Bilbon eta Iruñean aldi berean egindako agerraldi banatan, EAEko eta Nafarroako Kontseilu Ekonomiko eta Sozialaren premiazko bilera eskatzeko idazkia erregistratu dugu, euskal langileriak behar duen trantsizioa abian jartzeko eta aberastasuna banatzeko neurri sorta aurkeztearekin batera. EAEren kasuan, gainera, Kontseilu Ekonomiko eta Sozialean sindikatuari dagozkion ordezkariak izendatzeko prozesua abian jartzea eskatu dugu.
Bilboko agerraldian, LABeko koordinatzaile orokor Igor Arroyo eta Ekintza Sindikaleko arduradun Oihana Lopategi izan dira; Iruñean, berriz, Nafarroako eledun Imanol Karrera eta Industriako arduradun Kris Gete.
Igor Arroyok salatu duenez, “hamarkadetako politika neoliberalek krisi ekosozial larria eragin dute hala orokorrean nola Euskal Herrian bertan. Ukrainako gerra luzatzeko Mendebaldeko eliteek hartutako erabakiak egoera are gehiago larriagotzen ari da”.
LABen iritziz, bizitzaren garestitzea, enpleguaren prekarizazioa, zaintza krisia, klima aldaketa, migrazioak edota elkar gurutzatzen diren diskriminazio desberdinak Kapitalismoak eragindako krisi ekosozialaren aurpegi desberdinak dira.
Arroyoren esanetan, “hazkunde ekonomiko mugagabearen mitoa amaituta, bidegurutze batean gaude. Bi dira aukerak: herriak eta herritarrak desjabetzen jarraitu ala, pertsonen nahiz planetaren bizitza erdigunean jarrita, enplegua, zaintza lanak eta aberastasuna banatzea”.
“Errenta ituna aldarrikatzen duenean, Urkulluk lehen aukeraren alde egiten du. Josu Jon Imaz eta Urkullu ekipo berekoak dira. Soldatak KPIaren azpitik igo daitezen nahi dute, enpresen irabaziak hazten direnean. Langileon errentetan oinarritutako zerga politikari eutsi nahi diote. Zaintzaren eremuan egin bezala, osasun sistema pribatizatu nahi dute”.
Aldiz, LABen iritziz Euskal Herrian bada aberastasunaren banaketan oinarritutako politikak eskatzen dituen eremu sindikal, sozial eta politiko zabala. Langileak mobilizatzen ari da, borroka ziklo berria abian da. Lantoki eta sektoreka langileon aldeko urratsak ematearekin batera, eredu aldaketaren alde gauden eragile sindikal, sozial eta politikook agenda sozial partekatua behar dugu, politika publikoak aldatzeko ahalik eta indar gehien egiteko”, adierazi du Arroyok.
Hain zuzen ere, aberastasuna banatzeko eta eredu sozioekonomiko berri baterako trantsizioa abiatzeko neurri sorta aurkeztu du LABek, lau ataletan banatuta.
Lehenik eta behin, enplegu, zaintza lanak eta aberastasunaren bidezko banaketa, hala enplegu politikaren bidez (besteak beste, 1.400 euroko gutxieneko soldata ezarri, erosmen ahalmena bermatu, arrakala ororekin amaitu eta 30 orduko lanaldia ezarriz) nola zerga politikaren bidez (Kapital errenten eta Elkarteen gaineko zergak indartuz).
Bigarrenik, herritar orori zerbitzu publikoak eta oinarrizko eskubideak bermatzeko neurriak, hala nola, osasuna, zaintza, garraioa, etxebizitza, pentsioa edota energia. Eremu hauetan esku hartze publiko sendoa eskatu dugu, oligopolioen mesederako pribatizazio politika ororekin amaituz.
Hirugarrenik, Patronalari negozioa egiten ahalbidetuko dion “kapitalismo berdea”ren iruzurraren ordez, langileon parte hartzeaz bideratutako trantsizio ekosozialista abian jartzea eskatu dugu. “Gehien kontsumitzen dutenek gehiago murriztu beharko dute euren kontsumoa”.
Azkenik, euskal instituzioek dituzten eskumenak erabiltzearekin batera, estatu tresnak eskuratzeko premia nabarmendu dugu, hala nola, Euskal Gizarte Segurantza edota Euskal Lan Kodea.
