Ekitaldia propagandistikoa burutu zuten atzo krisia bukatzen ari dela beraien diskurtsoetan esaten ari diren Madrilgo PPren Gobernuak eta Lakuako EAJren Gobernuak. Horrelako azpiegiturak, zeinek gutxi batzuen negozio interesei bakarrik erantzuten dien diru publikoz ordaintzeak ekarri digu bizi dugun egoera ekonomiko eta sozial larri honetara, eta orain ere, bide horretan tematurik jarraitzen dute langileria miseriara kondenatuz.
Blog Page 1149
LABek Osakidetzako erabiltzaileak ospitale pribatuetara bideratzea salatuko du Bilbo, Tolosa eta Gasteizen
Urtarrilarekin batera, Osakidetzan pribatizazioaren kontrako kanpainari hasiera eman diogu. “Pribatizazioak Osakidetza gaixotu egiten du” lemapean, martxora bitartean burutuko da kanpaina, pribatizazioaren hiru aurpegi salatuz: osasun pribatuarekiko kontzertuak; azpikontraten erabilera; eta “peonadak” edo “autokontzertazioa” deitutako aparteko orduak.
Urtarrilean osasun pribatuarekiko kontzertazioak jorratuko ditugu, ideia sinple batekin: Osakidetzako erabiltzaileok Osakidetzan atenditzea nahi dugu. Horretarako, osasun zentro pribatuei ordaindu beharrean hainbat zerbitzu eskain ditzaten, diru publiko hori guztia osakidetzan bertan inbertitzeko eskatzen dugu, Osakidetzan bertan kalitatezko arreta jaso dezagun. Ez al da logikoagoa erresonantzia, eskaner edota ekografia zerbitzu berrietan dirua inbertitu ospitale pribatuei diru hori ematea baino?. Adibidez, 2013an Osakidetzak 250 milioi euro gastatu zituen osasun pribatuan; kontuan hartzen badugu Mungiako anbulatorio berriak 2,8 milioi euro balio izan duela, pribatuan gastatzen den diruarekin halako 10 anbulatorio berri egin ahal izango lirateke urtean.
Egoera hau salatzeko, ostegunean, urtarrilak 29, kontzentrazioak burutuko ditugu Bilbo, Gasteiz eta Tolosan. Bertan “Nik Osakidetzan atenditzea nahi dut. Ni un euro para la sanidad privada” lemapean, bertara deribatuak diren erabiltzaileak erreklamazioak egitera animatuko ditugu. Hauexek dira zitak:
• Bilbo: Gurutze Gorria ospitalean (urkijo, 65), 11.30etan
• Gasteiz: Quirón klinika (Artium aurrean), 10.30etan
• Tolosa: Tolosako anbulategian, 12etan.
Herritarron zein herrion burujabetzaren alde, Euskal Herriak TTIPari EZ!
Europar Batasunaren eta Ameriketako Estatu Batuen arteko Merkataritza eta Inbertso Hitzarmenak (Transatlantic Trade and Investment Partnership – TTIP, ingeleseko laburtzapenean), Kanadarekiko Akordioak (Comprehensive Economic and Trade Agreement – CETA) eta TISA-k (Trade in Services Agreement) eragin negatibo handia izango dutela ikusirik Euskal Herriko eragile politiko, sindikal eta sozial ezberdinek akordio hauen kontra batera lan egiteko erabakia hartu dugu. “Euskal Herriak TTIPari EZ” izenarekin akordio hauen kontra batzen gaituen manifestua aurkeztu dugu gaur Bilbon.
Eusko Irratiko zuzendaritzak aurkeztutako EEEari irmotasun osoz ezetz esan dio LABek Administrazio Kontseiluan
Atzoko Administrazio Kontseiluan Andoni Ortuzarrek bere garaian egindako kontratazio irregularren ondorioz irratian lanean egon diren, baina egin berri den LPDa (Lan Publiko Deialdia) gainditzea lortu ez duten pertsonentzat zuzendaritzak aurkeztutako EEEaren gaia jorratu zen.
LABek, EEEaren aurrean ezezko jarrera adierazi du. Egoera hau, Andoni Ortuzar buru zela zuzendaritzak konszienteki egindako kontratazio irregularren ondorio da, eta ez dugu onartuko orain zuzendaritzak inposizioan oinarritutako jarreraz heltzea aferari. Zentzu horretan gaurko Administrazio Kontseiluan, LABek egoera honi soluzio adostua bilatzeko exijitu dio zuzendaritzari.
Bestetik, LABek Administrazio Kontseiluan azken LDPa egiteko hartutako akordioaren balioa azpimarratu nahi du. Bere garaian esan genuen bezala akordio honi esker plantilla estrukturalaren baitan 56 lanpostu finko (49 zuzenean, eta jubilatu daitezkeen gutxienez beste 7) bilakatzea lortu zelako, LDPa eginez ente publikoan lan egin nahi zuten pertsona guztiei eman zaielako horretarako aukera, eta komunikabide publiko honetan berebizikoa den euskeraren normalizazioan urrats kualitatiboa eragin duelako, EITB taldeko plantilla estrukturalari eutsiz, alegia, lanpostu kopuruari eutsiz.
Eusko Irratiko LABek garbi du, aurreko zuzendaritzek Andoni Ortuzarren garaitik hasita kontratazio irregularra izan dela EITB taldeko irratietan, eta bideragarria ez den egoera horrek behin betiko arautzea eta normaltzea behar zuela, Lan Deialdi Publikoa izanik bide bakarra.
Azkenik eta aurreko guztia bezainbesteko garrantziaz, LABek, Lan Deialdi Publiko honetan lanpostu finkoa eta lan poltsan kokatzea lortu duten langileen egoera ahalik eta azkarren normaltzea exijitzen dio Zuzendaritzari.
Hassanna Aalia gazte sahararra babesteko manifestazioa larunbatean Bilbon
Euskal Herriko hogei eragile politiko, sindikal eta sozialek Hassanna Aalia gazte sahararraren aldeko manifestazioa deitu dugu datorren urtarrilaren 31n, larunbata, Bilbon. Mobilizazioa 17:00etan abiatuko da Arriaga plazatik abiatuta. Bilbon eginiko agerraldian gure elkartasuna adierazi genion espainiak asilo politikoa ukatu eta estatutik ateratzeko 15 eguneko epea jarri dion gazte sahararrari.
Hassanna Aalia bizi osorako espetxe zigorrera kondenatu zuen Marokoko epaitegi militar batek Gdem Izik-eko duintasunaren kanpamenduan parte hartzeagatik. Une horretan Euskal Herrian aurkitzen zen gaztea eta bertan geratzeko hautua egin zuen Espainiari asilo politikoa eskatuz. Orain dela astebete, ordea, asilo politikoa ukatu dio espainiak. Gaur bildutako eragileek argi adierazi dute Aalia borroka sahararraren aldeko ekintzailea dela eta gazteak 17 urte zituenetik atxiloketak, tratu txarrak eta torturak pairatu izan dituela polizia marokoarraren eskutik. Beraz, errefuxiatu izaera eskuratzeko ezinbesteko eskakizunak betetzen dituela.
Eskubide zibil eta politikoen urraketa honi aurre egiteko, herritarrak larunbateko manifestazioan parte hartzera deitu nahi dizuegi, guztion artean indarra egin eta Hassanna Aaliari asilo politikoa eman diezaioten.
Eragile politiko, sindikal eta sozialen oharra
«Lehenik eta behin, bertaratu garen eragile sozial, politiko eta sindikalek, gure babesa eta elkartasuna adierazi nahi diogu Hassanna Aaliari, gure adiskide eta sahararren aldeko borrokako aktibista.
Hassanna Mendebaldeko Saharan, Aaiun-en, jaio zen 1988. urtean. 17 urte zituela, bere militantzia politikoari ekin zion, giza eskubideen defentsan eta herri sahararraren autodeterminazio eskubidearen alde. Harez geroztik, eta herrialdetik azken aldiz atera arte, tratu txarrak, tortura eta atxiloketak pairatu ditu polizia-etxe marokoarretan.
2011ko martxoan, hilabete lehenago Dakarren (Senegal) izandako Munduko Foro Sozialean parte hartu ondoren, autonomia erkidego honetara etorri zen giza eskubide eta nazioarteko zuzenbide ikasketetan sakontzeko, okupatutako eremuko gazte sahararrei zuzendutako beka bati esker. Urte bereko maiatzean, hiru hilabetez ikasten egon ostean, Hassanna okupatutako Mendebaldeko Saharara itzuli zen, giza eskubideen aldeko konpromiso politiko eta borroka baketsuari eutsiz.
2011ko urrian, bigarrenez etorri zen autonomia erkidego hontara, bere formazioaren bigarren zatiarekin jarraitzeko. Handik hilabetera, telefono dei baten bitartez jakin zuen, Rabaten dagoen Epaitegi Militar Marokoarrak, beste 24 lagunekin batera sumario militar batean sartu zuela, Gdeim Izik-en Duintasun kanpamendu batean parte hartzeagatik.
Horregatik guztiagatik, 2012ko urtarrilean, Hassannak asilo politikoa eskatu zion Espainiako estatuari. Bien bitartean, giza eskubideen inguruko formazioarekin eta hainbat hitzaldi eta topaketetan parte hartzen jarraitu zuen herrialde osoan zehar.
2013ko otsailean, hemen zegoela, internet bidezko irrati baten bidez, guztiz erabaki bidegabe baten berri izan zuen: biziarteko kartzela zigorra ezarri zioten, Gdeim Izik-eko kanpamenduko gertakizunengatik. Epaia Rabateko Auzitegi Militarrak ezarri du, 25 zibil kondenatuz.
Nazioarteko hainbat erakundek publikoki eta aho batez salatu dute Auzitegi Militar honek abian jarritako prozedura ez dela bidezkoa, ez baitu gutxieneko bermerik betetzen: Dirudienez, akusatuen deklarazioak torturapean egin dituzte; gainera, ezin izan dituzte aurkeztu euren errugabetasuna baieztatzeko eskatutako frogak; eta azkenik, polizia akta faltsuak aurkitu dira.
Auzitegi honek Hassannaren aurkako akusazio faltsu batean oinarritu da. Ez du kontraesan eta defentsa printzipioa ere errespetatu, bera ez baitzen bertan izan hura gauzatzeko. Gainera, Auzitegi Militar honek emandako epaiari ezin izan zitzaion errekurtso arrunt bat ezarri.
Hauek dira epaiketan behatzaile lanak egindako erakundeetako batzuk: Giza Eskubideen Behatzaileen Nazioarteko Erakundea, Amnistia Internazionala, Human Rights Watch, hainbat eurodiputatu, Mendebaldeko Saharako Fundazioa, Europako Parlamentuko Atzerri Batzordea, Giza Eskubideen aldeko elkarte marokoarra, eta alderdi politiko ezberdinak.
Javier Canivell, Hassannaren abokatuak publikoki adierazi duenez, urtarrilaren 19an Barne Ministeriotik jakinarazi zitzaion, eskatutako nazioarteko babesa ukatua izan dela eta Hassanna estatutik 15 egunetan ateratzera behartzen duen agindua igorri zaiola.
Hassannari helarazi zaion ebazpenak onartu egiten du borroka sahararraren aldeko ekintzailea dela, Giza Eskubideen urraketa larrien Biktimen Elkarte Sahararreko kidea dela, eta bai Hassannak zein aipaturiko elkarteak, euren jarduna era baketsuan garatzen dutela. Era berean, onartu egiten da Hassannak 17 urte zituenetik atxiloketak, tratu txarrak eta torturak pairatu dituela polizia marokoarraren eskutik. Beraz, Hassannak errefuxiatu estatutua eskuratzeko ezarritako eskakizunak betetzen ditu. Aitzitik, Hassannari jakinarazitako erresoluzioak, oinarritzat hartzen du eta ez du zalantzan jartzen Rabateko Auzitegi Militarraren epaia, eta Estatu espainolean asilo eskubidea arautzen duen 12/2009 legean zehaztutako asilo eskubidea ukatu egiten dio.
Hassanna atxilotua izateko arrisku larrian dago; biziarteko kartzela zigorra betetzeko espetxeratua izan daiteke, berez tratu krudel eta iraingarritzat jo daitekeena.
UNHCR, Iheslarientzako Nazio Batuen Goi Mandatariak ere, Hassannaren babes eskaeraren alde agertu da, baina Estatu espainolak ez du aintzat hartu.
Honengatik guztiagatik, bertaratu garenok honakoa adierazi nahi dugu:
Espainiako Gobernuko Barne Ministerioari Hassanna Aalia-ri asilo politikoa ematea eskatzen diogu, egindako nazioarteko babes eskakizuna onartuz. Izan ere, bere herrira itzuliz gero, gogortasunez zigortua izango da agintari okupatzaile marokoarren eskutik eta bizitza osoan ez da berriz ere espetxetik aterako. Hassanna ekintzaile politiko bat delako, nazioartean aitortua, eta herri sahararren autodeterminazio eskubidearen alde era baketsuan borrokatzen duelako.
Horregatik guztiagatik, “Hassanna LIBRE, asilo politikoa orain!” lelopean, manifestazio nazionala deitzen dugu Bilbon larunbat honetan, urtarrilaren 31n, arratsaldeko 17:00etan. Manifestazioa Arriaga plazatik abiatuko da eta Gobernuaren Ordezkariordetzan amaituko da.
Eskubide zibil eta politikoen urraketa honi aurre egiteko, herritarrak larunbateko manifestazioan parte hartzera deitzen ditugu, guztion artean indarra egin dezagun, Hassannari asilo politikoa eman diezaioten.
Herri Eragileak: EGK, Sahararen diaspora, Ahaztuak 1936-1977, Tolosaldea Sahararekin, Ikasle Abertzaleak, Etawasol, EHE, Komite Internazionalistak, Leioako Sahararen aldeko elkartea FATH, ATFAL Getxo, Elkartzen, Bizikidetza eta elkartasuna elkartea, Bilgune Feminista, Hernaniko saharar herriaren lagunak, Ernai, Amigos y amigas del sahara (Ermua), GITE-IPES, Askapena, Eleak, Asociación Euskadi Sahara, Amigas y amigos de la RASD, Gazte Abertzaleak, Berriotxoak, Martcha Patriotica, Constituyente de axiliad@s colombianos por la paz, Gazte Komunistak
Sindikatuak: LAB, ELA, STEILAS, EHNE Bizkaia, ESK
Alderdi politikoak: Ezker Anitza, EH Bildu, PCE-EPK, EAJ-PNV»
LABek ekintza bat burutu zuen Baionako Casino Shopping saltegiaren kontra legez kanpo irekitzeagatik
Igandean, arratsaldeko 3etatik landa, LAB sindikatak ekintza bat burutu zuen Baionako alde zaharreko Victor Hugo karrikan idekirik zegoen Casino Shopping saltegiaren kontra. Saltegi honek jadanik astelehenetik larunbatera idekitzen du 7:30etatik 21 orenak arte eta igande goizetan. Baina horrekin aski ez izanik, legediak onartzen duena baino urrunago doa eta 13 orenetatik landa igande arratsalde osoan ere idekia atxikitzen zuen, legez kanpo.
LAB sindikateko 20 kide saltegiaren aitzinean ezarri ziren hau hesteko helburuarekin. Zuzendaritzarekin kalapita bizian aritu ondotik eta Baionako auzapeza den Jean-René Etchegaray zein prentsaren presentziarekin, zuzendaritzak amore eman du, saltegiaren ateak hetsi eta hurrengo igandeetan ere hetsia atxikiko duela hitzemanez.
LABentzat, igandeko lanaren sustatzaileen kontrako garaipena urrats bat besterik ez da. Izan ere, igande arratsaldeetan ateak idekitzen dituen saltegiko zuzendaritzak ontsa ezagutzen du legedia, eta horrela eginez, saltegiak igandetan idekitzeko eztabaida elikatzen du, eskaintza horrekin jendartean galdera sortuz.
LAB sindikatak ez du salaketa ekimen horretan soilik gelditu nahi, eta jendartean desbideraketa horien aitzinean sentzibilizazio ekintza gehiago burutzeko prest da. Funtsean, ez dugu nahi sosa eta etekinaren logikak gure eskubide sozialen gainetik pasa ditezen.
Kontratazio publikoan klausula sozialak sartzea legala dela ebatzi dute epaileek
Estatuko abokatutzak, Gipuzkoako Diputazioak bere herri lan guztietan aplikatzen duen foru arauren aurka ipinitako demandaren sententzia atera da. Sententzia honekin ezin argiago gelditu da langileen eskubideen defentsan Gipuzkoako Diputazioa eta sindikatuak hasi genuen bidea lagala dela. Berriro ere, kontratazio publikoan klausula sozialak sartzea legala dela ebatzi dute epaileek.
Hemendik aurrera ez dago aitzakirik edo justifikazio faltsurik langileen egoera konpontzeko behar honi bizkarra emateko. Ez genuke ulertuko alderdi politiko edo instituzio publikoek langileen alde ez jokatzea eta, horregatik, langileen aurkako jarrerak salatzen jarraituko dugu LAB sindikatuak.
Denon artean lortu behar dugu Gipuzkoako Diputazioko herri lanetan lortutako onurak beste herrialdeetako herri lanetan aplikatzea.
LAB sindikatuak, erreformak lapurtu dizkigun eskubideen alde lanean darrai. Zentzu honetan, instituzio publikoei interpelatuz —mozio baten bidez— langileen eskubideak berma daitezen lanean dirau.
Azken lan heriotza salatzeko elkarretaratzeak Zornotzan
Eguerdian gehiengo sindikalaren eskutik eta arratsaldean Zornotza Eraldatzen taldeak deituta, Zornotzako Boroa poligonoan gertatutako istripua salatzeko eta bertan bizia galdu zuen langilearen familia eta gertukoi elkartasuna adierazteko elkarretaratzeak egin ziren atzo.
50 urtetako langilea, subkontratatua, Forest Trafic enpresarentzako lanetan ari zela hil da. Berriro ere ekidin ziteken heriotz bat, berriro ere subkontratatutako enpresa batean gertatutako heriotza. Berriro ere salatu behar dugu patronalak eta administrazio pubikoko gestore politikoek —beren zeregina gure lan postuetan gure bizitza eta osasuna garantizatzea denean— egun gutxitan ahaztuko dutela jakiteak sortzen digun haserrearekin.
LABek, 2015ean gertatu den lehen heriotz istripu honi erantzun bat ematea exijitzen du, eta arrazoiak ikertzeaz gain arduradunak publikoki ezagutaraztea eta neurriak hartzea gertakari tamalgarri hauek berriro gerta ez daitezen.