2025-12-21
Blog Page 40

Mende laurdena beteta, Ipar Euskal Herrian zabaltzen jarraitzen duela ospatuko du LABek

Zubiate(e)ko Aritz
-
0
Mende laurdena beteta, Ipar Euskal Herrian zabaltzen jarraitzen duela ospatuko du LABek

Urteotako lan militante nekaezinaren bidez, eremu askotako langileengana eraman du euskal sindikalismo eraldatzailea, baita lan eta bizi baldintzak hemen erabakitzearen aldeko aldarrikapena ere. Hori ospatzeko, egun osoko egitaraua antolatu du LABek urriaren 25erako, Lekornen, Ipar Euskal Herrian 25, enbor beretik zabaltzen lelopean.

50. urteurrena ospatu zuen iaz LABek, inoiz baino osasun hobearekin: 50.000 afiliaturen langa gaindituta. Sustraiei sendo eutsita, enborra sendotu zuen sindikatuak lehen hamarkadetan, eta, enbor horretatik adar berriak zabaltzen hasi ziren milurteko berriarekin batera. Horren adibide da, 2000. urtean Ipar Euskal Herrira zabaltzeko hartutako erabakia, LAB Euskal Herriko sindikatu nazional bakar bihurtzea ekarri zuena, eta sindikatuaren heldutasunaren eta nazio eraikuntzarako duen konpromisoaren erakusle dena. Hain justu, 25 urte dira aurten urrats horretatik, eta urteurrena egun osoko egitarau batekin ospatuko du LABek, Lekornen, urriaren 25ean.

Baionan eman du LABek horren berri, Ipar Euskal Herrian sindikatuak egindako lehen agerraldi publikoaren kokalekua izan zen zubitik metro gutxira. Maiatzaren Lehena zen, eta 50 bat laguneko mobilizazioa egin zuen sindikatuak. “Ez zen erraza izan, lehen ekintzatik hasi baitziren lehen oztopoak”, azaldu du Argitxu Dufau LABen Ipar Euskal Herriko bozeramaileak. Dena dela, langile abertzaleak antolatzeko asmoa lehenagotik zetorrela gogoratu du Dufauk, eta 1980ko eta 1990eko hamarkadetan zenbait talde eta kolektibo sortu zirela; hala nola, EHLE Euskal Herriko Langileen Elkartea eta Atxik: “Frantses sindikatuen zentralismoa eta hegemoniaren aitzinean, bertako sindikatu abertzale eta euskalduna sortzeko beharra sentitzen zelako. Egiteko beste modu bat beharrezkoa zelako. Langileak lantokietan antolatzeko beste tresna bat ezinbestekoa zelako”.

Helburu hori bera zuen LABek Ipar Euskal Herrira jauzia egiteko erabakiak. Aurrez zenbait gogoeta eta elkarrizketa izan ondotik, LABen 5. Biltzar Nagusian hartu zen erabakia, Donsotian, Ipar Euskal Herriko militanteek bultzatuta.

Ondotik, “xinaurri lanari esker”, sindikatua zabaldu egin dela nabarmendu du Dufauk: “Sail sindikalak sortu ditugu sektore guzietan, hauteskunde sindikaletan aurkeztu gira eta ordezkagarritasuna handitu dugu;ekintza sindikala bultzatu dugu”. Bidean, baina, era askotako “oztopoak” eta “erasoak” jasan ditu sindikatuak, gogora ekarri duenez. “Baztekerta sindikala lehen minututik bizi izan dugu, eta patronalarengatik eta sindikatuengatik epaitegira jo behar izan dugu, sindikatu izaera frogatzera. Gainera, Ipar Euskal Herriaren aitortza sozial ezagatik eta frantses estatuaren ultrazentralismoarengatik, bidea ez da erraza izan”.

Hala eta guztiz ere, LABen ordezkariak eta afiliatuak eremuz eremu lanean ari direla azpimarratu du Dufauk, “sindikalismoa egiten, langileen alde borrokatzen”. Eta, horrekin batera, sindikatuak Hemen Erabaki proposamena ere garatu duela oroitarazi du, negoziazio kolektiboko eremuak Ipar Euskal Herrian bertan kokatu nahi dituena. “Lan eta bizi baldintza duinak Euskal Herrian bertan erabaki nahi ditugu”, aldarrikatu du Dufauk.

Horregatik guztiagatik, LABen parte diren guztiak zoriondu ditu, eta bidelagun izan direnak eta egun direnak eskertu ditu. “25 urterekin ez da ezer bukatzen. Lantokietan antolatzen eta borrokatzen segitu behar dugu. Euskal Herriko langileok hemen erabakitzearen aldarrikapena aitzinera eraman behar dugu”, aldarrikatu du.

Egun osoko ospakizuna

Urriaren 25ean Lekornen egingo duten ospakizunaren gaineko azalpenak eman ditu, bestalde, Eñaut Aramendi Ipar Euskal Herriko idazkariak. Sindikatuak Ipar Euskal Herrian egin duen ibilbidea aztertuko dute goizean, belaunaldi desberdinetako militanteen testigantzekin osatutako solasaldi baten bidez. Bazkaria izango da ondoren, eta txaranga batekin eta kontzertuekin itxiko dute egitaraua. Edozein kasutan, egunari buruzko informazio zehatzagoa aurrerago emango du sindikatuak.

INTIA enpresa publikoko langileek elkarretaratzea egin dute Iruñean, enpresak subrogatu izan dituen langileek jasaten duten diskriminazio egoera salatzeko

Zubiate(e)ko Aritz
-
0
INTIA enpresa publikoko langileek elkarretaratzea egin dute Iruñean, enpresak subrogatu izan dituen langileek jasaten duten diskriminazio egoera salatzeko

INTIAko batzordeak publikoki salatu du enpresa honek subrogatutako langileek gainontzeko langileekin konparatuta jasaten duten soldata eta lan diskriminazio egoera. Iruñean elkarretaratzea egin dute gaur INTIAko langileek, Landa Garapenerako Departamentuaren ondoan.

Urteak dira pertsona horiek ari direla Landa Garapeneko eta Ingurumeneko Departamentuan laguntza teknikoko zerbitzua ematen, eta Tracasa Instrumentalek subrogatu zituen 2025eko urtarrilaren 1ean. Hala ere, subrogatu zirenetik, ez dituzte INTIAren soldata-egituran txertatu, eta gainontzeko langileek baino baldintza nabarmen baxuagoetan mantendu dituzte. Horrela, tratu desberdina eta lan-diskriminazioko egoera argia sortu da.

Anitzetan galdetu dugu kolektibo horren egoeraz, baina oraindik ez dugu erantzun argirik jaso. Enpresak ez du azalpen zehatzik eman, luzamendutan eta aitzakiatan ibiltzen da, egoera argitu gabe eta konpontzeko benetako borondaterik erakutsi gabe.

Egoera horren ondorioz, kategoria profesional eta/edo funtzio berdinetan sailkatutako lanpostuak bete arren, subrogatutako pertsonek ordainsari txikiagoak jasotzen dituzte. Ondorioz, soldata-arrakala sortzen da enpresa publiko beraren barruan, eta de facto lehen eta bigarren mailako langileak sortzen dira. Hori ez da soilik eztabaidagarria legearen ikuspuntutik, baita ikuspegi etiko eta sozialetik ere, erabat ezmorala baita. Bereziki larria da hori INTIA bezalako erakunde batean gertatzea, sektore publikoaren aterkipean eta NEKP-ren eta Nafarroako Gobernuaren beraren babesarekin —zuzenean edo omisioz—.

Enpresa Batzordeak irmotasunez salatzen du diskriminazio hori, eta exijitzen du:

– Subrogatutako pertsonak INTIAren soldata-egituran berehala integratzea, antzinatasuna erabat aitortuta, bereizketa arbitrariorik gabe eta langileen kontratu-jatorriagatiko diskriminaziorik gabe.

– Nafarroako Gobernuaren benetako konpromisoa, bere enpresa publikoen barnean desberdintasunik ez baimentzeko.

Egoera hau berehala zuzentzen ez bada, elkarretaratzeak egiten jarraituko dute ortzegunero 11:00etan, kaltetutako pertsonen eskubideak defendatzeko eta berdintasun printzipioa betetzen dela bermatzeko.

LAB sindikatuak positiboki baloratzen ditu Gasteiz eta Iruñeko parlamentuetan Palestinako genozidioa salatuz onarturiko ebazpenak

Zubiate(e)ko Aritz
-
0
LAB sindikatuak positiboki baloratzen ditu Gasteiz eta Iruñeko parlamentuetan Palestinako genozidioa salatuz onarturiko ebazpenak

Gaur, Gasteizko eta Iruñeko parlamentuetan, Palestinan gertatzen ari den genozidioaren, giza eskubideen urraketa larrien eta eskubide horiek urratzen dituztenen edo urraketa horien konplize direnen inpunitatearekin amaitzeko beharraren inguruko ebazpenak bozkatu dira.

Euskal Autonomia Erkidegoko parlamentuak onartutako mozioan, Europar Batasunaren eta Israelen arteko Elkartze Hitzarmena bertan behera uzteko eskaria jasotzen da argi eta garbi. Eskari hau duela hilabete batzuk LAB sindikatuak publikoki egin zuen eta, beraz, albistea oso positiboa iruditzen zaigu. Nafarroako Parlamentuak onartutako mozioen kasuan, horietako batean su-eten bat eskatzen da, eta genozidioa, okupazioa nahiz palestinar lurraldearen kolonizazioa gaitzesten dira, eta beste mozioan, besteak beste, “Nafarroako Gobernuari eta Estatuko Gobernuari eskatzen zaie beharrezkoak diren ekimenak bultza ditzatela bermatzeko, erantzukizunpeko adierazpenen, iturri zorrotz eta fidagarrien bidezko egiaztapenen eta/edo egoki iritzitako beste edozein tresnaren bidezko egiaztapenen errekerimenduaren bidez, bai obra eta zerbitzuen enkarguetan, bai erosketa publikoetan eta dirulaguntzen prozeduretan, kanpoan uzten direla, zuzenean edo zeharka, Nazioarteko Zuzenbidearekin bat etorriz, genozidioa, gerrako krimenak, gizateriaren aurkako krimenak edo apartheid ekintzak mantentzen, gauzatzen edo errazten laguntzen duten jarduera ekonomiko, komertzial, logistiko edo teknologikoetan parte hartzen duten pertsona juridiko guztiak.”

LAB sindikatutik Hego Euskal Herriko parlamentuek onartutako mozioak positiboki baloratzen ditugu. Aspalditik, LABek genozidio sionistaren aurrean erantzun zabal, irmo eta zeharkakoa artikulatzeko beharra dagoela esan du, eta uste dugu gaur onartutako mozioek bide egokian egiten dutela aurrera.

Hala ere, LAB sindikatutik, Palestinako okupazioa, apartheida eta genozidioa geldiarazteko neurri ausartagoak hartzea beharrezkoa dela uste dugu eta zentzu honetan, sionismoarekin harremanak hautsi behar direla esan nahi dugu.

Familia osoak deuseztatzen dituztenean, ospitaleak eta unibertsitateak sistematikoki suntsitzen dituztenean, haur eta neska-mutikoak hondakinen azpian lurperatzen dituztenean, milioika pertsona bonbardatzen dituztenean, gosez hiltzen dituztenean eta indarrez lekualdatzen dituztenean, ez da kontu semantikoa. Genozidio bat da. Lege-terminologiaren inguruko obsesioa ke-laino bat besterik ez da, sarraskia justifikatzeko eta ez geldiarazteko asmoa duen argudio itxuraz faktikoa.

Ez dira hitzak edo mozioak bakarrik. Gosea gerra-arma gisa erabiltzen denean, zibilen aurkako sarraskiak egiten direnean, milaka haur hiltzen eta elbarritzen direnean, funtsezko osasun arreta medikorik gabe uzten dituztenean, gertakariek eta adierazpenek genozidioaren tipifikazioa eskatu behar diote nazioarteko justizia-sistemari. Genozidio baten aurrean ez da negoziatzen, genozidioa geldiarazi egiten da, eta ondoren, irtenbide diplomatiko integral eta iraunkorra bilatzeko bideak zabaldu behar dira.

LAB sindikatuaren ustez, norabide horretan emandako urrats guztiek nazioarteko politika baten oinarriak ezarri ditzakete, hitzetatik ekintzetara igarotzeko, eta urte luzez erakunde eskudunen utzikeria jasan duen herri palestinarraren giza eskubideen aitortza bidezko eta beharrezkoan inplikatzeko.

Orain inoiz baino beharrezkoagoa da Israeleko gobernuaren zigorgabetasunari amaiera ematea, urrats ausartagoak emanez eta egitura sionistekin harreman guztiak hautsiz; sindikatuei dagokigunean, lehenengo urrats moduan, erregimen sionistaren sindikatua den Histadrut nazioarteko sindikalismoaren esparru guztietatik isolatuz.

LABek Abadiñoko KW Damping Technology enpresan gertatutako lan-istripu larria salatu du

Zubiate(e)ko Aritz
-
0
LABek Abadiñoko KW Damping Technology enpresan gertatutako lan-istripu larria salatu du

Ekainaren 2an KW Damping Technology enpresan izandako istripu larria, berau eragin zuen makinaren segurtasun-neurrien falta eta Fremap mutualitatearen eta Osakidetzaren arreta mediko desegokia salatu ditu sindikatuak.

Langile batek istripua izan zuen makina batek eskua harrapatu zionean. Eskua harrapatuta eduki zuen 45 minutuz, eta, askatu ziotenean, langilea Gurutzetako ospitalera eraman zuten. Han, ebakuntza kirurgikoa egin behar ziotela erabaki zuten. Ebakuntza Fremapek egin behar zion Bilboko Mutualitateen Ospitalean.

Langileak 50 minutu baino gehiago itxaron zuen Gurutzetako ospitalean anbulantzia batek Bilboko Intermutual Ospitalera eraman zezan, eta, azkenean, zain egon ondoren, taxi bat hartzea erabaki zuen, zainetako bidea jarrita eta hatz txikia larri kaltetuta zituela, ahalik eta azkarren ebakuntza egiteko.

Zoritxarrez, langile honi gertatutakoa ez da kasu isolatu bat. LABek lotsagarritzat eta onartezintzat jo du mutualitatearen eta Osakidetzaren jarrera, langilea zegoen egoeran osasun-laguntzarik gabe utzi zutelako.

LABek adierazi du beharrezkoa dela egoera horren eta mutualitateen anbizioagatik eta eskrupulurik ezagatik langileek pairatzen dituzten beste egoera batzuen aurrean erantzutea, gure osasunaren kontura aberastea besterik ez baitute buruan.

Bestalde, joan den astean Euskal Herrian 6 langile hil zirela gogorarazi du sindikatuak. “Absentismoaz hitz egiten digute, baina hil egiten gaituzte”, adierazi du, eta gaineratu du “patronala dela absentismoaren eragile nagusia”.

Gertatutakoaren aurrean, KW Damping Technologyko enpresa-batzordeak manifestazioa egin du gaur enpresatik Fremap enpresak Abadiñon duen bulegora, gertatutakoa salatzeko eta istripua izan zuen lankideari babesa adierazteko. Era berean, lehenbailehen sendatzea opa dio.

LABek dei egin die euskal langileei Gure Eskuren mobilizazio nazionalean parte hartzera

Zubiate(e)ko Aritz
-
0
LABek dei egin die euskal langileei Gure Eskuren mobilizazio nazionalean parte hartzera

Burujabetza maila handiagoa izango duen marko baterako aukerak sortu, eta hori langileen intereseko gaietan aurrerapenak egiteko baliatzeko konpromisoa du LABek. Horregatik, ekainaren 7ko deialdiarekin bat egin, eta bertaratzeko deia egiten du.

Gure Eskuk mobilizazio nazionalera deitu du larunbaterako Bilbon, Herri libre bat. Euskal Herriak erabaki lelopean. LAB bertan izango da Euskal Herriaren aitortza nazionala eta burujabetza aldarrikatzen, eta ordezkaritza zabala izango du mobilizazioan. Han izango da, besteak beste, Igor Arroyo koordinatzaile orokorra. Era berean, euskal langileei ere mobilizazioarekin bat egin dezaten dei egiten die LABek.

Izan ere, nazio aitortza eta erabakitzeko eskubidea behar ditugu, Euskal Herria bizi dadin, euskal herritarrok aske izan gaitezen. Eta nazio aitortza eta erabakitzeko eskubidea behar ditugu, euskal langileon lan eta bizi baldintzak duintzeko bitartekoak izan ditzagun; eredu sozioekonomiko berri baterako trantsizio feminista eta ekosozialista abian jar dezagun.

Hain justu, Euskal Herriaren nazio aitortzan eta erabaki ahalmenean urrats berriak emateko aukera dugu parez pare. Ipar Euskal Herrian, Euskal Hirigune Elkargoak baino eskumen handiagoak izango lituzkeen egitura administratibo baten aldeko jarrerak indartzen ari dira, eta, ikuspegi sindikaletik, hiru herrialde hauetan negoziazio kolektiborako esparru propioa eratzeko proposamen zehatza jarri dugu mahai gainean.

Hego Euskal Herrian, berriz, egungo marko juridiko-politikoak gainditzeko baldintza berriak sortzen ari dira, sortzen lagundu dugu. Hamar urte bete dira Nafarroan aldaketa instituzionala egin zenetik; abertzaletasunaren aurkako apartheida gaindituta, burujabetzan eta eraldaketa sozialean urrats berriak emateko tenorea da. Euskal Autonomia Erkidegoan, berriz, zabalik da estatus-juridiko politikoaren gaineko eztabaida, eta eztabaida hori behingoz bururaino eramateko unea dela uste du LABek.

Testuinguru horretan, sindikalismo independentistak burujabetza maila handiagoko marko baterako baldintzak sortzen lagundu behar du, eta aukerak baliatu behar ditu langileen interesekoak diren gaietan aurrerapenak lortzeko: izan pentsioak, izan gutxieneko soldata, lanaldia, gizarte segurantza propioa, kalitateko zerbitzu publikoak, etxebizitza, zaintza, euskaraz lan egin eta bizi ahal izatea… Langileen artean gure bizi baldintzen gainean erabaki ahalmena handitzeak dituen onuren gaineko pedagogia, pedagogia subiranista, egiteko ere.

Herri bat gara. Herri libre bat izan nahi dugu. Baliatu dezagun abagunea burujabetzaren bidean pausoak emateko. Bete ditzagun, larunbatean, Bilboko kaleak.

Non zeuden Eusko Jaurlaritza eta Nafarroako Gobernua 26 langile hiltzen ziren bitartean?

Zubiate(e)ko Aritz
-
0
Non zeuden Eusko Jaurlaritza eta Nafarroako Gobernua 26 langile hiltzen ziren bitartean?

LABek Eusko Jaurlaritzak Bilboko Kale Nagusian duen egoitzako sarrera blokeatu du EAE zein Nafarroako Gobernuek laneko heriotzen inguruan duten erantzukizuna salatzeko. Izan ere, pasa den astean 6 langile hil ziren Euskal Herrian 5 egunetan, eta 26 dira honezkero urte hasieratik hildakoak. 2024an, 64 langile hil ziren Euskal Herrian 102.000 istriputan.

Sindikatuko 26 militantek, buzo gorriak soinean, urte hasieratik Euskal Herrian hildako 26 langileak irudikatu dituzte, beste kide batzuk “Eusko Jaurlaritza eta Nafarroako Gobernua, non zeundeten langile hauek hiltzen ari ziren bitartean?” zioen pankarta zabaltzen zuten bitartean.

“Lan istripu hauek oinarrizko prebentzio neurriekin ekidin zitezkeen, baina patronalak inpunitate osoa du araudia ez betetzeko”, adierazi du LABek, “eta Jaurlaritza eta Nafarroako Gobernuari dagokie patronalari prebentzio araudia betetzera behartzea”.

Ildo honetan sakonduz, LABek dei egin die Imanol Pradales Jaurlaritzako eta Maria Txibite Nafarroako Gobernuko lehendakariei urgentziazko Gobernu Kontseiluak deitzera, Confebask eta CEN patronalei ardura exijitu eta urgentziazko neurriak har ditzaten. “Zenbat hildako langile gehiago behar dituzue honetarako?”, interpelatu ditu LABek.

“Laneko heriotzek badute erantzulea”, gaineratu du LABek. “Patronala, absentismoaren inguruko diskurtso lotsagabea zabaltzen ari den bitartean, langileak hiltzen ari da, ez duelako betetzen segurtasunari eta osasunari buruzko araudia, lan-kostuak merketzeko helbururarekin”.

Araba, Bizkai eta Gipuzkoako ikastoletako LABen ordezkariek akordio laborala bete dezan exijitu diote Hezkuntza Sailari

Zubiate(e)ko Aritz
-
0
Araba, Bizkai eta Gipuzkoako ikastoletako LABen ordezkariek akordio laborala bete dezan exijitu diote Hezkuntza Sailari

Mobilizazioa egin dute LABeko Araba, Bizkaiko eta Gipuzkoako ikastoletako LABen ordezkariek Gasteizen, Eusko Jaurlaritzaren Lakuako egoitzaren aurrean, salatzeko Hezkuntza Saila ez dela ari LABekin sinatutako akordio laborala betetzen.

Izan ere, 2023ko ekainaren 1ean, Hezkuntza Sailak eta LAB sindikatuak HEZKUNTZA LEGEA GARATZEKO LANGILEEN LAN-BALDINTZAK HOBETZEKO SINDIKATUEN ETA HEZKUNTZA SAILAREN ARTEKO AKORDIOA deitutakoa sinatu zuten. Akordio horrek sare guztietako langileei eragiten die. Ikastoletako langileoi, hain zuzen, bi eremutan:

1. Soldaten eremuan, 2027rako ikastoletako langile guztien soldatak sare publikoko langileen soldatekin parekatuko zirela hitzartu zuten. Horretarako, 2027 urtera arte, urtez urte, soldata altxaketa batzuk ezarri ziren.

2. Lan baldintzen eremuan, ikastoletako langileon lan baldintzak sare publikoko langileenekin homologatzeko azterketa bat abian jarriko zela adostu zuten. Era berean, azterketa hori bi urtetan egingo zela aurreikusi zuten.

Bestalde, akordio laboralean bertan jaso zen adostutakoak gauzatzeko modua: hezkuntza azpi-sektore bakoitzak bere negoziazio mahaian negoziatu beharko zuen akordioaren nondik-norakoak gauzatzeko modua. Hezkuntza Sailak, bere aldetik, gauzaketa hori egin ahal izateko finantzazioa bermatu behar zuen.

Ikastoletako azpisektoreak fin bete zuen mandatua: 2024ko urtarrilean, akordio laboralak jasotzen zituen eremuak egikaritzeko hitzarmena sinatu zuten Ikastolen-Elkartea-Partaidek, EIB Eusko Ikastolen Batzak eta LAB sindikatuak. Horrek guztiak isla izan du Araba, Bizkai eta Gipuzkoako ikastoletako lan hitzarmenaren negoziazioan.

Araba, Bizkai eta Gipuzkoako ikastolen negoziazio mahaian akordio laboralean sinatutakoaren sintonian ari da lanean LAB; Hezkuntza Sailak, aldiz, bere erantzukizuna saihestuz, ez du neurri horiek martxan jarri ahal izateko hitzeman zuen finantzazioa jarri mahai gainean.

Gaur egun, Hezkuntza Saila izkin egiten ari zaio adostasunak bete daitezen duen erantzukizunari. Horregatik esaten dugu ez dela akordio laboralean sinatu zuena betetzen ari.

– Soldaten parekatzearen eremuan, 2024ean, ikastoletako langile guztiek urte horri zegokion soldata altxaketa jaso zuten. 2025eko urtarriletik aurrera, baina, irakasle kategorietan dauden langileei soilik aplikatzen ari zaie urte horri dagokion altxaketa, Hezkuntza Sailak ez duelako gainerako langile kategorietako soldata altxaketak gauzatzeko behar den finantzazioa bermatu. Gainera, ez zaio zantzurik ikusten falta diren langileen altxaketak aplikatzeko asmorik duenik.

– Lan baldintzen homologazioaren atalean, berriz, dagoeneko gainditu da ezarri zen bi urteko epea, eta Hezkuntza Saila ez da hasi ere egin azterketa hori egin ahal izateko inongo plangintzarik egiten.

Ez betetzearen ondorioak

Horregatik, salatu nahi dugu Hezkuntza Sailarekin LABek sinatu zuen akordio laborala, ikastolei dagokienean, blokeatua dagoela, eta Hezkuntza Sailak akordioan dagokion partea ez betetzeak ondorio zuzenak dituela ikastoletako eguneroko lanean eta funtzionamenduan; ondorio kaltegarriak lehendik onak ez ziren lan baldintzetan.

Ikastoletan lan egiten duten langile guztiak daude ikastoletako lan hitzarmenaren pean: hezitzaileak, administrariak, sukaldariak, jangeletako langileak, garbitzaileak, mantenuko langileak, autobus zerbitzuetako langileak, irakasleak eta gainerakoak. Araban, 585 langile; Bizkaian, 2.329; eta Gipuzkoan 2.835. Orotara, 5.749 langilek lan egiten dute ikastoletan.

Ez da onargarria bi urte pasatzen uztea ezer egin gabe; ez da onargarria, sinatutakoari dagokion erantzukizunez ez heltzeagatik, langileen lan-baldintzak ez hobetzea, dagokien bezala; ez da onargarria, eta LABek ez du onartuko.

Hezkuntza Sailak dagokiona bete arte borrokan jarraituko du LABek, eta irmo exijitzen dio sailari sinatu zuen akordio laboralean agindu zuena eta jasota dagoena bete dezan.

Horrekin batera, LABek dei egin die Araba, Bizkai eta Gipuzkoako ikastoletako langile guztiei eurekin batera ahotsa altxa eta Hezkuntza Sailari eman zuen hitza bete dezan exijitzeko. LAB negoziatzeko prest dago, baina Hezkuntza Sailak negoziazioa gauzatu dadin hitzartu zituen bitartekoak jarri behar ditu, hartu zituen konpromisoak bete behar ditu.

Bide batez, langileei borrokatzeko deia luzatzearekin batera, Ikastolen Elkartea-Partaideri eta EIBri ere eskaria luzatu nahi die LABek. Jakin badaki, beren aldetik, parekatzearen eta homologazioaren gainean sailak LABekin sinatutako akordioaren antzeko testua adostua zutela haiek ere. Horregatik, ikastolak ere interpelatu nahi ditu LABek exijentzia bera izan dezaten haiek ere Hezkuntza Sailarekin; hau da, Hezkuntza Sailari adostutako konpromisoak bete ditzala eska diezaien.

LABek Nordex Energy enpresaren hitzarmena sinatu du, Barasoaingo lantegiaren etorkizuna bermatzen, erosteko ahalmenari eusten eta lanaldia murrizten duelako

Zubiate(e)ko Aritz
-
0
LABek Nordex Energy enpresaren hitzarmena sinatu du, Barasoaingo lantegiaren etorkizuna bermatzen, erosteko ahalmenari eusten eta lanaldia murrizten duelako

LAB sindikatuak, bertze hainbat sindikaturekin batera, ekainaren 3an sinatu zuen Nordex Energy Spain enpresaren bigarren hitzarmen kolektiboa, La Vall d’UixĂł (CastellĂł), Alcobendas (Madril) eta Barasoaingo (Nafarroa) lantegietan aplikatzekoa, azken horren lanpostu zuzen guztiak ziurtatzen dituelako, soldataren igoera KPIaren igoerarekin lotzen duelako eta lanaldia hainbat egunetan murriztuko duelako.

Nordex Energy Spain-en II. hitzarmen kolektiboaren negoziazioa luzea eta neketsua izan da –2023ko ekainean hasi zen–, baina LABek balorazio positiboa egiten du lortutako akordioari buruz, zeren eta, hamalautik ordezkari bakarra izan arren, LABeko jendeak hasieratik ezarri zituen helburu guztiak lortu baitira.

Hauek dira lortutako hobekuntzak:

  1. Etorkizuna Barasoaingo lantegiarendako. Negoziazioak hasi zirenetik, NES-Barasoaingo produkzio-egutegiak ia 2025 osorako 0 makinako ekoizpena markatzen zuen, eta hori kezkagarria zen zuzeneko eskulaneko langileendako, etorkizuna arriskuan ikusten baitzuten. Hori dela eta, hasieratik, hori izan zen LABen puntu nagusia, enpresari plantillarentzako etorkizuneko plan bat eskatuz, azkenean lortu dena, lana eta zuzeneko eskulaneko lanpostu guztiak bermatu baitira.
  1. Erosteko ahalmenari eustea. LABek aurreko hitzarmena ez sinatzeko izan zuen arrazoietako bat izan zen ez zuela ziurtatzen plantillaren erosteko ahalmenari eustea, KPIari inola ere lotzen ez zitzaizkion portzentajezko soldata berrikuspen batzuekin sinatu baitzen. Bigarren hitzarmen honetan eros-ahalmena ziurtatzeko funtsezkoa den lotura hori lortu da.
  1. Lanaldiaren murriztea. Lortu da 2025eko atsedenaldia (15 minutu eguneko) benetako lan-denboratzat hartzea, hau da, urteko lanaldia 7 egunez murriztea. 2026 eta 2027 urteetarako lanaldi murrizketa 9 egunekoa izanen da, atsedena 20 minutukoa izanen baita. Aurreko hitzarmenean 10 minutu aurreikusten ziren.
  1. Aldagaien ordainsariaren igotzea. Enpresan aldagaiei lotutako urteko ordainsari bat dago, edo irabazi-ordainsari bat, %5, %10, %15 edo %20koa izan daitekeena. %5 hori, batez ere, eskulangileek kobratzen dute, hau da, soldatarik baxuenak dituztenek. Bada, lortu da hitzarmena indarrean dagoen bitartean %5 hori %8 izatea 2026an, eta %10 2027an. Beraz, ordainsari aldakor baxuena %10ekoa izanen da.

Aipaturiko puntuez landara, oinarrizko hitzarmena Nafarroako Industria Siderometalurgikorako hitzarmena izatea lortu da, orain arte oinarri zen estatukoa hobetzen duena.

LABek eskerrak eta zorionak eman nahi dizkie hasieratik sindikatu honengan eta bere ordezkaritzan konfiantza izan duten Barasoaingo langileei, deitu diren mobilizazioak babestu baitituzte eta une orotan babesa eman baitute.

FCC Aqualia Loiuko langileak greban daude, lan baldintzen ekiparazioaren alde

Zubiate(e)ko Aritz
-
0
FCC Aqualia Loiuko langileak greban daude, lan baldintzen ekiparazioaren alde

Bizkaiko hainbat herriri zerbitzua ematen dien FCC Aqualia Loiuko langileak greban daude. Bizkaiko Ur Partzuergoaren azpikontrata da FCC Aqualia Loiu, eta partzuergoak eta enpresak mugimendurik egin ezean, hilabete osoko iraupena izango du grebak.

Partzuergoak Bizkaiko lurraldea hiru lotetan banatuta dauka, herrialde osoari zerbitzua bermatzeko. Gainontzeko loteetako langileek Bizkaiko Eraikuntzako Hitzarmena dute, eta FCC Aqualia Loiukoek, aldiz, Ur Zikloaren Hitzarmen estatala. Ondorioz, bertako langileen lan baldintzak askoz ere okerragoak dira. Soldata taulak konparatuz gero %50eko aldea dago, gutxi gorabehera. Berdina gertatzen da aintzinatasunarekin, aldi baterako ezintasunekin, lizentziekin, jardunaldiarekin, plusekin, eta abar.

Orain, pleguak berriztu behar dira eta, horregatik, lan baldintzen ekiparazioa aldarrikatzen dute langileek. Izan ere, ez dute ulertzen partzuergoak lote horretako langileekiko duen jarrera diskriminatzailea. Egoera bidegabe horren aurrean antolatzeko eta borrokatzeko deia egiten du LABek, Bizkaiko Ur Partzuergoko gainerako azpikontratekin egin bezala, lan baldintzen ekiparazioaren eta zerbitzuaren publifikazioaren norabidean.

1...394041...1,582Page 40 of 1,582

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus