Greba eguna egin dute gaur Bizkaiko Etxez Etxeko Laguntza Zerbitzuko langileek, eta bihar ere hala egingo dute, LAB, ELA, UGT eta USO sindikatuok deituta. Gaurko mobilizazioen harira, Bilboko udaletxea okupatu dute, lan baldintza duinen defentsan.
Blog Page 647
Hiru delegatu lortu ditugu Larrungo Tren Ttikian
Hauteskunde sindikalak izan dira EPSA enpresan; Larrungo Tren Ttikia kudeatzen duen enpresan, alegia. Bada, LABek hiru delegatu titular eskuratu ditu "Behargin eta enplegatuak" kolegioan, eta beste hiru ordezko. Bestalde, sindikatuak Ipar Euskal Herrian zabaltzen jarraitzen du, eta Ipar Euskal Herriko Kostaldeko Ospitalgunean bulego bat ireki berri dugu, ospitalean bertan lortutako ordezkaritzaren baitan. Bulegoa astelehenetan egongo da irekita, 9:15 eta 17:00ak bitartean.
Rana Plaza gogoan izango dugu apirilaren 24an
Apirilaren 24an, 6 urte beteko dira Bangladeshen Rana Plazako tragedia gertatu zenetik, hau da, ehungintza-industriako hondamenik larriena, 1.138 pertsona hil baitziren, eta 2.000 baino gehiago zauritu, fabrika bat behera erortzearen ondorioz.
Emakumeen Mundu Martxak eta nazioarteko Arropa Garbia Kanpainak dei egiten dute ehungintzako langileen egoera globala salatzera: 14 orduko lanaldiak, miseriazko soldatak, fabriketan gutxieneko segurtasun-baldintzak ez egotea eta abar, arropa-enpresa multinazionalek etekina ateratzen duten bitartean, munduko milioika emakumeren lanaren bidez.
Rana Plazako tragedia gogoratzeko, eta borroka feminista gero eta beharrezkoagoa delako, proposatzen dute apirilaren 24an antolatuta dauden salaketa-ekintzetan parte hartzera.
-Bilbo: 18:30ean, Kale Nagusia 23. Zara-ren aurrean.
-Gasteiz: 19:30ean, Corte Ingles aurrean.
Haur esklabotzarik ez, inolako esplotazio formarik ez!
Apirilaren 16a, Haur Esklabotzaren Aurkako Nazioarteko Eguna da; egun honen harira, LABek haurrek sufritzen duten esplotazio mota hau salatu nahi du. Haurren esklabotza zuzenean lotuta dago munduan inposatzen ari den eredu neoliberal basatiarekin eta politika neokolonialistekin. Esklabotza, produkzio sistema bezala ulertua, enpresa transnazionalen etekinen oinarrian dago, eta, beraz, erantzukizun zuzena dute. Zentzu horretan, LAB esplotazio forma guztien kontrako borrokan berresten da, eta bestelako eredu sozial baten aldeko pauso irmoak ematen jarraituko du sindikatuak.
Hauteskundeetan ere, EITBk feminismoa eta euskara bigarren planoan uzten ditu
EITBko LABen iritziz Euskal Telebistak hauteskunde kanpainaren jarraipen informatiboa promozionatzeko erabiltzen ari den irudia guztiz desegokia da, emakumeei eta euskarari ematen zaien bigarren mailako paperagatik.
Era berean, bat egiten du Mugimendu Feministak Hauteskunde Orokorrak direla eta, ETBko aurkezleekin egin den promozio argazkiaren inguruan zabaldutako kritikarekin. Ez da onargarria argazki muntaia horretan emakumeei eman zaien trataera eta argi utzi du EITB oso urrun dagoela oraindik genero ikuspuntutik oinarrizkoak behar genituzkeen irizpideak barneratuta izatetik.
Bestalde, nabarmena da promozio argazki horretan euskarari ere eman zaion bigarren mailako izaera. Ez dugu uste kasualitatea denik gaztelaniazko saioak gidatuko dituzten hiru aurkezleei eman zaien "zentralitatea" argazkiaren erdi-erdian kokatuz, eta euskarazko saioak gidatuko dituztenak, berriz, bi aldeetan banatuz. Esanguratsua da EITBk bere sorrera helburuetan zehaztuta duen euskararen sustapen funtzioa auzitan eta hizkuntza irizpideen eztabaida pil-pilean dagoen honetan, irudi hau izatea komunikabide publiko honek gizarteari ematen dion eredua.
Honen guztiaren inguruko hausnarketa eta zuzenketa eskatzen diogu zuzendaritzari.
“Platerean dagoena aldatzea baino gehiago proposatzen dugu; elikadura burujabetza arlo guztietan nahi dugu, eredu oso bat aldatu”
Mahai inguru bat antolatu dugu gaur, Bilboko Laboren, elikadura burujabetzari buruz. Besteak beste, eskola jangelen ereduari buruz hitz egin dugu, Iolanda Formoso sukaldari eta LABeko delegatuaren ahotik. Hain zuzen ere, ikastetxeetatik politika neoliberalak desagertu behar direla esan du, hots, merkantilizazioarekin amaitu behar dela. “Azpinkontratazioa desagertu egin behar da; langile guztiok titular bera eduki behar dugu”.
Iolanda Formosoren hitzetan, “arlo publikoan baliabide ekonomiko eta pertsonalak jarri behar ditugu. Platerean dagoena aldatzea baino gehiago proposatzen dugu; elikadura burujabetza arlo guztietan nahi dugu, eredu oso bat aldatu, gurea eraikiz”.
Alazne Intxauspe baserritarrak eta Etxaldeko kideak ere hartu du hitza: “Gu ere langile klasea gara. Herri mugimenduarekin aliantzan, eredua aldatu behar dugu sistema neoliberalaren aurrean”.
Bittor Pesok, bere aldetik, arrantza izan du hizpide. Sektore honetan, lan baldintzak eta etekinak bat ez datozela ohartarazi du. Egungo arrantza ez dela jasangarria adierazi du, eta flota erdira murriztu dela eta arrantzale gehienak migranteak direla jakinarazi du: “Beraien lan baldintzak duela 30 urtekoak dira”, salatu du.
Faxismoari eta kapitalari aurre egiteko ezker subiranismoa indartzeko garaia da
Aberri Egunari begirako adierazpena onartu zuen LABeko Nazio-Biltzarrak ostiralean, faxismoa eta kapitalismoaren oldarraldiak eta hauteskunde politikoen zikloak ezaugarritutatako testuinguruan. Bada, Garbiñe Aranburu idazkari nagusiak eta Igor Arroyo idazkari nagusi ondoak agerraldia egin dute, adierazpena aurkeztu eta aktualitate politiko eta ekonomikoaren inguruko sindikatuaren irakurketa egiteko. Kontrabotere sindikalismo abertzaleak autodeterminazio eskubidearen eta aldaketa politikorako prozesu baten aldeko erabateko apustua egin behar duela nabarmendu dugu.
LAB sindikatuaren adierazpena, 2019ko Aberri Eguna dela eta
Declaración de LAB con motivo del Aberri Eguna de 2019
“Politika neoliberalekin amaitu eta herritarrentzat bizitza duina bermatu nahi badugu, borroka nazionala ezin da erlatibizatu, egungo sistema kapitalista eta heteropatriarkala betikotzeko berme nagusiena 78ko erregimena bizirik mantentzea baita”.
Garbiñe Aranbururen hitzak dira hauek, Aberri Egunari begira egindako agerraldian esandakoak. Hain zuzen ere, LABeko idazkari nagusiak egungo testuinguruari buruz hitz egin du, eta nabarmendu du faxismoari, kapitalari eta politika neoliberalei lantokietan eta kalean egin behar zaiela aurre, “lan prekarietate eta soldata prekarietatearen aurka borrokatzen, borroka feminista indartzen, pentsio duinak defendatzen eta pertsona migranteen eskubideen alde borrokatzen”.
Garbiñe Aranbururen hitzetan, “Euskal Herria borrokan dago. Heri honetan dagoen mobilizazio soziala garrantzitsua da. Inboluzio prozesuaren eta bizitzaren prekarietatearen aurrean, borroka soziala badago kalean eta lan gatazkak handitzen ari dira lan zentroetan”.
LABeko idazkari nagusiaren iritziz, “faxismoari eta kapitalari ere hautestontzietan aurre egiten zaie, ezker subiranistaren bitartez. VOX alderdiaren agerpenak, lortuko dituen emaitzetatik harago, eragina izan du dagoeneko. Agenda politikoa markatu dute eta eskubia gero eta eskubiragoa joatea ekarri du. Espainiako ezkerraren eremuan, etor daitekeenaren beldurragatik, modu kontserbadorean ari dira jokatzen, eta horrek ez du ahalbidetzen termino sozialetan aurrear egitea, are gutxiago konponbide politiko bat ematea lurralde ereduaren arazoari”.
Inboluzio sozial, patriarkal eta nazionala dakarren prozesu bati ez zaio aurre egiten ahalik eta gutxien joaten atzera. “Halako inboluzio baten aurrean, demokratizazioaren bidean pausoak eman behar dira, autodeterminazio eskubidea aitortzeko eta eredu ekonomiko eta sozial berri bat eraikitzeko, justizia soziala eta feminismoa oinarri”, azaldu du LABeko ordezkariak.
Garbiñe Aranbururen arabera, “Indarrak biltzeko momentua da arlo poltiko, sindikal eta sozialean, ezker subiranismotik. Arlo politikoan, akordioak lortu dira Estatu eta Europa mailako hauteskundeei begira. Uste dugu aliantza horiek Euskal Herria, Katalunia, Galizia eta Estatuko gainontzeko nazioak baldintza hobeago batean uzten dituela Estatuarekiko konfrontazio demokratikorako”.
Kontrabotere sindikalismo abertzale indartsua
Momentuak kontrabotere sindikalismo bat eskatzen du, baita sindikalismo abertzale indartsu bat; bizitzako arlo guztietan prekarizazioa borrokatzen duen sindikalismo bat, bizi dugun inboluzioaren errealitateari aurre egiten dion sindikalismo bat. Sindikalismo honek eragile aktibo izan behar du, estrategia integral batekin, beti ere aldaketa sozial eta politikorako prozesuan aurrera egiteko helburuarekin. Hortaz, LABeko idazkari nagusiak nabarmendu bezala, estrategia integral honek ezaugarri hauek izan behar ditu:
-Konfrontaziorako gaitasun gehiago izan behar du lan zentroetan, eta greba da borrokarako tresna nagusiena, zalantzarik gabe. Greba hauek gero eta eraginkorragoak izan daitezen, patronalak koste gehiegirik gabe jasan ditzakeen diseinuak saihestu behar dira. Gatazkak gizarteratu behar dira. Gainontzeko langile klasearen elkartasuna bilatzeko dinamikak bultzatu behar dira. Zerbitzu publiko batean denean, erabiltzaileak inplikatu behar dira eta erakundeak interpelatu eta presionatu. Greba hauek patronalarekiko beste presio mota batzuekin osagarritu behar dira.
-Klase subjektuaren berregituratzearen alde egin behar da apustu, eta kolektibo desbnerdinen artean aliantzak eratu behar dira. Elite ekonomikoan ez dagoenak ikusi du nola kaskartu egin diren bere lan eta bizi baldintzak azken urteetan. Errealitate desberdinak daude, baina sistemak ahuldu egin nahi gaitu indibidualismoarekin eta langileak zatituz, batzuek besteen aurka egin dezaten. Gure indarra kolektiboan datza. Errealitate desberdinei eta lan harremanetan dagoen prekarietateari erantzun behar diegu. Era berean, mugimendu feministarekin, pentsionistekin, gazteekin edo pertsona migranteekin aliantzak josi behar ditugu.
-Kontrabotere sindikalismo abertzaleak autodeterminazio eskubidearen eta aldaketa politikorako prozesu baten aldeko erabateko apustua egin behar du. Politika neoliberalekin amaitu eta herritarrentzat bizitza duina bermatu nahi badugu, borroka nazionala ezin da erlatibizatu, egungo sistema kapitalista eta heteropatriarkala betikotzeko berme nagusiena 78ko erregimena bizirik mantentzea baita.
ANFASeko langileek elkarretaratzea egin dute gaur Iruñean
ANFASeko langileek elkarretaratzea egin dute gaur Iruñean. Arreta Goiztiarreko lehiaketako baldintza-agirietan desgaitasuna duen jendea artatzeko itunpeko zentroen Nafarroako hitzarmen kolektiboa ezartzeko helburua zuen mobilizazioak.
Gaur elkarretaratzea egin dugu Pertsonen Autonomiarako eta Garapenerako Nafarroako Agentziaren aurrean, duela aste batzuk Nafar Gobernuak Arreta Goiztiarraren lehiaketa publikorako pleguak publiko egin zituelako. Eta haienetan ikusi duguna, erabat irregularra iruditzen zaigu.
Guretzat oso harrigarria izan zen pleguetan desgaitasuna duen jendea hartatzeko itunpeko zentroen Nafarroako hitzarmen kolektiboa ez dela kontutan hartzen ikustea, langileekiko eta erabiltzaileentzako bidegabekoa izateaz gain, Nafarroako kontratazio publikorako legea gure ustez betetzen ez delako. Aldiz, pleguetan aipatzen den erreferentziazko lan hitzarmena estatu mailakoa da. Horretaz gain, egun zerbitzu honetan eskeintzen ari den denbora guztia pleguetan jasota dagoenik ezin dugu konfirmatu.
Nafar Gobernuarekin bide ezberdinetatik harremanetan jartzea saiatu gara eta asteak pasa dira baina orain arte ez dugu erantzunik jaso… lehiaren prozesuan denbora irabazi nahian akaso.
Gai honekiko Nafar Gobernuaren jarrera ez dela gardena izaten ari salatu nahi dugu. Arreta Goiztiarraren zerbitzuan ezartzen diren lan baldintzen arabera zerbitzuaren kalitatea bera jokoan dagoela uste dugunez, egoera argitu dadin exijitzeko unea iritsi da.
ANFASeko langileak, prest gaude dagokiguna defendatzeko. Hau da lehenengo mobilizazioa, baina argi dugu epe laburrean erantzunik jasotzen ez badugu, mobilizatzen jarraituko dugula
Inés Francés andrea, zergatik arreta goiztiarra Madrilen desgaitasuna da eta Nafarroan prekarietatea?
