Hezkuntza Sailak aspaldiko partez irakasleen mahai sektoriala deitu du. Bertan ustez irakasleen lan hitzarmen berria “negoziatzen” dugu. Ustez bakarrik, mahai hori ireki zenetik ez baita ezertan aurrerapausorik eman, administrazioak mahai orokorretik datozen murrizketak bakarrik jarri ditu mahai gainean.
Azkeneko mahai sektoriala udaberrian izan zen, eta azken mahai horretan beste sindikatuekin batera administrazioari exijitu genion lan hitzarmena “negoziatzen” jarraitzeko ezinbestekotzat jotzen ditugun puntu batzuekiko (erretiroa, ordezkapenak, soldata,…) Hezkuntza Sailak duen jarrera idatziz argi eta garbi adierazteko. Oraindik zain gaude.
Mahai sektoriala beraz, tarteka izan dugu eta eskema berdinak errepikatu dira behin eta berriro, aurrerapausorik eman gabe, Hezkuntza Sailak ez du ezer garbirik esan eta irakasle guztiok adarjotze bat bestearen ostean jasaten ari gara, denbora galduz…
Mahai Sektorialean negoziatu eta landu beharreko gaiak Lan Hitzarmena eta langileen lan baldintzak dira. Oraingoan Planifikazio Batzordean landu beharreko gaiak (Oposaketak eta ordu sindikalak) Sektorialean planteatu ditu Eusko jaurlaritzak, hau da, ez dagokion tokian.
Gainera oposaketen afera aurreko asteetan salatu dugun bezala lotsagarria da. Planifikazio Batzordea izan genuen, bertan honi buruz galdetu eta ez zegoela ezer ziurrik esan eta bi egunetara komunikabideen bidez jakin ginen antza oposaketak egongo direla… Propaganda elektoralen izenean sindikatuak gutxietsi eta langile guztiak dantzan jarri besterik ez dute egin.
Deialdiotako zehaztapenik ez dago (ez plaza kopururik, ez datarik, ez oposizio-lehiaketa bidez izango den, …), dakigun gauza bakarra zera da: deialdiak egiteko Estatuko Aurrekontuek baimendutako erreposizio tasa erabiliko dutela, alegia, jubilatuko direnen plazen erdia LEPra atera eta lanpostuen beste erdia bete gabe utzi. Hau horrela izanik, garbi adierazi nahi dugu LPEak deituta ere Jaurlaritza ez dela lanposturik sortzen ari, aitzitik, lanpostuak suntsitzen ari da eta zerbitzu publikoak argaltzen/eraisten ari da.
Horrela gauzak, mahai sektorial honetara egoera guzti hau salatzera joatea erabaki dugu, baina ez dugu parte hartuko administrazioren adar jotze honetan. Joango gara, gure jarrera eta haserrea hasieran argi eta garbi adieraziko dugu, baina ez dugu aktiboki parte hartuko bileran, informazioa jasoko dugu baina ez gara antzerki honen titere izango.
