Igandean, apirilak 17, euskal preso eta iheslarien etxeratzearen alde Bilbon deitua dagoen manifestazioan parte hartuko du LABek eta bere kideei manifestazioan parte hartzeko deia egin nahi die. Horrez gain preso eta iheslarien eskubideen aldeko borroka, lantokietan indartuko du.
Blog Page 1039
Arcelor Mittaleko langileek mobilizatzen jarraituko dute
Apirilaren 12an, 24 orduko greba egingo zuten Arcelor Mittal Zumarragan pairatzen duten egoera salatzeko. Arratsaldean burutu zuten manifestazioaren ostean borroka honetan alboan izan dituztenei eskerak eman eta lanpostu eta eskualdearen alde borrokan jarraituko dutela adierazi zuten.
Lantokiaren bideragarritasunean sinisten dute eta horren alde borrokatuko dira. Badakite borroka luzea eta gogorra izango dela, baina ez dute beste biderik ikusten. Zentzu horretan, hurrengo deialdia jarria dute. Datorren asteazkenean, hilak 20, langileon eskubideen, enplegu eta azken finean eskualde osoaren alde mobilizatuko gara.
EAJ eta PSEk Gipuzkoako Diru Sarrerak Bermatzeko Laguntzan egin nahi dituzten murrizketak onartezinak dira
Eskandalua da pobrezia Euskal Herri osotik hedatzen ari den bitartean eta milaka pertsona enplegurik gabe dagoenean, hauen gehiengoak (%67,8) inolako prestaziorik ez jasotzea edo jasotzen dutenean, hilabete amaierara heltzea ahalbidetzeko nahikoa ez izatea. Honekin lotuta, Gipuzkoako Foru Aldundiak, EAJ y PSEren eskutik, Diru Sarrerak Bermatzeko Laguntzak (DSBL) murriztu nahi dizkie gehien behar duten pertsonei.
Neurri honek ondorioak izango ditu familia askorentzat. EAJ eta PSEren asmoak baietzatzen badira, aurten, urte erdialdetik aurrera ikusiko dute nola murrizten dituzten Laguntzak, bien bitartean, politiko berdinek zalantzarik ez dutenean aberatsei zerga gutxiago ordaintzen laguntzeko, adibidez, Gipuzkoan zegoen aberastasun handien zerga kenduz.
Argiak dira iazko datuak. 2015ean zehar 1.440 familiak jaso dituzte Diru Sarrerak Bermatzeko Laguntzak. Gogora dezagun 2012an sortu zela azken hau, Eusko Jaurlaritzaren esku dagoen Diru Sarrerak Bermatzeko Errentan (DSBE) egindako murrizketei aurre egiteko.
Gogora dezagun EAEn DSBE jasotzen dutenen %19a soldatapeko langileak direla. Honek argi erakusten du enpresario batzuk krisia erabiltzen dutela soldatak jaisteko. Gipuzkoan, 3.010 pertsonek jasotzen dute DSBE euren soldata osagarritzeko, hilero gorantz doan kopurua.
Horregatik LABetik exijitzen dugu behar duten pertsonei DSBL mantentzea. Pentsa dezatela pertsonengan, egin dezatela lan guztiei laguntzeko eta laguntza sozialetan ezarritako murrizketak indargabetu daitezela.
Erabiltzen diren argudioak, dei efektuari dagozkionak esaterako, diskurtso xenofoboak izkutatzen dituzten aitzakiak baino ez dira, guztiz onartezinak direnak baina gero eta gehiago ari direnak zabaltzen, Europa zein Euskal Herriko politikoen artean. Ikusten dugu nola erabiltzen diren gero eta gehiago murrizketak ezarri edo errefuxiatuak kanporatzeko.
Gaur, inoiz baino gehiago, instituzio publikoek neurria eman behar dute, beharrizan sozial larriak dituztenen aurrean, jan eta duintasunez bizitzeko aukera izan dezaten, edozein lekutakoak izanda ere.
Auzitegi medikuek parekidetasuna, prestakuntza eta lan baldintza duinak aldarrikatu dituzte
LAB, CCOO, ELA, CSF eta CGT sindikatuek deituta auzitegi medikuek aste honetan 4 greba egun egingo dituzte Bizkaian, astelehenetik ostegunera, 09:30etik 14:00etara. Mobilizazio hauetan, besteak beste, guardien ondoren gutxieneko atsedena bermatzea, gutxieneko soldata eta Eusko Jaurlaritzaren aldetik jarrera aldaketa eskatu dute
Atzo, astelehena, kontzentrazioa egingo zuten Barroeta Aldamarreko epaitegietan. Gaur, manifestazioa egin dute epaitegi ingurutik. Bihar, antzerki bat egingo dute Plaza Zirkularrean, 11:00etan. “El Instituto Vasco de Medicina Legal languidece” antzezpena aurkeztuko dute bertan. Ostegunean, Sabin Etxera eramango dute protesta, 11:00etan hasiko dute elkarretaratzea.
Mobilizazio hauetan ondoko aldarrikapenak plazaratu dituzte:
– Etengabeko prestakuntza espezializatua euren lana hobeto egin ahal izateko.
– Guardien ondoren gutxieneko atsedena bermatzea, gutxienez lo egin eta atsedena hartu ahal izateko.
– Gutxieneko soldata, Osakidetzakoarekin parekatuz.
– Eusko Jaurlaritzaren aldetik jarrera aldaketa, euren lanpostuetan gutxieneko lan-baldintza duinak eta baloratuak izateko
Ainhoa Etxaidek Sindikalgintza eta Nazio Eraikuntzari buruz hitz egin zuen Galizan
Ainhoa Etxaide Idazkari Nagusia Galizan izan da CUT bertako sindikatuak gonbidaturik “Sindicalismo e Construccion Nacional” (Sindikalgintza eta Nazio Eraikuntza) hitzaldia ematen. Hitzaldian CUTeko Idazkari Nagusia den Manolo Camañok ere parte hartu du.
Galizira eginiko bidaian LAB sindikatuak bultzatzen duen “Eraldaketa sozialerako sindikalgintza berria (bir)pentsatzen” prozesua CUTeko delegatuei aurkezteko aprobetxatu zuen Ainhoa Etxaidek. Izan ere, orain dela urte bete hasitako eztabaida prozesuak jakinmin handia sortu du Euskal Herriatik kanpo.
Zentralizazioaren aurrean, Euskal Esparruaren alde indarrak batu eta aliantzak eraikitzeko unea da
LAB sindikatuak gaur, hilak 8, eskaini duen agerraldian azaldu du CCOO, UGT eta Confemetalek egindako akordioak berriro ere agerian utzi duela ez dutela negoziazio kolektiborako marko propiorik nahi. Bestalde akordio horrek negoziazio kolektiboan ondorio larriak izango dituela salatu du sindikatuak.
Aspaldi salatu genuen estatuko hitzarmenen inboluzioa gertatzen ari dela. gero eta gehiago dira, Madrilen, bertako sektore hitzarmenen negoziazio ahalmena mugatzen ari diren hitzarmenak. Azkena metalekoa. Hau oso larria da, gutxinaka gutxinaka bertako negoziazio esparrua edukiz hustutzen ari dira. Honela Patronalak hitzarmen merkeagoak lortzen ditu eta hemengo langileen lan baldintzak kaskartzea lortzen du.
CCOO eta UGT sindikatuek ere patronalaren bide bera hartu dute, ez dute negoziazio kolektiborako marko propiorik nahi. Lan harremanetan erabakitzeko esparrua Madrilera eramaten ari dira. Hori egin dute argi eta garbi metaleko hitzarmen berri honekin. CCOO gezurretan ari da, akordio horrek bertako hitzarmenak babesten dituela esaten duenean. Hemengo sektore hitzarmenak erabat estatukoaren menpeko egiten ditu. Gutxinaka gutxinaka estatu mailan sektoreko langileen soldata eta lan baldintzak berdintzeko asmo argia azaltzen da, hemengo hitzarmenak estatuko hoberenak dira, beraz argi dago bide honetatik ezer onik ezin dezakegula espero.
Tamalgarria da. CCOOek, sindikatu abertzaleok, negoziazio kolektiboaren blokeoaren erantzule egiten gaitu. Baina LAB langileen mesedetan lan egiteko dago, ez patronalari men egiteko. Lan erreformari aurre egiten ez dion hitzarmenik ez du sinatuko LABek. Prekarietate gehiago ekarriko duten hitzarmenek ez dute LABen oniritzirik izango.
CCOO eta UGT CONFEBASKentzat aliatu ezin hobeak dira, edozertarako prest daude. Gehiengo sindikalari muzin egin eta gutxiengoan hitzarmenak sinatzeko prest daude, edota negoziazio esparruak edukiz hustu eta Madrilera eramateko ere bai. Guzti honek ondorio oso larriak ditu euskal langileontzat.
Denborak arrazoi eman digu eta beraz gure estrategian berresten gara: eremu guztiak defendatu ditugu, sektoreartekoa, sektorekoa nahiz enpresakoa. Sektore hitzarmenak blindatzeko helburuz, negoziazio kolektiborako marko propioaren aldeko apustu argia egin dugu, bi akordio interprofesionalen negoziaketan parte hartuz besteak beste, argi baitago negoziazio kolektiborako esparru propioa ezin dela enpresaz enpresa eraiki.
Angel Toña Sailburuak negoziazio kolektiboa ez dela konpetentzia politikoa esan du. Negoziazio kolektiobaren araberakoa da lan harreman eredua, eta lan harreman ereduaren araberakoa garapen eredua, hiruko erregela honen emaitza beraz zein da? Arazo politiko baten aurrean gaudela. Jaurlaritzak, instituzioek, ezin dute beste alde batera begira egon.
Argi dago, CONFEBASKek ez duela euskal esparrurik nahi, ez duela negoziazio kolektiborako marko propiorik nahi. Eta Jaurlaritza CONFEBASKekin lerrokatu da, ez dute kritika bakar bat ere izan eurekiko, bai ordea gurekiko, errealitatetik kanpo omen gaude. Oker daude. Langileen ondoan gaude eta prekarietatearen eta pobreziaren hedapena besterik ez dugu ikusten. Negoziazio kolektiboa Madrilen egiten bada egoerak okerrera egingo du.
Arazo politiko larri baten aurrean gaude. LABek jarraituko du proposamenak egiten eta eremu instituzionala interpelatzen. Aburtok elkarrizketa sozialeko mahaia osatzeko asmoa agertu zuenean egin genuen proposamena, LHK – CRLn hitzarmenak desblokeatzeko egin genuena…Eremu politikoak ezin du beste aldera begira jarraitu.
Mobilizatzen jarraitzea besterik ez zaigu geratzen. Apirilaren 14ean Atanon dugu hurrengo hitzordua eta maiatzerako agenda mobilizazioz betea dugu. Jauzi bat egingo dugu ekintza sindikaleko dinamikan, negoziazio kolektiboa baldintza hobeagoetan berreskuratu asmoz.
Egoera latza da, erronka handiak. Horregatik gaurkoan euskal esparruaren alde gaudenon artean, LHEE/BSEE defendatzen dugunon artean indarrak batu eta aliantzak eraikitzeko momentua dela esanez bukatu nahi dugu. LABek beti izan du eskua luzatua horretarako.
Txernobil = Fukushima = GaroƱa = Iberdrola
Garoñaren Kontrako Foroak deituta gaur, goizeko 11:00etan, Garoña betirako itxi eta desegin dezaten eskatuko dugu Iberdrolako Akziodunen Batzordearen aurrean. Gogoratu behar da Iberdrola zentralaren %50aren jabe dela.
Garoña berriz ere martxan jartzeak, milaka urte iraungo duten hondakin nuklearrak sortzea ekarriko luke eta gainera istripu bat gertatzeko arriskua onartu beharko genuke, izan ere, zentrala guztiz zaharkiturik baitago, bere bizi-iraupena bete du iada. Elkarretaratze honekin, Garoña betirako itxi eta desegin dezatela eskatu nahi dugu berriz ere.
LABeko Superprekarioak Legebiltzarrean, klausula sozialen legea iruzur hutsa dela salatuz
Gaur azpikontratazio publikoan KLAUSULA SOZIALAK EZ TXERTATZEKO LEGEA onartu da Gasteizko Legebiltzarrean, EAJ eta PSEk adostutakoa. LABek protesta egin du bertan eta azpikontratetako langileen eskubideak benetan bermatuko dituen legea aldarrikatuz.
Berez, albiste ona izan beharko litzateke administrazioko azpikontratetako langileentzat, euren laneko egoera hobetuko lukeelako eta herritarrentzat orohar, zerbitzuaren kalitatea hobetuko lukeelako. Baina hori zientzia-fikzioa da EAJ eta PSEren akordio batez argi garenean, “Klausula Sozialak txertatzeko” bezala izendatua izan arren, kontrakoa bilatzen dutelako, klausula sozialen benetako aplikazio eraginkorrari bidea ixtea.
Hori dela eta, prekarietatearen aurka borrokan ari diren LABeko superheroiek, SUPERPREKARIOEK, agerpena egin dute Parlamentuan. Azpikontratetako langile hauek, prekarietatean egiten dute lan, eta salatu dute bozkatu den legeak prekarietatearekin amaitzeko ez duela balioko. Egoera larri hauekin amaitzeko aukera izanda, EAJ eta PSEk ez dute horretarako borondaterik izanik, eta lotsagarritzat jo dute euren jarrera.
Ahoa beteko zaie EAJ eta PSEko parlamentariei Lan Erreformaren aurka daudela esanez, baina berau baldintzatzeko lehen aukeraren aurrean, berriz ere kokatzen dira gutxiengo baten aurka (azpikontratatutako enpresak) eta gehiengoaren aurka (Herri honetako langileria).
EAJ eta PSEk betikoa aukeratu dute: enpresei mesede egitea eta langileak eta herritarrak kaltetzea. Batak zein besteak langileon interesei bizkar ematen jarraitzen dute. Geroz eta Superprekario gehiago gara Euskal Herrian, geroz eta langile gehiago, prekarietatean bizitzera kondenatuta.