2026-04-05
Blog Page 560

EHUk azpikontratatutako garbitzaileak eta Unibertsitateko aurredoktoreak aliantzak sortu eta Leioako campusean mobilizatu dira

admin
-
0
EHUk azpikontratatutako garbitzaileak eta Unibertsitateko aurredoktoreak aliantzak sortu eta Leioako campusean mobilizatu dira

"Lan berdina, soldata berdina" lelopean, bi kolektiboek ikusezinak izatea salatu dute, baita EHUko komunitatearen barruan jokatzen duten papera aldarrikatu ere. EHUren inplikazioa exijitu dute euren gatazkak konpon daitezen.

Garbiketako langileek bost urte daramatzate negoziatzen, baina urtarriletik hona enpresek mahaira joateari utzi diote, eta Euskal Administrazio Publikoak beste alde batera begiratzen du.
Martxoaren 2tik aurrera 5 asteko grebari hasiera emango diote LAB, ELA, ESK eta CCOO sindikatuok deituta. Eusko Jaurlaritzako garbiketako langileen soldatakiko ekiparazioa eskatzen dute. Soldata bien arteko aldea, gaur egun, %13tik gorakoa da.

Gainera, sektorearen %40k lanaldi partzialak ditu – eta, beraz, soldata partzialak –, eta enpresak ez daude bakanteak kubritzeko sistema berri baten alde, etorkizunean bada ere lanaldiak luzatzea ahalbidetuko lukeena.

Salatu dute, halaber, lan kargak, maiz, bikoiztu egiten dituztela Eusko Jaurlaritzako garbitzaileek ezarrita dituztenak.

Bestalde, doktoratu aurreko ikertzaileek, Euskal Herriko Aurre-Doktoreen asanbladak deituta, atzeratutako soldatak osorik ordaintzea eskatzen dute, 2019ko martxoan Doktoratu Aurreko Ikertzaileen Estatutu Berria (EPIPF) indarrean sartu zenetik, alegia. Joan den ikasturtetik salatzen dute Errektoretzak uko egiten ziola atzeratutako soldatak ordaintzeari eta Estatutu berria aplikatzeari.

Bi kolektiboek indarrak batzea erabaki dute eta EHUn mobilizazio bateratua aurrera eramatea. Arduradunen aurrean ikusezin sentitzen dira, eta arduragabekeriaz tratatu dituztela salatzen dute, nahiz eta haiek ere Unibertsitateko komunitatearen parte izan. Beste deialdi batzuetan bezala, ikasle eta irakasleen babesa izan dute.

Garbitzaileek, Leioan ez ezik, Gasteizen eta Donostian ere egin dituzte gaur protestak.
 

 

 

Aurrekontuen onarpenaren aurreko azken protesta

admin
-
0
Aurrekontuen onarpenaren aurreko azken protesta

Hezkuntzako Itunaren sinatzaile garen sindikatuok beste behin ere elkarretaratu egin gara itunak urte honetarako ezarritakoa aurrera eramateko beharrezko diren diru partidak sar ditzaten 2020ko aurrekontuetan. Sindikatuetako ordezkariek, adostutakoa kontuan hartu ezean, mobilizatzen jarraitzeko asmo irmoa agertu dute.

Ostegun honetan, ustez 2020ko Nafarroako aurrekontuen onarpena ekarriko duen osoko bilkura egin dute Nafarroako Parlamentuan. 2018an Departamentuarekin Hezkuntza Kalitatea Hobetzeko Ituna sinatu genuen sindikatuak (LAB, STEILAS, UGT, CCOO, ANPE eta Afapna) Ganberaren aurrean elkarretaratu gara, onartu aurreko azken aldia izan daitekeen honetan, esijitzeko aurrekontuetan sar ditzaten urte honetarako itunak aurreikusten duena burutzeko beharrezko diren partida ekonomikoak.

Sinatutako testuak ezartzen duenez, 2020. urte honetan bi neurri zehatz aplikatu behar dira: batetik, 57 urtekoen ordutegi murrizketa, eta bestetik, ordu gehiago ematea ikastetxeei zuzendaritza lanengatik galtzen diren orduak konpentsatzeko. Biek ala biek izan behar zuten isla aurtengo aurrekontuetan, baina ez dirudi hala izango denik.

Elkarretaratzea Parlamentuaren ateen aurrean egin da, parlamentari guztiei gogorarazteko oraindik orain eskuartean duten aurrekontu proiektuak ez duela 2018an adostutakoa betetzen, eta bide batez, irmotasun osoz adierazteko mobilizatzen jarraitzeko asmo osoa dugula baldin eta gaurko bilkuratik ateratzen diren aurrekontuetan islarik ez badu izaten Nafarroako gehiengo sindikalarekin sinatutako itunak.

 

 

 

Odolusteak ez duela etenik salatu dugu, Alberto Sololuze eta Joaquin Beltran desagertu zirenetik hiru aste igaro direnean

admin
-
0
Odolusteak ez duela etenik salatu dugu, Alberto Sololuze eta Joaquin Beltran desagertu zirenetik hiru aste igaro direnean

Hiru aste daramate Alberto Sololuzek eta Joaquin Beltranek desagertuta, eta lan istripuen odolusteak ez du etenik. Zaldibarreko istripua gertatu zenetik, etengabeak izan dira langileek eta herritarrek egindako mobilizazioak. Hala, euskal gehiengo sindikalak deituta, Ermua eta Eibar arteko biribilgunean elkarretaratzea egin dugu, prekarietateak hil egiten duela salatzeko. LABeko Lan Osasuneko arduradun Lurdes Erasok hartu du hitza, eta arduradunak seinalatzeko eta erantzukizunak eskatzeko garaia dela nabarmendu du. Era berean, LAB sindikatuak, ustez, Zaldibarreko zabortegian lanean ari diren langileen aldetik jasotako gutun baten berri eman du. Eskutitz horretan, euren osasuna arriskuan dagoela ohartarazi dute langileek, biziki kezkatuta.

Bi langile desagertuta Zaldibarren, lur azpian, eta 13 langile hilda aurten Hego Euskal Herrian; azkena, herenegun, Murgan. Honela gauzak, egoera jasanezina dela salatu dugu Ermua eta Eibar artean egindako elkarretaratzean.

LAB sindikatuak sinaturik gabeko gutun bat jaso duela jakinarazi dugu mobilizazioan, ustez Zaldibarreko zabortegian lanean ari diren langileen izenean. Gutunak dioenak berretsi egiten du zabortegira egindako bisitan ikusi genuena; prebentzio falta eta arrisku larria langileen osasunerako. Hona hemen gutuna, jaso bezala:


 

 

 

Hiru aste daramate Albertok eta Joaquinek desagertuta, eta lan istripuen odolusteak ez du etenik

admin
-
0
Hiru aste daramate Albertok eta Joaquinek desagertuta, eta lan istripuen odolusteak ez du etenik

Gaur, otsailaren 27an, hiru aste betetzen dira Zaldibarreko Verter Recycling-eko zabortegiko luizia gertatu zenetik. Ordutik, bi langile, Alberto eta Joaquin, desagertuta daude. Hori dela eta, LAB, ELA, ESK, STEILAS, EHNE eta HIRU sindikatuok mobilizazioa egingo dugu gaur, otsailaren 27an, Ermua eta Eibar arteko biribilgunean, arratsaldeko 18:30ean.

Istripua gertatu zenetik, etengabeak izan dira langile eta herritarrek egindako mobilizazioak, bertan gertatutakoa argitzea eta langileak eta osasuna erdigunean jartzeko eskatuz.

Sindikatuon arabera, bi desagertutakoen bilaketa ez da lehentasuna izaten ari Jaurlaritzarentzat eta Zaldibarren lanean ari diren langileen osasuna ere ez dago bermatuta sindikatuok astelehenean bertatik bertara ikusi genuen moduan. Beste behin, ikusi dugu Jaurlaritza eta Urkullu ahaztu egin direla langileez. Hau dela eta, mobilizazioekin jarraitzearen garrantzia azpimarratu dute, “Zaldibar argitu” lemapean egiten ari direnetan parte hartzeko deia eginez.

Lanean hildakoen odolusteak ez duela etenik. Bi hilabete ere ez dira pasatu urtea hasi zenetik eta honezkero 13 dira Hego Euskal Herrian lanean hildako langileak, eta 2 Zaldibarren desagertutakoak. Azken astean, 2 izan dira lanean hildako langileak. Lanetik bizirik eta osasunez bueltatzeko eskubidea aldarrikatzen dugu eta neurri eraginkorrak eskatzen dizkiegu administrazioei egoera honen aurrean.
 

 

 

Berriro ere kaleratzeak Laminaciones Arreguin

admin
-
0
Berriro ere kaleratzeak Laminaciones Arreguin

Celsa Atlantic-Laminaciones Arreguiko zuzendaritzak bere mehatxua bete du eta 8 langile kaleratu ditu. Negoziazioa bertan behera utzi ondoren, Enpresa-Batzordearen azken proposamena baztertu ondoren, zuzendaritzak berriro hartu du kaleratzeak, inposizioak, jazarpena eta zigorraren bidea, 2016an utzi zuena, eta 8 lankide kalean utzi ditu. Honen aurrean, Enpresa-Batzordeak kaleratzeok baztertzen ditu, kaleratuak berriro lanera exijitzen du eta mobilizazio eta ekimen berriak iragartzen ditu enplegua eta Gasteiz eta Urbinako lantegien etorkizunaren alde.

Hauxe da langileen oharra, gaurko lanuzteen harira osatutakoa:

Urtarrilaren amaieran enpresak negoziazioak amaitutzat emon ondoren eta ziurgabetasunezko aste batzuen ondoren, zeintzuetan langile gehienak mobilizazioak egin dituzten eta Enpresa-Batzordeak berak azken proposamen bat aurkeztu zuen neurri alternatiboak adosteko, Zuzendaritzak bere mehatxua bete du, 8 langile kaleratuz.

Negoziazioa bertan behera utzi zuen boluntario aurkeztu ziren bi lankideren lekualdatzea zergatik baztertu zuen justifikatu gabe, 58 urtetik gorakoentzako inolako proposamenik zergatik egin ez zuten argitu gabe, euren arabera zegoen gehiegizko eskulanari aurre egiteko kontratuak eteteko ze eragozpen legal zegoen aztertu gabe, baina 40 pertsonetan murriztu zena neurri traumatikorik hartu gabe. Danbatekoa eman zuten nahikoa doitua zegoen langile-taldearentzat “doikuntza” areagotuta, edozein ez egoteren aurrean gelditu edo produkzioa geldotzera ohituta zegoen.

Amore eman nahi izan ez zuten lantegientzako aldebakartasuna, inposizioa, kaleratzeak eta zigorrekin datoz berriro. 8 lankide kalean utziko dituzte, EEE bidez kaleratze kolektibo bat egin nahi ez dutelako, epaitegietatik beste jipoi bat ez jasotzeko konfidantzan. Ez delako lehen aldia. Izan ere, langile hauek birritan izan dira kaleratuak honezkero, 2012 eta 2015ean. Are gehiago, kaleratu guztiak dira LAB eta ELA sindikatuetako afiliatuak, 2012ko greba mugagabean parte hartu zuten eta egun egiten aritu garen lanuzte eta mobilizazioetan parte hartu dute. Hau gutxi balitz, 50 eta 55 urte artean dituzte eta batzuk epe luzeko baja medikuan daude, eta honek, zailago egiten du lan-merkatuan berriro sartzea. Horregatik, ezin dugu beste ondoriorik atera: enpresa berriro itzuli da jazarpena, diskriminazioa eta zigorraren bidera.

Gogoratu nahi dugu 2012an gatazka hasi zenean 356 langile ginela eta gaur egun 95 soilik geratzen garelako. Horregatik, gaur eta orain adierazi nahi dugu alarma egoeran gaudela. Lan-talde txikiegiarekin, politika erasokorra duen Zuzendaritzarekin, lantegi hauentzako edozein alternatiba produktibo ukatzen duen Taldearekin, Laminaciones Arregui ixteko arriskuan dago epe ertainean. Ez da soilik 8 langile kaleratu dituztela. Kontua da ez dutela etorkizuneko proiekturik lantegi hauentzat, ez bideragarritasun planik, ez inbertsiorik, ez produkzioaren dibertsifikaziorik…

Baina ez langileok ez Enpresa-Batzordea ez gaude amore emateko prest. Kaleratze hauen guztiz kontra gaude, eta bitarteko guztiekin, juridikoak barne, borrokan egiteko prest gure lankideak berronar ditzaten. Honela, Enpresa-Batzordeak lanuzte eta mobilizazio berriak planteatzen ditu datorren astetik aurrera. Gainera, martxoaren 3ko mobilizazioetan parte hartuko dugu, gure hiriko borroken data garrantzitsuan, gure aldarrikapenen berri emateko.

Gainera, datorren asteazkenean Eusko Jaurlaritzako Industria Sailarekin bilera egingo dugu, enpresak eraman nahi gaituen enplegu suntsiketa eta industria-eraispena eragozteko bere inplikazioa eskatzeko. Helburu berdinarekin beste instituzio eta alderdi politikoetara ere joko dugu.

Azkenik, gure konpromisoa adierazi nahi dugu. Enpresa-Batzordeak eta langileok gure prestasuna adierazi nahi dugu enpresarekin eta instituzioekin bide bateratua egiteko Laminaciones Arregui salbatzea helburu. Bide hau negoziazioaren bidez egin beharko genuke, eta enpleguan, borondatezko izaeran eta etorkizuneko bermeetan egon behar du oinarrituta. Finean, enplegua eta etorkizuna, horren egin dugu borrokan, jarraitzen dugu borrokan eta jarraituko dugu borrokan, eta dei egiten diegu gasteiztarrei gurekin mobilizatu daitezen.
 

 

 

Bizkaiko Etxez Etxeko Laguntza Zerbitzuko langileek kaleak hartu dituzte hitzarmenaren defentsan

admin
-
0
Bizkaiko Etxez Etxeko Laguntza Zerbitzuko langileek kaleak hartu dituzte hitzarmenaren defentsan

LAB, ELA eta UGT sindikatuok greba egunak deitu ditugu otsailaren 27rako eta martxoaren 4 eta 5erako, Bizkaiko Etxez Etxeko Laguntza zerbitzuan. Mobilizazio hauen helburuan hitzarmen berri bat lortzea da. Ia hiru urte igaro dira sektoreko langileak mobilizatzen hasi zirenetik. Denbora honetan 40 greba egun baino gehiago egin dituzte, baina patronalek eta udalek immobilismoan jarraitzen dute. Egoera horren aurrean, langileek mobilizazio gehiago antolatu beste aukerarik ez dutela izan azpimarratu dute. Hala, langileek Bilboko kaleak hartu dituzte gaur, greben lehen egunean, eta Bilboko Udala interpelatu dute osoko bilkura egin bitartean.

Langileek urteak daramatzate Etxez Etxeko Laguntza Zerbitzuaren kalitatean ematen ari den galera salatzen, bai asistentzia arloan baita lan baldintzen arloan ere. Kontuan hartu behar da, gainera, dependentzia egoeran dauden pertsonen kopurua etengabeko hazkundean dagoela jendartean eta gurea ezinbesteko zerbitzua dela.

Asistentzia arloari dagokionez, handitzen doan kolektibo baten babes maila gutxitzen ari da. Prestazio orduak jaisten dira, egin beharreko lanak handitzen diren heinean, zerbitzuaren kalitatean galera emanez. Lan arloari dagokionez, 8 urte baino gehiago daramatzate soldata izozketa eta lan eskubideen galerarekin. Enpleguaren behin-behineko tasa handia da, eta lanaldi partzialak ugariak. Malgutasuna gero eta handiagoa denez, lanaren eta norberaren bizitzen arteko kontziliazioa oso zaila bihurtu da. Labur esateko, lan-baldintzak prekarioak dira.

Arduradunak seinalatzeko unean, argi utzi dute ez dutela beste alde batera begiratuko. Bizkaiko udaletako gobernu taldeak, mozioen erabilera partidista eta gerora hauen ez betetzearekin, eta patronalak, negoziaziorako gogo ezarekin, dira gatazka honen arduradun zuzenak. Lehenengoek, zerbitzuaren titular moduan eta bigarrenek, zerbitzuaren prestatzaile moduan, ezin dute euren ardura albo batean uzten jarraitu.

Martxoaren 8a gertu dago, eta instituzioek berdintasuna aldarrikatzen duten urteroko edukirik gabeko intentzio deklarazioak egiten hasi dira. Etxez Etxeko Laguntza Zerbitzua bezalako sektoreekin berdintasun erreal batera jotzeko benetako neurriak hartzeko aukerak zabaltzen dira. Emakumeen lan baldintzetan eta ondorioz, bizi baldintzetan, hobekuntzak sustatuz.

Gatazka honen atzean, emakumeok zapaltzen dituen sistema oso bat dago. Sistemak emakumeok zaintza lanak ezeren truke egitera behartzen ditu, bere biziraupenerako. Horregatik, lan merkatuan eta kasu honetan etxez etxeko laguntzan, uzten diete lekua bigarren mailakoa da. Zaintza lanak inolako aitortzarik gabe eta oso modu prekarioan ematen dira.

Greba egunez gain, hainbat mobilizazio ere egingo dira. Gaur, Bilboko Udala interpelatu dute osoko bilkura egin bitartean, kanpoaldean kontzentratuz. Martxoaren 4 eta 5ean, Arriagaren aurrean egun osoko elkarretaratzea egingo dute, sektorearen egoeraz informatzeko eta programazio anitza aurrera eramateko. Honetaz gain, langile guztiak animatzen dituzte mugimendu feministak Martxoaren 8aren testuinguruan antolatutako mobilizazioekin bat egin dezaten.
 

 

 

Nafarroako Parlamentuaren aurrean mobilizatu gara, aurrekontu duin eta sozialen defentsan

admin
-
0
Nafarroako Parlamentuaren aurrean mobilizatu gara, aurrekontu duin eta sozialen defentsan

Euskal Herriko Eskubide Sozialen Kartak deituta, Nafarroako Parlamentuaren aurrean mobilizatu gara, aurrekontu duinen eta sozialen alde. 2020. urteko aurrekontuek ez dituzte bermatzen gizartearen gehiengoak aldarrikatzen dituen lan, pentsio eta bizitza duinak, eta horregatik eraman dugu gure salaketa Parlamentuaren atarira.

Eskubide Sozialen Kartak aurkeztu zuen Herri Ekimen Legegilean jasotzen denez, lege bidez osatu behar da gutxiengo pentsioa 1.080 euro arte, kalitateko enplegua lortu behar da, eta Errenta Bermatua eta etxebizitzarako eskubidea babestu behar dira. Lan-arloan, soldata-arrakala, diskriminazioa eta indarkeria matxista amaituko dituen lege bat onartu behar da. Gobernuak babestu behar du hezkuntzan eta osasunean egindako inbertsioak Europako parametroetan koka daitezen, eta babestu behar ditu Nafarroan 1.200 eurotako gutxieneko soldataren eta 35 orduko lanaldiaren aldarrikapena. Hauek dira LABek aipatu Ekonomia eta Gizarte Kontseiluaren esparruan egindako proposamenetako batzuk, Euskal Herriko Eskubide Sozialen Kartan mugimendu sozial, sindikal eta pentsionisten artean adostutakoak Greba Orokorrari begira.

Horietako bakar bat ere ez da aintzat hartu. Horrela, agerian geratu da Nafarroako Gobernuak borondate politikorik ez daukala gizartearen gehiengoaren alde gobernatzeko, Nafarroako langileriaren premiak gaindi daitezen, zeinak lan, pentsio eta bizitza duinak eskatzen dituen.

Egiaztatu da eta agerian geratu da aldarrikapen hauekhartu duten indarra, milaka pertsonak, urtarrilak 30 zituenean, kalera atera zirelako haiekin bat eginez, eta gainera oso sostengu handia izan zutelako. Hala, LABen iritziz, ezinbestekoa da borrokari eustea grebaren aldarrikapen horiek eta gainerakoek Dekretu eta Lege bidez gauza daitezen.
 

 

 

Bat egiten dugu Donostian erraustegiaren aurka larunbatean izango den manifestazioarekin

admin
-
0
Bat egiten dugu Donostian erraustegiaren aurka larunbatean izango den manifestazioarekin

LABeko langileok arrazoiak soberan ditugu deialdiari atxikimendua emateko: langileon osasunagatik, lan eta bizi duinaren alde, gure ekonomia eta klimarengatik, bat egiten dugu erraustegia gelditzeko otsailaren 29an egingo den manifestazioarekin. 17:00etan abiatuko da protesta, Easo plazatik.

Ia bi hamarkada igaro dira hondakinen kudeaketa ereduen inguruko eztabaidak Gipuzkoan bizia hartu zuenetik. Zabortegiek gainezka egin eta sistema honen arazo larria agerian geratu zenean botere ekonomiko eta politikoek ez zuten zalantza egin errausketaren hautua egiteko. Zaldibar eta Zubietan gertatzen ari denarekin, auziak gaurkotasun handiz bizirik jarraitzen du: hondakinen kudeaketak aterabide egokirik gabe jarraitzen baitu, 2 langile desagerturik jarraitzen dute, lan eta bizi baldintzak kutsatu eta prekarizatuz jarraitzen dute. Gure elkartasun osoa Joaquin Beltran eta Alberto Sololuzeren senide eta bertako bizilagun guztiei. Erantzukizuna eta neurriak orain!

Zaldibarreko zabortegiaren antzera, Zubietan eraikitzen ari diren erraustegia hasieratik irregulartasunez beteta egon da: hondakinen kudeaketa, instituzio publikoen eskumena, geure osasuna, lan eta bizi baldintzak, pribatizatu eta zaborra negozio aukera paregabe bilakatu baitute. Politika zuritzaileenek ekonomia zirkulartzat saldu nahi diguten erraustegia, trantsizio ekologiko baten testuinguruan energia sorrerarako aukerarik garestiena dela argi dugu, eta enplegu sorrerarako aldiz, eta beste bilketa sistemekin alderatuta, aukerarik ahulena. Hondakinen arazoari soluzio faltsua dela esaten jarraituko dugu, ekoizpen eta kontsumo sistema kapitalista auzitan jarri gabe berau elikatzen duen aukera delako, larrialdi ekologikoa areagotuz, Kapitala eta Bizitzaren arteko talka honetan, langileon lan eta bizi baldintzak mehatxatuz eta gure etorkizuna errez.

Gaur, hondakinen kudeaketa penagarria ezkutatu ezin den errealitatea da, eta larrialdi ekologikoa horren ondorio zuzena. Langileok ordea, badugu zeresana: lan eta bizi baldintza duinak exijitzen ditugu, geure osasuna eta ingurunearena erdigunean jartzeko; erabakietan parte hartzeko eskubidea aldarrikatzen dugu, zuhurtzia printzipioaz, kontsumoaren murrizketan, berrerabilpen eta berziklapenean oinarritzen den hondakinen kudeaketa publiko, garden eta iraunkorra den alternatiba justu baten alde egiteko.

 

 

 

Madrilera eraman ditugu agenda sozialaren eta erabakitzeko eskubidearen aldeko aldarrikapenak

admin
-
0
Madrilera eraman ditugu agenda sozialaren eta erabakitzeko eskubidearen aldeko aldarrikapenak


Euskal Herria, Galiza eta Kataluniako LAB, ELA, CIG eta CSC sindikatuetako idazkari nagusiak BNG, EH Bildu, CUP, ERC, JxC eta EAJ talde parlamentarioetako ordezkariekin bildu dira Madrilgo Diputatuen Kongresuan, sindikatuok Bilbon otsailaren 5ean aurkeztutako adierazpenaren izaerari segida emateko. Hain zuzen ere, hiru nazioetan eta Espainiako Estatuan bizi den egoera laboral, sozial eta politikoaren harira, Madrilen osatu den gobernu berriaren aurrean gure aldarrikapenen berri eman diegu, agenda soziala indartu eta erabakitzeko eskubidea aitortzearen ildotik. LABeko idazkari nagusi Garbiñe Aranbururen hitzetan, "garrantzitsua da jarrera komun bat ezartzea Gobernuaren aurrean, baina gure indar nagusia artikulatu ditzakegun borroketan datza. Mobilizazio sozialarekin jarraitu behar dugu, bakoitza gure herrialdean; eraldaketa soziala ekarriko duen eta demokrazian eta burujabetzan aurrera egitea ahalbidetuko duen prozesu baten alde".  


EPE honetako emaitzak ikertzeko Osakidetzak Oviedoko Unibertsitateari eskatu zion txostenak ez ditu zalantzan jartzen LABek egindako ikerketa estatistikoak, ezta salaturiko irregulartasunak ere. Ikerketa honi buruz LABek egin duen azterketaren harira, filtrazioez zuzenean ez hitz egin arren ikerketan, egilearen hitzetan hori ez zelako helburua, argi gelditzen da behin eta berriro salatuak izan diren hainbat kategoriatan normalak ez diren emaitzak bai agertzen direla.

Adibide moduan, esan dezakegu 36 azterketetan (30 kategoriari dagozkionak), puntuazioen banaketaren indizea ez dela zifra normaletara heltzen. Bestaldetik, 17 kategoriatan izangaien zentroen araberako banaketa ez da normala. Azkenik, 20 kategoriatan ez dago korrelazio egokirik lehenengo eta bigarren azterketen emaitzen artean.

Datu hauek guztiek gure salaketak indartu baino ez dituzte egiten. Horregatik, Osakidetzak ez duela ikerketa bururaino eraman nahi salatzen jarraitu behar dugu; gure aburuz, eskandalua ahalik eta lasterren eta ahalik eta ondorio txikienekin estali nahi dutelako.

Hau dela eta, Osakidetza eta Osasun Sailaren gardentasun eza salatu nahi dugu eta baita exijitu ere ikerketa bururaino eraman dezatela, argitu ahal izateko non egin ziren filtrazioak, nork egin zituen eta nor atera zen onuradun. Bestaldetik, martxan ipini behar den EPE sistema berria adosteko negoziazioa irekitzea funtsezkoa jotzen dugu.
 

 

 
1...559560561...1,606Page 560 of 1,606

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus