidea behin eta berriz urratu izanaren lekukoak izan gara. Horrek eraman gintuen, uztailaren 19an, demanda edo eskea jartzera. Epaiketa irailaren 20an izango egingo da. Dena dela ere, gertakaria hau ez da nahikoa izan langileen grebarako eskubidea urratzeari utz diezaioten: bi enpresen jarrera urritu baino, biderkatu da azken hilabetean.

Tecman SVA S.L.ko langileok kokoteraino daude egoera honekin, kokoteraino Tecman SVA S.L.-k eta Osakidetzak gutxiesteaz, bigarren mailako langiletzat hartu eta ezikusiarena egiten dutelako.

Aurreko guztia salatzeko, bihar, irailaren 10ean eta etzi, irailaren 11an, itxialdia egingo dute Mendaroko ospitalean. Bi egunetan, mobilizazioa egingo dute bertako sarreran 11:00etan.
 

 

 

Langile publikoen egonkortasunerako aukera Europako epaiaren zain dago

admin
-
0
Langile publikoen egonkortasunerako aukera Europako epaiaren zain dago

Aste honetarako Europako Epaitegiko Fiskalak espainiar estatuko behin-behineko langile publikoen egoerari buruzko iritzia argitaratzekotan zegoen. Izan ere Madrilgo osasun zerbitzuko hiru langileen egoera epaitzen ari dira, 12 eta 18 urte bitarteko aldi baterako kontratu kateatu ugari metatu dituztenak. Fiskalaren iritzia oso erabakigarria izan daiteke urrian zehar epaitegi horrek eman behar duen sententziari begira, zeinaren bitartez Hego Euskal Herriko langile publikoen ia erdien egoera, behin-behinekoena alegia, Europako irizpideak betetzen dituen ala ez ebatziko den.

LABek ere eskaera ugari bideratu ditu helburu berdinarekin, iruzurrean eta prekarietatean oinarritutako kontratazioak legearen kontra jo eta kontratu mugagabe bihurtzea hain zuzen ere. Esan bezala, Europan ebatziko den epaiketa langileen aldekoa izan ezkero oso onuragarria izan daitekeelakoan gaude, langile publikoen behin-behinekotasunari muga sendoak jarri eta egonkortasunari ateak erabat zabalduko lizkiokeelako.

Hain zuzen ere LAB, zuhurtzia eta erantzukizunagatik, Europako ebazpenaren zain dago erreklamazioen bideak judizializatzeko, argudio juridikoak ahalik eta sendoenekin jokatzearren. Gai delikatu eta larri honekin afiliazio edota diru-bilketa kanpainak egiteari ez deritzogu arduraz jokatzea. Gauzak behar besteko arduraz hartzea ezinbestekoa da, langileentzako koste ekonomikoak handiak izan daitezkeelako, eta kontrako sententziak erabat zoritxarrekoak.

Behin Europako Epaitegiak bere ebazpena ematen duenean LABek bere hurrengo urrats zehatzen berri emango du. Hala eta guztiz ere, emaitza bata ala bestea izan, ez gara bide juridiko hutsera mugatuko, eta borroka sindikalarekin ere jarraituko dugu. Euskal administrazioek erabateko erantzukizuna daukate langileen behin-behinekotasuna eta prekarietatearekiko. Epai hauen zain egoteak administrazioen benetako borondatearen zantzua besterik ez da, hots, ez daudela behartzen zaiena baino aurrerago joateko inolako asmorik, behin-behinekotasuna eta prekarietatea tresna garrantzitsutzat dutelako. Euskal administrazioetan enplegua egonkortzeko eta duintzeko tresnak baditugu, baina ohi bezala, borondatea da falta dena. Behartu ditzagun bada!

 

 

 

Lan Ikuskaritza interpelatu dugu Glovoko aferari buruz eta langile baten erreklamazioa auzitegira eraman dugu

admin
-
0
Lan Ikuskaritza interpelatu dugu Glovoko aferari buruz eta langile baten erreklamazioa auzitegira eraman dugu

Abuztuan soldatapeko langile aitortzeko rider baten kasua Lan Departamentuan salatu ondoren, enpresa ez zen kontziliazio saiora aurkeztu. Horregatik, ostiralean eskaria auzitegian erregistratu genuen, eta, bide batez, Lan Ikuskaritzan Glovoren kontrako salaketa sartu genuen.

Hau soilik pertsona baten erreklamazioa ez izatea nahi dugu, eta horregatik interpelatzen dugu Lan-Ikuskaritza. Dagoeneko Lan Ikuskaritzak enpresa hauen langileak soldatapekoak izan beharko zirela aitortu du herrialde desberdinetan, Gizarte Segurantzako Erregimen Orokorrean kotizatu behar dutela azalduz. Honen inguruko azken aipamena Granadan izan da SAT sindikatuak salaketa sartu ondoren, eta 180 rider-eko talde bati eragiten dio.

Rider-ak soldatapeko langilearen izaera aitortu behar zaiela esaten duten erabaki hauek ikusirik, baita auzitegi desberdineko epai ezberdinak ere (Goiko Auzitegi batena barne), Nafarroan Lan Ikuskaritzaren ordua dela uste dugu. Enpresa honek egiten duen autonomo faltsuen erabilera maltzurra, Nafarroan ere iker dezaten unea iritsi da, enpresa gure herrialdean 10 hilabete daramatzalarik.

Nafarroan, 100 langile baino gehiago dira Glovon la egiteko autonomo izatera behartuak direnak, nahiz eta guztien kasuan negoziaziorik ez egon kontratua sinatzerakoan eta lan egiteko ezinbestekoa den tresna (riderren aplikazioa) soilik enpresak kontrolatzea. Errealitate hauek agerian uzten dute langileek enpresarekiko duten harremana mendetasun handikoa dela eta besteren kontura kontratatuak izan beharko liratezkeela.

Kapitalismoa digitalaroan prekarietate eredu hau bultzatzen ari da banatzaileen arloan, baina beste jarduera askoetara esperimentu hau zabaltzea da haien interesa. LAB sindikaturako ezinbestekoa da prekarietate basati honen zabalpena blokatzea, lan eskubide guztien gainetik pasatzen duena, langileen arteko lehia eredua bultzatzen duena eta sistema publikoa degradatzen duena kotizazioen ordainketa saihestuz.

Langileen esplotazio eta tratu txarrean oinarritzen diren eredu berriei aurre egitea baita herriari egiten zaion iruzurrarekin bukatzea, lehentasunezkoa izan behar da, bukaezina izan daitekeen lan eskubideen sarraskia sahiesteko helburu.

 

 

 

Bat egiten dugu Jaizkibel konpainiarekin

admin
-
0
Bat egiten dugu Jaizkibel konpainiarekin

LAB sindikatuak, eta bereziki Oarso-Bidasoa eskualdeak, Jaizkibel konpainiarekin bat egiten dugu aurten ere. Ezaguna da urte luzez emakume langileok izan dugun borroka eta Hondarribian ere hala da. Alarde publiko, parekide eta bakarra lortzeko erronkak berean dirau. Urteetan ez bezala iaz Kale Nagusian bizitako oihu, irain etabar areagotuek atzera pauso nabarmena eragin zuten Jaizkibelek duen normaltasunez desfilatzeko eskubidean. Hori gutxi ez eta udal gobernuak eginiko ordutegi aldaketarako “proposamena” emakume langileon eskubideei irain larria dela uste dugu, subjektu gatazkatsua oker identifikatzen duelako eta saihestezina den parekidetasunerako bidea oztopatzen duelako.

Aurtengoarekin, 26 urte beteko dira Hondarribiko emakume talde batek parekidetasunez Alardean parte hartzeko grina adierazi zuena, ordutik eta gaur arte lanean jardun zareten guztiei esker eta zorion beroenak helarazi nahi dizkizuegu LABetik.

Honegatik guztiagatik, irailaren 8an Hondarribiko kaleetan elkar ikusteko gonbita luzatzen dizuegu guztiei, elkarrekin txalotu, desfilatu eta gozatu dezagun.

Gora borroka feminista! Gora Jaizkibel!
 

 

 

11/13 makroepaiketa bertan behera geratzea aldarrikatu dugu

admin
-
0
11/13 makroepaiketa bertan behera geratzea aldarrikatu dugu

10 egun barru, irailaren 16an Madrilen hasiko den 11/13 makroepaiketa. 47 herritar daude auziperatuta eta 601 urtetako kartzela eskariei egin behar diete aurre. Honen aurrean, mobilizazioak egin dituzte gehiengo sindikaleko sindikatuek Bilbo, Donostia, Gasteiz eta Iruñean. “Giza eskubideak, askatasuna, etorkizuna” lemapean egin dira dira mobilizazioak.

Iruñea.

Garbiñe Aranburu LABeko idazkari nagusiak Donostiakoan hartu du parte, eta Iruñean izan da Igor Arroyo idazkari nagusi ondokoa. Aranburuk komunikabideen aurrean adierazi du “makroepaiketa berri baten atarian gaudela eta lehenik eta behin, gure elkartasun, babes eta maitasun osoa adierazi nahi diegu auziperatue guztiei eta euren ingurukoei.

Gaineratu du epaiketa hau ez datorrela bizi ditugun garaietatik bat. Pertsona hauek preso politikoen kolektiboari arreta emateagatik epaitu dituzte. Hori ezin dela delitu izan gaineratu du, “epaiketaren motibazioa politikoa dela ulertzen dugu, ez juridikoa”.

Bilbo.

Bere iritziz, “herri honek ibili nahi duen bidearen kontrako norabidean doan epaiketa da”, LABeko idazkari nagusiaren esanetan. Gehiengo politiko, sozial eta sindikal batek adostasun zabalik sortu ditugu bestelako kartzela-politika eskatzeko, preso zein iheslarien etxeratzea konponbidean ipintzea eskatzeko.

Jarraian, adierazi du herri honetan gehiengoa garela “bake eta bizikidetza demokratikoko egoera baten eraikitzearen alde gure ekarpena egiten ari garenak”, eta gehitu du “testuinguru honetan, epaiketa hau zentzugabekeria da, anakronismoa, eta geratu egin beharko litzatekeen prozesu judiziala”.

Gasteiz.

Langileak makroepaiketaren aurrean deituta dauden mobilizazioetan parte hartzeko deia eginez amaitu du, bereziki irailaren 14an Bilbon egingo den manifestaziora joatea eskatuz.
 

 

 

Lan Ikuskaritzak berretsi du Martxoaren 8an greba eskubidea urratu zutela Athletic Club Museoan

admin
-
0
Lan Ikuskaritzak berretsi du Martxoaren 8an greba eskubidea urratu zutela Athletic Club Museoan

Athletic Club Museoa kudeatzen duen Azafatas Ercilla enpresa greba eskubidea urratzeagatik zigortua izan da.

Lan Ikuskaritzaren Txostena luzaro itxaron behar izan dugu, baina 2018ko martxoaren 8an greba feminista gauzatzen zen bitartean suertatutako langileen ordezkatze ilegala frogatuta dago dagoeneko. Garaipena gurea da, beraz ezinbestekoa da horrelako egoerak salatzen jarraitzea.

Athletic Club moduko instituzioek horrelako larritasuna duten jarrera enpresarialak babestea eta bultzatzea onartezina da. Ez da soilik zerbitzu guztien azpikontratazioa eman denik (Museoa, garbiketa, zelaiaren mantenu lanak, jatetxea, VIP eraztuna, Txapelgorriak…), horrek dakarren prekarizazioa prozesuarekin, oraingo onetan langile klasearen oinarrizko eskubideak ere bermatzean datza. Athletic bezalako erakunde batek garrantzia gehiago eman beharko lieke oinarrizko eskubideei.
 

 

 

Lanera seguru iritsi eta etxera bizirik bueltatzeko eskubidea aldarrikatu dute Sestaoko Carrefour-eko langileek

admin
-
0
Lanera seguru iritsi eta etxera bizirik bueltatzeko eskubidea aldarrikatu dute Sestaoko Carrefour-eko langileek

Sestaoko Carrefour-eko enpresa-batzordeak mobilizazioa egin du, abuztuaren 24an lankide batek izan zuen eraso sexista salatzeko. Bertan, elkartasuna adierazi diote erasoa jasan zuen langileari.

Hauxe da Sestaoko Carrefour-eko enpresa batzordearen oharra, gaurko elkarretaratzearen harira:

Pasa den abuztuaren 24an, merkatal-zentroko lankide bati eraso egin zioten modu basatian.

Ez da kasualitatea, eta ezta ere inguru honetan emakume batek indarkeria sexista jasaten duen lehen aldia.

Emakumeok okerren ordaindutako enplegu prekarioetara kondenatuta gaudenez, geu gara garraio publikoaren erabiltzaile nagusiak gure lanpostura joan eta bertatik gure etxeetara itzultzeko.

Gure kasuan, autobusa edo metroa erabili ahal izateko, behartuta gure segurtasunerako puntu beltza den bide batetik joaten, batez ere gaueko 22:30ean amaitzen diren edo goizeko 05:00etan hasten diren txandak egiten ditugunean.

Gaur eta hemen, erasoa jasan duen gure lankideari gure elkartasun guztia erakutsi nahi diogu.

Gaur eta hemen exijitzen dugu Ibar Zaharra poligono honetatko langileon segurtasuna berma dadila. Horretarako, instituzio eta erakundeek beharrezko neurriak hartu beharko dituzte.

Lanera seguru iritsi eta etxera bizirik bueltatzeko eskubidea dugu.

 

 

 

Elkartasuna adierazi diogu SAT sindikatuari Sevillan egingo den epaiketaren aurrean

admin
-
0
Elkartasuna adierazi diogu SAT sindikatuari Sevillan egingo den epaiketaren aurrean

Sindicato Andaluz de Trabajadores/as (SAT)-eko 20 sindikalistek Mercadonatik janaria hartu eta Andaluziako behartsuei emateagatik 30 urteko kartzela zigor eskariei aurre egin beharko diote gaur.

Gaur irailak 5, Sindicato Andaluz de Trabajadores/as-eko (SAT) 20 militantek epaiketa izango dute orain zazpi urte Ecijako (Sevilla) Mercadona batetik janaria hartu eta Andaluziako behartsuei emateagatik. 20 sindikalista hauek 30 urtetako kartzela zigor eskari bati egin beharko diote aurre.

Ekintza hau, Andaluzian eta beste toki askotan ondorio dramatikoak izan dituen krisi ekonomiko baten erdian eman zen. Egoera horretan SAT-ek Arcos de la Fronterako (Cadiz) Carrefourrean eta Écijako (Sevilla) Mercadona batean janaria hartu eta modu ageriko eta publiko batean Andaluziako behartsuen artean banatu zuten. Carrefourrek salaketarik ez jartzea erabaki zuen bitartean, Mercadonak aurkeztu egin zuen eta honen ondorioz, SAT-eko 20 sindikalista akusatuen aulkian eseriko dira gaur.

LAB sindikatutik gehiegikeria hau eta SAT-eko kideen kontrako epaiketa hau salatzen ditugu. Supermerkatu handi hauetan askotan zakarrontzian bukatzen duen janaria hartu eta bizirauteko behar-beharrezkoa zutenen artean banatzea helburu zuen ekintza erabat baketsua izan zen.

Horregatik salatutako 20 pertsonen askatasuna eta SAT sindikatuaren nahiz ekintza sindikalaren kriminalizazioaren amaiera exijitzen ditugu. Euskal Herrian La Sangiovesako kasua dugu, non sindikalista bat 21 hilabetetara kondenatua izan den. Hor daukagu Huerta de Peraltako kasua ere, non milaka eurotako isunez gain, sindikalista baten aurka 2 urte eta erdiko kartzela zigor eskaria dagoen eta atzerritarren legedia aplikatuz, 5 urtez Espainiako estatutik kanporatua izateko eskariari aurre egin beharko dion.

Aipatutako guztiagatik zapaldu, esplotatu, eta egoera honi aurre egiten diogunak kriminalizatu eta zigortu egiten gaituen sistema honen kontrako borrokan gaudenen arteko elkartasuna beharrezkoa da. Horregatik espetxean dagoen Fran Molero SAT-eko kidearen eta Mercadona kasuan auziperatutako 20 sindikalisten askatasuna aldarrikatzen ditugu.

 

 

 

Hezkuntza oposizioak Nafarroan: planifikaziorik egon ezean, ez da taxuzko oposiziorik izango

admin
-
0
Haur eta Lehen Hezkuntzako irakasleriari eragin dion 2019ko oposizioek berriro ere agerian utzi dute modu honetako prozeduretan badagoela zer hobetua.

Korrika eta presaka sortutako epaimahaiak, azterketei buruzko argibide eskasak eta azken orduan argitaratutakoak, arrazoi garbirik gabeko suspentso mordoa, banatu gabe geratu diren plaza finkoak… LABen aburuz, premiazkoa da irakasleriaren egonkortasuna finkatzeko egun dugun prozedura bakarra, LEP prozesuena, askoz ere gardenagoa izatea.

Horrez gain, irakasleariaren merituak eta gaitasunak neurtu ahal izateko hautaketa prozesu eraginkorragoa abian jartzearen beharra nabarmendu nahi dugu. Gai honen inguruan egiten dugun salaketa ez da berria. Iazko azaroan argitaratu genuen oharrean agerian utzi genuen oposizio prozesuaren inguruan genituen zalantza guztiak eta, zoritxarrez, kezka horiek guztiak bete dira. Kontu hau bereziki larria iruditzen zaigu, berez gogorra eta nekagarria den prozesu bati jakineza eta azken orduko gorabeherak gehitzen baizaizkio.

Nafarroako Gobernuak erronka galanta du geletan gaitasun handien duten irakasle motibatuak izan nahi baldin baditu. Horretarako, lehenbailehen hartu beharreko oinarrizko neurria oposizioak taxuz eta garaiz planifikatzea da. Hezkuntza Departamentua osatzen duen talde berriari honoko urjentziazko eta gutxieneko neurriak hartzea eskatu nahi diogu:

– Lehenbailehen egiaztatzea udaberri honetan oposizioak izango diren ala ez, zein espezialitate aterako diren eta espezialitateko ze plaza izango diren.
– Oposizioak baldin badaude, mahai sektorial deialdia egitea, sindikatuekin informazio guztia partekatu eta oposizioak taxuz planifikatu ahal izateko.

Bide luzea dugu hautaketa sistema finkatzeko eta eraginkorragoa bihurtzeko.

Azkenik, gogorarazi nahi dugu LAB sindikatuan oposizioen osagarri gisa formazioa eta garapen profesionala uztartuko dituen plana mahaigaineratzen gabiltzala, Qualitate izena duena. Gure ustez, hezkuntzaren kalitatea hobetzen lagunduko duen sistema garden eta eraginkorra lortzeko bidean, funtsezko tresna izango da.
 

 

 
1...650651652...1,637Page 651 of 1,637

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus